କଣ୍ଟାବାଞ୍ଜି, (କୈଳାଶ ସଗ୍ରିଆ) : ଶ୍ରାବଣ ମାସର ପ୍ରଥମ ଦିନରେ କରୋନାର ନିୟମକୁ ପାଳନ ପୂର୍ବକ ପ୍ରସିଦ୍ଧ ଶୈବପୀଠ ହରିଶଙ୍କରଠାରେ ଇନ୍ଦ୍ରଧନୁ ସାହିତ୍ୟ ସଂସଦର ସାରସ୍ଵତ ସଭା ଅନୁଷ୍ଠିତ ହୋଇଥିଲା । କବୀ ସଞ୍ଜୁକ୍ତା ପରିଚ୍ଛାଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ମିନକେତନ ବରିହା ମୁଖ୍ୟ ଅତିଥି, ସମ୍ମାନିତ ଅତିଥି ଭାବରେ ଜୁନିୟର ରେଡକ୍ରସ ପରାମର୍ଶ ଦାତା ତଥା ପ୍ରକୃତିବନ୍ଧୁ ବିରଞ୍ଚି ନାରାୟଣ ଦାଶ, ଶିକ୍ଷକ ଅମର ବେହେରା, ସିଆରସିସି ସରୋଜ କାନ୍ତ ପାଣିଗ୍ରାହୀ ଯୋଗଦେଇଥିଲେ । ସମ୍ପାଦିକା ସୁଶ୍ରୀ ସବିତା ଭୋଇ ସ୍ୱ।ଗତ ଭାଷଣ ଦେଇଥିଲେ ଏବଂ ସିଆରସିସି କୁଞ୍ଜ ବିହାରୀ ସରାଫ ସଭା ପରିଚାଳନା କରିଥିଲେ । ସର୍ବ ପ୍ରଥମେ ପୂଜାର୍ଚ୍ଚନା କରିବା ପରେ ସୁଶ୍ରୀ ସବିତା ଭୋଇଙ୍କ ସମ୍ପାଦନାରେ ପ୍ରକାଶିତ ହେଉଥିବା କୋଶଲି ସାହିତ୍ୟ ପତ୍ରିକା ପନତକାନି ଓ ବିରଞ୍ଚି ନାରାୟଣ ଦାଶଙ୍କ ନିର୍ଝର ସାହିତ୍ୟ ପତ୍ରିକା ଅତିଥି ମାନଙ୍କ ଦ୍ୱାରା ଉନ୍ମୋଚିତ ହୋଇଥିଲା ।ମହାମାରୀ କରୋନା ସମୟରେ ରକ୍ତ ସଂଗ୍ରହ, ଭୋକିଲା ପେଟକୁ ଖାଦ୍ୟ, ବୁଲା ଗାଇଗୋରୁ, କୁକୁର ଓ ହରିଶଙ୍କରରେ ଭୋକିଲା ମାଙ୍କଡମାନଙ୍କୁ ଖାଦ୍ୟ ଯୋଗାଇ ଆସୁଥିବାରୁ ସଂସଦ ତରଫରୁ ବିରଞ୍ଚି ନାରାୟଣ ଦାଶଙ୍କୁ ଦରଦୀ ବନ୍ଧୁ ସମ୍ମାନରେ ସମ୍ମନିତ କରିବା ପୂର୍ବକ ମାନପତ୍ର, ଉପଢୌକନ ପ୍ରଦାନ କରାଯାଇଥିଲା । ଅତିଥିମାନଙ୍କ ଲେଖନୀ ହିଁ କରୋନା ସଚେତନତାର ବାର୍ତ୍ତା ବାହକ ଶୀର୍ଶକ ଉପରେ ଆଲୋଚନା କରିଥିଲେ । ଆଲୋଚନା ପରେ ସଚେତନ ଧର୍ମୀ କବିତା ପାଠ ହୋଇଥିଲା । ତା’ପରେ ବୃକ୍ଷ ରୋପଣ ଓ ମାଙ୍କଡମାନଙ୍କୁ ଖାଦ୍ୟ ଦିଆଯାଇଥିଲା । ପରିଶେଷରେ ଧରମ ସିଂ ଧରୁଆ ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ କବୀ ସୁରୁଚୀ ମିଶ୍ର, ସଞ୍ଜୁକ୍ତା ମେହେର, ମମତା ପଣ୍ଡା, ସଞ୍ଜୁକ୍ତା ଚନ୍ଦନ, ପ୍ରତିମା ମେହେର, ଅଭିଳାଷ ଭୋଇ ଆଦି ଯୋଗ ଦେଇଥିଲେ ।
