centurian jitm

ମର୍ମନ୍ତୁଦ ସଡ଼କ ଦୁର୍ଘଟଣା : ୧ ମୃତ୍ୟୁ ,୧ ଗୁରୁତର

ଭୋଗରାଇ : ବାଲେଶ୍ଵର-ଜଳେଶ୍ୱର ୬୦ ନଂ ଜାତୀୟ ରାଜପଥରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିଲା ବେଳେ ଅନ୍ୟ ଜଣେ ଗୁରୁତର ଆହତ ହୋଇଥିବା ଜଣାପଡିଛି । ମୃତ ବ୍ୟକ୍ତି ଜଣକ ହେଲେ ଭୋଗରାଇ ବ୍ଲକର ତାଳସାରି ସାମୁଦ୍ରିକ ଥାନା ଅନ୍ତର୍ଗତ ବାଜିତପୁର ଗାଁର ସ୍ୱର୍ଗତ କାଳିଚରଣ ପ୍ରଧାନଙ୍କ ପୁଅ ସୁରେନ୍ଦ୍ର ପ୍ରଧାନ(୫୯) । ଗୁରୁତର ଆହତ ଜଣକ ହେଲେ ମୃତକଙ୍କ ସମ୍ପର୍କୀୟ ପୁତୁରା ସେହି ଗାଁର ସ୍ୱର୍ଗତ ଯତୀନ୍ଦ୍ର ପାତ୍ରଙ୍କ ପୁଅ ନବୀନ ପାତ୍ର(୪୮) ।

ସୂଚନା ଅନୁସାରେ ସୁରେନ୍ଦ୍ର ଓ ନବୀନ ସୋମବାର ଅପରାହ୍ନରେ ବାଲେଶ୍ଵରରୁ ଏକ ଟ୍ରାନ୍ସଫର୍ମର ମରାମତି କରି ବାଲେଶ୍ଵର-ଜଳେଶ୍ୱର ୬୦ ନମ୍ବର ଜାତୀୟ ରାଜପଥ ଦେଇ ଚନ୍ଦନେଶ୍ୱର ଅଭିମୁଖେ ଏକ ଟାଟା ଏସ୍‌ସିଇ (ଡବ୍ଲୁବି-୩୫-୧୪୬୧) ଗାଡ଼ିରେ ଘରକୁ ଫେରୁଥିଲେ । ୬୦ ନଂ ଜାତୀୟ ରାଜପଥର ଜଳେଶ୍ୱରରେ ପୂର୍ବରୁ ମଧୁବନ ହୋଟେଲ ସମ୍ମୁଖରେ ଏକ ଟ୍ରକ ଦ୍ରୁତ ଗତିରେ ଆସି ଟାଟା ଏସ୍‌ସିଇ ଗାଡିକୁ ପଛରୁ ଧକ୍କା ଦେଇଥିଲା । ଫଳରେ ଟାଟା ଏସ୍‌ସିଇ ଗାଡ଼ିରେ ବସିଥିବା ମଉସା ଓ ପୁତୁରା ଉଭୟେ ଗାଡ଼ି ଭିତରୁ କିଛି ଦୂରକୁ ଛିଟିକି ପଡ଼ିଥିଲେ । ଘଟଣାସ୍ଥଳରେ ମଉସା ସୁରେନ୍ଦ୍ରଙ୍କ ମୃତ୍ୟୁ ହୋଇଥିଲା ବେଳେ ପୁତୁରା ନବୀନ ଗୁରୁତର ଆହତ ହୋଇଥିଲେ । ସ୍ଥାନୀୟ ଲୋକେ ଉଭୟଙ୍କୁ ଏକ ଘରୋଇ ଆମ୍ବୁଲାନ୍ସ ଯୋଗେ ଜଳେଶ୍ୱର ଜିକେ ଭଟ୍ଟର ହସ୍ପିଟାଲକୁ ନେଇଥିଲେ । ସେଠାରେ ଡାକ୍ତର ସୁରେନ୍ଦ୍ରଙ୍କୁ ମୃତ ଘୋଷଣା କରିବା ସହିତ ନବୀନଙ୍କୁ ଚିକିତ୍ସା କରିଥିଲେ । ଖବର ପାଇ ଜଳେଶ୍ୱର ପୁଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିଥିଲା । ତେବେ ନବୀନଙ୍କ ଲିଖିତ ଅଭିଯୋଗ ଅନୁସାରେ ଜଳେଶ୍ଵର ଥାନା ପୁଲିସ ଏକ ମାମଲା ରୁଜୁ କରିଥିବା ଜଣାପଡ଼ିଛି ।

Leave A Reply

Your email address will not be published.