ଗଞ୍ଜାମ, (ପ୍ରଦୀପ କୁମାର ପଣ୍ଡା) : ଗଞ୍ଜାମ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥରେ ଛତ୍ରପୁର ବ୍ଲକ ସିନ୍ଦୁରପୁର ଗ୍ରାମରୁ ଏକ ବିବାହ ଭୋଜି ଖାଇ ଫେରିବା ବେଳେ ଗଞ୍ଜାମ ଥାନା ନିକଟ ରାସ୍ତାରେ ଏକ ଅଟୋ ଓଲଟି ପଡିଥିଲା । ଫଳରେ ଅଟୋରେ ବସିଥିବା ଡ୍ରାଇଭରଙ୍କ ସମେତ ସମସ୍ତ ୮ ଜଣ ଯାତ୍ରୀ ଆହତ ହୋଇଥିବା ଜଣାପଡିଛି । ସେଥିରୁ ସୁକାନ୍ତି ବେହେରା ନାମକ ଜଣେ ମହିଳା ଗୁରୁତର ଅଛନ୍ତି । ଖବର ପାଇ ଗଞ୍ଜାମ ଥାନା ଆଇଆଇସି ସନ୍ତୋଷ କୁମାର ବେହେରା ଏବଂ ଜାତୀୟ ରାଜପଥ ପେଟ୍ରୋଲିଙ୍ଗ ଅଫିସର ଦେବରାଜ ସାହୁ ପ୍ରମୁଖ ଘଟଣାସ୍ଥଳରେ ପହଂଚି ତୁରନ୍ତ ଦୁଇଟି ଆମ୍ବୁଲାନ୍ସ ଯୋଗେ ଆହତଙ୍କୁ ମେଡିକାଲ ପଠାଇ ଥିଲେ । ଘଟଣାସ୍ଥଳରୁ ମିଳିଥିବା ସୂଚନା ଅନୁଯାଇ ଛତ୍ରପୁର ଥାନା ଅନ୍ତର୍ଗତ ସିନ୍ଦୁରପୁର ଗ୍ରାମରୁ ଭୋଜି ଖାଇ ଅରୁଣପୁରକୁ ଦୁଇଟି ପରିବାର ଫେରୁଥିଲେ । ଆହତଙ୍କ ମଧ୍ୟରେ ତିନି ମହିଳା, ତିନି ପୁରୁଷ ଏବଂ ଦୁଇ ଜଣ ଶିଶୁ ଅଟୋରେ ଥିଲେ । ଅଟୋଟି ପ୍ରାୟ ୧୦ ଫୁଟ୍ ତଳକୁ ଓଲଟି ପଡ଼ିଥିଲେ ସୁଦ୍ଧା ଅଧିକ କ୍ଷତି ହୋଇ ନଥିବା ବେଳେ ଅଟୋଟି ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଡ୍ରାଇଭରଙ୍କ ବେପରୁଆ ଗାଡି ଚାଳନା ଯୋଗୁଁ ଏହି ଦୁର୍ଘଟଣା ଘଟିଥିବା ସେଠାରେ ଆଲୋଚନା ହେଉଛି । ଦୁର୍ଘଟଣା ପରେ କିଛି ସମୟ ପାଇଁ ରାସ୍ତାରେ ଗାଡିଗୁଡିକ ଅଟକି ରହିଥିଲା । ଆଇଆଇସି ଶ୍ରୀ ବେହେରା ସଙ୍ଗେ ସଙ୍ଗେ ଗାଡିଗୁଡିକୁ ଛାଡିବା ବ୍ୟବସ୍ଥା କରିଥିଲେ ।