ଢେଙ୍କାନାଳ : ବିଗତ ୨୫ ବର୍ଷରେ ରାଜ୍ୟରେ ଅଧାରୁ ଉର୍ଦ୍ଦ ଜାଗା ଜବର ଦଖଲ ହୋଇସାରିଛି । ଏପରିକି ଗୋଚର, ଜଙ୍ଗଲ ଜମି, ଶ୍ମଶାନ, ଜଳାଶୟ, ରାସ୍ତାଘାଟ ଆଦି କିଛି ଛାଡୁନାହାନ୍ତି । ଏହା ଉପରେ ପୂର୍ଣ୍ଣଚ୍ଛେଦ ନପଡିଲେ, ସମୟ ଆସିବ ଜମିଜମା ମାମଲା ବୁଝୁଥିବା ଖୋଦ ରାଜସ୍ୱ ବିଭାଗ ମଧ୍ୟ ଭୂମିହୀନ ହୋଇଯିବ । ତେଣୁ ଜବର ଦଖଲକାରୀଙ୍କ ଏକ ତାଲିକା ପ୍ରସ୍ତୁତ କରିବାକୁ ତହସିଲଦାର ମାନଙ୍କୁ ନିର୍ଦ୍ଦେଶ ଦିଆଯାଇଛି । ସେ ଯିଏ ହେଉ, ଯେଉଁ ଜାଗା ହେଉ ଖୁବ୍ଶୀଘ୍ର ଜବର ଦଖଲକୁ ଉଚ୍ଛେଦ କରାଯିବ ବୋଲି ରାଜ୍ୟ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ପ୍ରକାଶ କରିଛନ୍ତି । ଦିନିକିଆ ଢେଙ୍କାନାଳ ଗସ୍ତରେ ଯାଇ ଜିଲ୍ଲା କାର୍ଯ୍ୟାଳୟ ସଭାଗୃହରେ ରାଜସ୍ୱ ବିଭାଗର ସମୀକ୍ଷା କରିଛନ୍ତି ମନ୍ତ୍ରୀ ସୁରେଶ ପୂଜାରୀ । ଏହି ଅବସରରେ ରାଜ୍ୟରେ ଜବରଦଖଲକୁ ନେଇ ସୃଷ୍ଟି କରୁଥିବା ସମସ୍ୟା ଦିଗରେ ମନ୍ତ୍ରୀ ତାଙ୍କର ଏହି କଡା ଅଭିମୁଖ୍ୟକୁ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି ।