ଜାମଗାଁ : ୪୯ ନମ୍ବର ଜାତୀୟ ରାଜପଥ କୁହାକୁଣ୍ଡା ଛକରେ ଆଜି ଏକ ମର୍ମନ୍ତୁଦ ଦୁର୍ଘଟଣା ଘଟିଥିବା ଜଣାପଡିଛି । ଦୁର୍ଘଟଣାରେ ସ୍ତ୍ରୀର ମୃତ୍ୟୁ ହୋଇଥିବା ବେଳେ ସ୍ୱାମୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଲଖନପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ସୂଚନାନୁଯାୟୀ, ମଙ୍ଗଳବାର ପୂର୍ବାହ୍ନ ପ୍ରାୟ ୧୧ଟା ବେଳେ ବାଦୀମାଲ ପଞ୍ଚାୟତ ବଡ଼ଧରା ଗ୍ରାମର ଛବିଲ ଭୋଇ(୩୮ ବର୍ଷ) ଓ ତାଙ୍କ ସ୍ତ୍ରୀ ଜୟନ୍ତୀ ଭୋଇ (୩୨ ବର୍ଷ) ସିଜି ୧୩ ଏଏଲ ୧୯୯୮ ନମ୍ବର ବିଶିଷ୍ଟ ଏକ ବାଇକ୍ ଯୋଗେ ଛତିଶଗଡ଼ ରାୟଗଡ ଜିଲ୍ଲା ଅନ୍ତର୍ଗତ ବେନ୍ଦେରାଚୁଆଁ ଗ୍ରାମରେ ମନ୍ଦିର ପ୍ରତିଷ୍ଠା ଉତ୍ସବ ଦେଖିବା ପାଇଁ ଘରୁ ବାହାରି ଥିଲେ । ସେମାନେ କନକତୋରା ବାଲାଜୀ ପେଟ୍ରୋଲ ପମ୍ପରେ ଗାଡିରେ ତେଲ ପକାଇ ଯାଉଥିବା ବେଳେ କୁହାକୁଣ୍ଡା ଛକରେ ଝାରସୁଗୁଡା ପଟୁ ଯାଉଥିବା ଏକ ଅଜଣା ଗାଡ଼ି ତାଙ୍କୁ ଧକ୍କା ମାରି ଫେରାର ହୋଇଯାଇଛି । ଫଳରେ ଘଟଣାସ୍ଥଳରେ ସ୍ତ୍ରୀ ଜୟନ୍ତୀଙ୍କ ମୃତ୍ୟୁ ହୋଇଥିବା ବେଳେ ସ୍ୱାମୀ ଛବିଲ ଗୁରୁତର ଆହତ ହୋଇଛନ୍ତି । ତାଙ୍କୁ ଆମ୍ବୁଲାନ୍ସ ଯୋଗେ ଲଖନପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆ ଯାଇଥିବା ରେଙ୍ଗାଲି ଥାନା ଅଧିକାରୀ କ୍ରେସେନସିଆ ସାମେରିଆ ସୂଚନା ଦେଇଛନ୍ତି ।