ପାଟଣାଗଡ, (କେପିଏନ୍ଏସ୍) : ପାଟଣାଗଡ ତରଫରୁ ପାଟଣାଗଡ ପ୍ରାଥମିକ ବିଦ୍ୟାଳୟ ପ୍ରାଙ୍ଗଣରେ ବ୍ଲକସ୍ତରୀୟ ଗୁରୁପୂଜନ ଉତ୍ସବ ପାଳିତ ହୋଇଯାଇଛି । ଏହି ଅବସରରେ ଚଳିତ ବର୍ଷ ଅବସର ଗ୍ରହଣ କରିଥିବା ୨୨ଜଣ ଶିକ୍ଷକ ଶିକ୍ଷୟିତ୍ରୀଙ୍କୁ ଉପଢୌକନ ଦେଇ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ପାଟଣାଗଡ ବ୍ଲକର ସମସ୍ତ ଶିକ୍ଷକ ଶିକ୍ଷୟିତ୍ରୀ ଏହି ଉତ୍ସବରେ ଯୋଗ ଦେଇଥିଲେ । ପ୍ରାଥମିକ ଶିକ୍ଷକ ସଂଘର ସଭାପତି ସୂର୍ଯ୍ୟ କୁମାର ନନ୍ଦଙ୍କ ସଭାପତିତ୍ୱରେ ଅନୁଷ୍ଠିତ ସମାରୋହରେ ମୁଖ୍ୟ ଅତିଥି ରୂପେ ପାଟଣାଗଡ ବିଧାୟକ ତଥା ଉପ ମୁଖ୍ୟ ସଚେତକ ସରୋଜ କୁମାର ମେହେର, ସମ୍ମାନୀତ ଅତିଥି ରୂପେ ପାଟଣାଗଡ ବ୍ଲକ ଶିକ୍ଷା ଅଧିକାରୀ ଶଙ୍କର ପ୍ରାସାଦ ମାଝୀ, ସହ ଗୋଷ୍ଠୀ ଶିକ୍ଷା ଅଧିକାରୀ ରତନ ଧରୁଆ ଏବଂ ବୃନ୍ଦାବନ ନାଗ, ସଂଘର ଉପଦେଷ୍ଟା ତଥା ଶିକ୍ଷକ ନେତା ଡମ୍ବରୁଧର ପାଣିଗ୍ରାହୀ ଓ ସଂଘର ସଂପାଦକ ଦେବକାନ୍ତ ମେହେର ମଂଚାସୀନ ଥିଲେ । ଏହି ଅବସରରେ ଶ୍ରୀମତୀ ବିଜୟନୀ ଝାଙ୍କର, ରଂଜୁ ସାହୁ, ନୂତନ ଶ୍ରୀତମ, ସୁମନ୍ତ ପୁରୋହିତ, ଭରତ ନାଗ ଏବଂ ବିମ୍ବାଧର ରାଓ ସ୍ୱାଗତ ସଂଗୀତ ପରିବେଶନ କରିଥିଲେ । ସଂଘର ସଂପାଦକ ଦେବକାନ୍ତ ମେହେର ବାର୍ଷିକ ବିବରଣୀ ପାଠ କରିଥିଲେ ଏବଂ ଆଗାମୀ ଦିନରେ ସଂଘର କାର୍ଯ୍ୟୟକଳାପ ଉପରେ ଆଲୋକପାତ କରିଥିଲେ । ପରିଶେଷରେ ସଂଘର ଉପ ସଭାପତି ଅରୁଣ କୁମାର ତ୍ରିପାଠୀ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ । ବ୍ଲକର ସମସ୍ତ ସିଆର୍ସିସି ଉପସ୍ଥିତ ରହି କାର୍ଯ୍ୟକ୍ରମଟିକୁ ସଫଳ କରିଥିଲେ ।