ଭୋଗରାଇ, (ଶିବନାରାୟଣ ପାତ୍ର) : ଭୋଗରାଇ ବ୍ଲକ ଖରିଦପିପଳ ଗ୍ରାମପଞ୍ଚାୟତ ଅନ୍ତର୍ଗତ ନୟାପାଲି ଗ୍ରାମରେ ଅବସର ପ୍ରାପ୍ତ ପ୍ରଧାନଶିକ୍ଷକ ରାଧାଗୋବିନ୍ଦ ଦେଙ୍କ ପରଲୋକ ହୋଇଯାଇଛି । ମୃତ୍ୟୁବେଳକୁ ଶ୍ରୀଯୁକ୍ତ ଦେଙ୍କୁ ୮୮ ବର୍ଷ ହୋଇଥିଲା । ତାଙ୍କ ମୃତ୍ୟୁରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ତାଙ୍କ ମୃତ୍ୟୁ ଖବର ଶୁଣିବା ପରେ ଶ୍ରୀଯୁକ୍ତ ଦେଙ୍କ ବାସ ଭବନରେ ବହୁ ବୁଦ୍ଧିଜୀବୀ, ଶିକ୍ଷାବିତ୍, ଶିକ୍ଷକ, ଛାତ୍ରଛାତ୍ରୀ ଏବଂ ରାଜନେତା ପ୍ରମୁଖ ଉପସ୍ଥିତ ହୋଇ ଶେଷ ଦର୍ଶନ କରିବା ସହ ଶ୍ରଦ୍ଧାଞ୍ଜଳି ଦେଇଥିଲେ । ମୃତ୍ୟୁ ଶଯ୍ୟା ନିକଟରେ ତିନି ପୁତ୍ର , ପୁତ୍ର ବଧୂ , ନାତୀ ଓ ନାତୁଣୀ ଉପସ୍ଥିତ ଥିଲେ । ରାଧାଗୋବିନ୍ଦ ଦେ ନିଜ ଗ୍ରାମ ନୟାପାଲି ପ୍ରାଥମିକ ବିଦ୍ୟାଳୟରେ ଦୀର୍ଘ ୧୫ ବର୍ଷ ଶିକ୍ଷାଦାନ କରିବା ସହ ଶେଷରେ ପ୍ରଧାନଶିକ୍ଷକ ଦାୟିତ୍ୱ ତୁଳାଇ ଅବସର ନେଇଥିଲେ । ଅବସର ପରେ ଶ୍ରୀଯୁକ୍ତ ଦେ ନୟାପାଲି ଗ୍ରାମର ବିଭିନ୍ନ ସାଂସ୍କୃତିକ ଅନୁଷ୍ଠାନକୁ ନିଜ ପେନ୍ସନ୍ ଟଙ୍କାରୁ କିଛି କିଛି ଅର୍ଥ ଦାନ କରି ବହୁ ପ୍ରଶଂସା ସାଉଁଟିଥିଲେ । ଶ୍ରୀଯୁକ୍ତ ଦେଙ୍କ ମରଶରୀରକୁ ଗ୍ରାମର ଚତୁଃପାଶ୍ୱର୍ରେ ବୁଲାଇ ନୟାପାଲି ପ୍ରାଥମିକ ବିଦ୍ୟାଳୟରେ ପହଞ୍ଚିଲା ପରେ ବିଦ୍ୟାଳୟ ତରଫରୁ ଶିକ୍ଷକ ଶିକ୍ଷୟିତ୍ରୀ ଏବଂ କୁନି କୁନି ଛାତ୍ରଛାତ୍ରୀମାନେ ଶ୍ରଦ୍ଧାସୁମନ ଅର୍ପଣ କରିବା ସହ ରାଧାଗୋବିନ୍ଦ ସାର ଅମର ରହେ ଧ୍ୱନିରେ ପ୍ରକମ୍ପିତ କରିଥିଲେ । ଶେଷରେ ଗ୍ରାମର ଗୁଆଶୁଳ ମଶାଣିରେ ଶ୍ରୀଯୁକ୍ତ ଦେଙ୍କ ଶବ ସଂସ୍କାର କରାଯାଇଥିଲା । ବଡ଼ ପୁଅ ମୃତ୍ୟୁଞ୍ଜୟ ମୁଖାଗ୍ନି ଦେଇଥିଲେ ।