ସଇଁତଲା, (ଲକ୍ଷ୍ମୀକାନ୍ତ ସାହୁ) : ବଲାଙ୍ଗିର ଜିଲ୍ଲା ସଇଁତଲା ଅଞ୍ଚଳର ବିଭିନ୍ନ ଗ୍ରାମରେ କୁକୁର ଆତଙ୍କ ଦେଖାଦେଇଛି । କୁକୁର କାମୁଡ଼ାରେ ୨୪ ଜଣ ଆହତ ହୋଇଥିବା ଜଣାପଡ଼ିଛି । ବ୍ଲକ ଅନ୍ତର୍ଗତ ପିପୃଟ, କୁଇକେଡ଼ା, ବୁର୍ଡା, କେରମେଲି, ସମରା ଓ ସଇଁତଲା ଗ୍ରାମର ମୋଟ୍ ୨୪ ଜଣଙ୍କୁ କୁକୁର କାମୁଡ଼ିଥିଲା । ସେଥିମଧ୍ୟରୁ ୭ ଜଣଙ୍କ ସ୍ଵାସ୍ଥ୍ୟବସ୍ଥା ଗୁରୁତର ଥିବାରୁ ସେମାନଙ୍କୁ ବଲାଙ୍ଗିର ଭୀମଭୋଇ ମେଡିକାଲକୁ ସ୍ଥାନାନ୍ତର କରାଯାଇଛି । ଅନ୍ୟ ଆହତଙ୍କୁ ଚିକିତ୍ସା ପରେ ଘରକୁ ପଠାଇ ଦିଆଯାଇଥିବା ଜଣାପଡ଼ିଛି । ତେବେ ଉକ୍ତ ଗାଁରେ ଭୟର ବାତାବରଣ ଲାଗି ରହିଥିବା ବେଳେ ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନେବାକୁ ଦାବି ହେଉଛି ।