ଜୁନାଗଡ଼ : କଳାହାଣ୍ଡି ଜିଲ୍ଲା ଜୁନାଗଡ଼ ଥାନା ଅନ୍ତର୍ଗତ ୨୬ନଂ ଜାତୀୟ ରାଜପଥ ସ୍ଥିତ ଡୁମେରବାହାଲ ଛକ ନିକଟରେ ଏକ ଏସ୍ୟୁଭି ଗାଡି ( ନଂ ଓଡି୦୩ଡି-୦୦୦୯ ) ଧକ୍କାରେ ବାଇକ୍ ଚାଳକଙ୍କ ମୃତ୍ୟୁ ହୋଇଥିବା ଜଣାପଡିଛି । ସୂଚନା ଅନୁସାରେ, ମୃତ ବ୍ୟକ୍ତି ଜଣକ ହେଲେ ଦାସିଗାଁର ପ୍ରଦୀପ ନେଗୀ । ସେ ପରିବାର ସହ ଜୁନାଗଡ଼ ଲାକ୍ଷ୍ମୀସାଗରପଡାରେ ରହୁଥିଲେ । ମଙ୍ଗଳବାର ସଂଧ୍ୟା ପ୍ରାୟ ୭ଟାରେ ତାଙ୍କ ଝିଅଙ୍କୁ କଲେଜରେ ଛାଡି ଘରକୁ ଫେରୁଥିବା ବେଳେ ଦୃତ ଗତିରେ ଆସୁଥିବା ଏସ୍ୟୁଭି ଗାଡ଼ି ବାଇକ୍କୁ ଧକ୍କା ଦେଇ ଫେରାର ହୋଇଯାଇଥିଲା । ପ୍ରଦୀପଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା । ଏସଂକ୍ରାନ୍ତରେ ଜୁନାଗଡ଼ ଥାନାରେ ଏକ ମାମଲା ରୁଜୁ ହୋଇଥିବା ବେଳେ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଥିବା ଥାନା ଅଧିକାରୀ ଉତ୍ତମ ସାହୁ କହିଛନ୍ତି । ଅପରପକ୍ଷେ ଦୁର୍ଘଟଣା ଘଟାଇଥିବା ଫେରାର ଗାଡ଼ିକୁ ସ୍ଥାନୀୟ ଲୋକେ ପିଛା କରି ଭବାନୀପାଟଣା ଠାରେ କାବୁ କରିଥିଲେ । ଗାଡ଼ି ଚାଳକକୁ ଉତ୍ତ୍ୟକ୍ତ ହୋଇ ଉତ୍ତମ ମଧ୍ୟମ ଦେବା ସହ ଗାଡ଼ି ଭଙ୍ଗାରୁଜା କରିଥିବା ଜଣାପଡିଛି । ଭବାନୀପାଟଣା ଟାଉନ ପୁଲିସ୍ ଖବର ପାଇ ଗାଡି ଜବତ କରିବା ସହ ଚାଳକଙ୍କୁ ଥାନାରେ ଅଟକ ରଖିଥିବା ଜଣାପଡିଛି ।