ଲୋଇସିଂହା, (କେପିଏନ୍ଏସ୍) : ଲୋଇସିଂହା ଥାନା ଅଧିନ ବୁର୍ଡା ଗ୍ରାମରେ ଜଣେ ନାବାଳିକାକୁ ଅସଦାଚରଣ ଘଟଣାରେ ପୋଲିସ ଜଣଙ୍କୁ ଗିରଫ କରିଥିବା ଜଣାଯାଇଛି । ଥାନା କେସ୍ ନଂ-୨୬୭/୩୫୪-ଏ, ୩୫୪ ଆଇପିସି ପୋକସୋ ଆକ୍ଟରେ ଅଭିଯୁକ୍ତ ସୁବାସ ଚନ୍ଦ୍ର ସାହୁଙ୍କୁ ଆଜି ପୋଲିସ ଗିରଫ କରି ବଲାଙ୍ଗିର ସ୍ପେଶାଲ କୋର୍ଟରେ ହାଜର କରିଥିବା ଜଣାଯାଇଛି । ଲୋଇସିଂହା ଥାନା ଏସ୍ଆଇ ନବୀନ ଭୋଇଙ୍କ ସୂଚନା କ୍ରମେ, ପିଡିତା ନାବାଳିକା ଜଣକ ସବୁଦିନ ଅଭିଯୁକ୍ତର ଘରକୁ କ୍ଷୀର ଆଣିବାକୁ ଯାଇଥାଏ । ସୋମବାର ସକାଳେ ପିଡିତା ଜଣକ ଅଭିଯୁକ୍ତ ସୁବାସର ଘରକୁ କ୍ଷୀର ଆଣିବାକୁ ଯାଇଥିବା ବେଳେ ଅଭିଯୁକ୍ତ ତାର ଓଠରେ ଚୁମା ଦେବା ସହିତ ପିଡିତାର ସମ୍ବେଦନଶୀଳ ଅଙ୍ଗକୁ ସ୍ପର୍ଶ କରିଥିଲା । ଘରକୁ ଫେରି ନାବାଳିକା ନିଜ ପରିବାର ଲୋକଙ୍କୁ ସବୁକଥା କହିବା ପରେ ପିଡିତାର ପରିବାର ଲୋକେ ସୁବାସର ଘରକୁ ଯାଇ ଘଟଣା ବିଷୟରେ ପଚାରି ବୁଝିଥିଲେ । ପିଡିତାଙ୍କ ପରିବାର ଲୋକଙ୍କ ସମ୍ମୁଖରେ ଅଭିଯୁକ୍ତ ଜଣକ ନିଜ ଦୋଷ ସ୍ୱୀକାର କରିବା ସହିତ କ୍ଷମା ପ୍ରାର୍ଥନା କରିଥିବା ଏସଆଇ ଶ୍ରୀ ଭୋଇ ସୂଚନା ଦେଇଛନ୍ତି । ଅଭିଯୁକ୍ତକୁ ବଲାଙ୍ଗିର ସ୍ପେଶାଲ କୋର୍ଟରେ ହାଜର କରାଯାଇଥିବା ବେଳେ ଜାମିନ ନାମଞ୍ଜୁର ହେବାରୁ ତାକୁ ଜେଲ ହାଜତକୁ ପଠାଇ ଦିଆଯାଇଥିବା ଜଣାଯାଇଛି ।