ବଲାଙ୍ଗିର, (କେପିଏନ୍ଏସ୍) : ରିଙ୍ଗ ସେରିମନି କାର୍ଯ୍ୟକ୍ରମରେ ଗଣ୍ଡଗୋଳ କରି ଗିରଫ ହେଲେ ଜଣେ ଅନିମନ୍ତ୍ରିତ ବ୍ୟକ୍ତି । ଏପରି ଏକ ଅଭାବନୀୟ ଘଟଣା ଘଟିଛି ବଲାଙ୍ଗିର ସହରର ତୁଲସୀ ନଗରଠାରେ । ଗିରଫ ବ୍ୟକ୍ତି ଜଣକ କୃଷ୍ଣଚନ୍ଦ୍ର ପଟେଲ ବୋଲି ଜଣାପଡିଛି । ସୂଚନା ଅନୁସାରେ ଗତ ୧୯ ତାରିଖ ରାତିରେ ତୁଳସୀନଗରପଡ଼ାର ବାସିନ୍ଦା ଜ୍ୟୋତିପ୍ରସାଦ ସେଠଙ୍କ ଝିଅର ରିଙ୍ଗ ସେରିମନି କାର୍ଯ୍ୟକ୍ରମ ଚାଲିଥିବା ବେଳେ କୃଷ୍ଣଚନ୍ଦ୍ର ସେଠାକୁ ଆସିଥିଲେ ଏବଂ ବିନା କାରଣରେ ଗଣ୍ଡଗୋଳ କରିବା ସହିତ ଖାଇବା ଜିନିଷ ଫିଙ୍ଗିବାକୁ ଉଦ୍ୟମ କରିଥିଲେ । ଏହା ଦେଖି ଜ୍ୟୋତି ପ୍ରସାଦଙ୍କ ଭାଇ ପ୍ରଶାନ୍ତ ସେଠ୍ ତାଙ୍କୁ ମନା କରିବାକୁ ଆସୁଥିବା ବେଳେ କୃଷ୍ଣଚନ୍ଦ୍ର ତାଙ୍କୁ ଧାରୁଆ ଛୁରୀରେ ଆକ୍ରମଣ କରିଥିଲେ । ଆକ୍ରମଣରୁ ବର୍ତ୍ତିବାକୁ ଯାଇ ତାଙ୍କର ହାତରେ କ୍ଷତ ହୋଇଥଲା । ଏନେଇ ଟାଉନ ଥାନାରେ ଲିଖିତ ଅଭିଯୋଗ ହେବା ପରେ ବୁଧବାର ଟାଉନ ପୁଲିସ ତାକୁ ଗିରଫ କରି କୋର୍ଟ ଚାଲାଣ କରିଥିବା ସୂଚନା ରହିଛି ।