ତୁଷୁରା : ତୁଷୁରା ଅବକାରୀ ବିଭାଗ ପକ୍ଷରୁ ୪୮ ଲିଟର ଦେଶୀ ମଦ ଓ ୩୨ କେଜି ୩୮୦ ଗ୍ରାମ ଗଞ୍ଜେଇ ସହ ତିନୋଟି ବାଇକ ଜବତ । ଚାରିଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ତୁଷୁରା ଅବକାରୀ ଅଧିକାରୀ ଶ୍ରୀକାନ୍ତ ପାଣିଗ୍ରାହୀ ସୂଚନା ପ୍ରଦାନ କରିଛନ୍ତି । ପେଟ୍ରୋଲିଙ୍ଗ ସମୟରେ ଡୁଙ୍ଗିବାହାଳ ଛକଠାରେ ଏକ ବାଇକରେ ତୁଷୁରା ଥାନା ଅନ୍ତର୍ଗତ ଡୁଙ୍ଗିବାହାଳ ଗ୍ରାମର ସୂର୍ଯ୍ୟମଣି ରଣା (୩୭) ଆସୁଥିବା ବେଳେ ସନ୍ଦେହ କରି ତାଙ୍କୁ ଅବକାରୀ ବିଭାଗର ଅଧିକାରୀମାନେ ଅଟକାଇ ଥିଲେ । ଯାଞ୍ଚ ପରେ ୪୮ ଲିଟର ଦେଶୀ ମଦ ବାହାରିଥିଲା । ବଡବାହାଲ ଛକ ପାଖରେ ଦୁଇଟି ବାଇକରେ ତିନି ଜଣ ଯୁବକ ଏକ ଜରି ପେକେଟ ଅଦଳବଦଳ କରୁଥିବା ବେଳେ ଅବକାରୀ ବିଭାଗ ପକ୍ଷରୁ ସନ୍ଦେହ କରି ଯାଞ୍ଚ କରାଯାଇଥିଲା । ଉକ୍ତ ଯୁବକଙ୍କଠାରୁ ୩୨ କେଜି ୩୮୦ଗ୍ରାମ ଗଞ୍ଜେଇ ଜବତ କରି କୋର୍ଟ ଚାଲାଣ କରିଥିଲା ଅବକାରୀ ବିଭାଗ । ଉକ୍ତ ଯୁବକମାନେ ଗୌରଗୋଠ ଗ୍ରାମର ବ୍ରଜରାଜ କୁମ୍ଭାର (୨୯), ଓମପ୍ରକାଶ ରଣା (୩୬) ଓ ତରଭା ଥାନା ଅନ୍ତର୍ଗତ କମସରା ଗ୍ରାମର ରାଜୀବ ବେହେରା (୩୫) ବୋଲି ଜଣା ପଡିଛି । ଏହି ପେଟ୍ରୋଲିଙ୍ଗରେ ବିଭାଗର ଡୁଲେଶ୍ୱର କୁମ୍ଭାର, ମଧୁସୂଦନ ସେଠ, ବିଭୂତି ଭୋଇ, ଭୋଜରାଜ ବଢେଇ ପ୍ରମୁଖ ସାମିଲ ଥିଲେ ।