ରାଉରକେଲା, (ସସ୍ମିତା ପ୍ରଧାନ) : କୋଏଲ ନଗର ସ୍ଥିତ ଅକ୍ଷୟ ସାଂସ୍କୃତିକ ପରିଷଦ ପକ୍ଷରୁ ଆୟୋଜିତ ଅକ୍ଷୟ ସଂଗୀତ ସନ୍ଧ୍ୟାକୁ ଉପସ୍ଥିତ ଶ୍ରୋତା ମନଭରି ଉପଭୋଗ କରିଥିଲେ । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଉଦ୍ଘାଟନ କରିିଥିଲେ ଆର୍.ଏସ୍. ପି. ସହର ସେବା ବିଭାଗର ମହାପ୍ରବନ୍ଧକ ପ୍ରତାପ କୁମାର ସ୍ୱାଇଁ, ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ ପ୍ରଦୀପ କୁମାର ଦାସ, ସୁନିଲ କାୟଲ, ଗୌତମ ମିଶ୍ର । ଏହି ଅବସରରେ ଅକ୍ଷୟ ମହାନ୍ତିଙ୍କ ସୁପୁତ୍ର ଚିତ୍ରଭାନୁ ମହାନ୍ତି, ଭାସ୍କର ପୁହାଣ, ତବଲା ବାଦକ ଗୌରାଙ୍ଗ ଗୋଚ୍ଛାୟତ, ଅନୀଲ ମଲ୍ଲିକଙ୍କୁ ସେମାନଙ୍କ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ସମ୍ବର୍ଦ୍ଧିତ କରାଯାଇଥିଲା । ସେହିପରି ଅକ୍ଷୟ ଫ୍ୟାନ୍ସ କ୍ଲବ ପକ୍ଷରୁ ସ୍ୱର୍ଗତ ଅକ୍ଷୟଙ୍କୁ ଶ୍ରଦ୍ଧାଞ୍ଜଳି ଅର୍ପଣ ଉଦ୍ଦେଶ୍ୟରେ ଆୟୋଜିତ ଗଣପ୍ରଦୀପ ଦାନ କାର୍ଯ୍ୟକ୍ରମରେ ଦୀପ ଦାନ କରିଥିଲେ ବହୁ ଅକ୍ଷୟ ପ୍ରେମୀ ସାଧାରଣ । ଚର୍ଚ୍ଚିତ କଣ୍ଠଶିଳ୍ପୀ ମିତ୍ରଭାନୁ ମହାନ୍ତି, ଭାସ୍କର ପୁହାଣ, ଗୌରାଙ୍ଗ ଗୋଛୟତ, ଇତି ପଟ୍ଟନାୟକ, ସ୍ମିତା ମିଶ୍ର ପ୍ରମୁଖ ଭେଟି ଦେଇଥିଲେ ସାଗର ତୁମେ, ଯାଯାବର, ଏଇ ଯେ ବନଲତା, ଚନ୍ଦ୍ରମଣ୍ଡଳ ହସେ, ଭଳି ଅକ୍ଷୟ ମହାନ୍ତିଙ୍କ ବହୁ ଅଭୁଲା ସଂଗୀତ । ବିଟୁ ମହାନ୍ତି, ସ୍ମୃତି ରଞ୍ଜନ ରାଉତ, ବିଜୟ କୁମାର ଦାସ, ତ୍ରିବିକ୍ରମ ମାଝି, ଶକ୍ତେଶ୍ୱର ପାତ୍ରଙ୍କ ପରିଚାଳନାରେ ଅନୁଷ୍ଠିତ ଏହି ମନଛୁଆଁ କାର୍ଯ୍ୟକ୍ରମକୁ ବେଶ ବିଳମ୍ବିତ ରାତିଯାଏ ଉପଭୋଗ କରିଥିଲେ ଭରପୁର ଅକ୍ଷୟ ପ୍ରେମୀ ଶ୍ରୋତା ।