ପଦ୍ମପୁର, (ନିରୋଜ କୁମାର ପାଣୀ) : ଗନ୍ଧମାର୍ଦ୍ଦନ ପର୍ବତମାଳାରେ ବିଜେ ପ୍ରତ୍ୟକ୍ଷ ଠାକୁରାଣୀ ଦୂର୍ଗତି ନାଶିନୀ ମାଁ ଦୁର୍ଗେଇ ଦେବୀଙ୍କ ଯାତ୍ରା ୨ ଦିନ ଧରି ମହା ସମାରୋହରେ ପାଳନ ହୋଇଯାଇଛି । ତ୍ରୟୋଦଶ ଶତାବ୍ଦୀରୁ ମାଁ ଦୁର୍ଗେଇ ଦେବୀ ଭାବରେ ପୂଜାପାଇ ଆସୁଛନ୍ତି । ମନଭଙ୍ଗ ଗାଁ ଗୌନ୍ତିଆଙ୍କୁ ଦେବୀ ସ୍ୱପ୍ନାଦେଶ ହୋଇଥିଲା । ତେଣୁ ପାଞ୍ଚପାଲି ମୌଜା ଅଞ୍ଚଳକୁ ନେଇ ବେଶ ପୂଜାର୍ଚ୍ଚନା କରାଯାଇ ଯାତ୍ରା ହୋଇଆସୁଛି । ପୁରାଣ ପ୍ରସିଦ୍ଧ ଗନ୍ଧମାର୍ଦ୍ଧନ ପର୍ବତମାଳାର ଗୋଟିଏ ପାଶ୍ୱର୍ରେ ପ୍ରଭୁ ନୃସିଂହନାଥ ଠାକୁର ଓ ଅନ୍ୟ ପାଶ୍ୱର୍ରେ ବାବା ହରିଶଙ୍କର ରହିଛନ୍ତି । ଗନ୍ଧମାର୍ଦ୍ଦନ ପାଦଦେଶରେ ଶ୍ରେଷ୍ଠ ଦେବୀ ମାଁଦୁର୍ଗା ଭକ୍ତମାନଙ୍କୁ ସୁରକ୍ଷା ଦେଇଆସୁଛନ୍ତି । ବିପଦ ସମୟରେ ଅଧିଆ ପଡ଼ିଥିବା ଶ୍ରଦ୍ଧାଳୁଙ୍କ ମନସ୍କାମନା ପୂର୍ଣ୍ଣ କରିବା ପରେ ଭକ୍ତମାନେ ମାଁଙ୍କୁ ବଳି ଭୋଗ ଦେଇଥାନ୍ତି । ଏହି ପରମ୍ପରା ବହୁ ପୁରାତନ କାଳରୁ ଚାଳି ଆସୁଛି । ଏହି ଦୁର୍ଗେଇ ଖୋଲ ପର୍ବତମାଳା ପାଇକମାଲ ବ୍ଲକ ମିଠାପାଲ ପଞ୍ଚାୟତ ମନଭଙ୍ଗ ଗାଁରୁ ମାଁଙ୍କୁ ପୀଠ ଆସିବାକୁ ପ୍ରାୟ ୩ କିଲୋମିଟର ବଣ ପାହାଡ ଘେରା ଦୁଗର୍ମ ରାସ୍ତା ଅତିକ୍ରମ କରି ଦୁର୍ଗେଇ ଦେବୀଙ୍କ ପୀଠକୁ ଶ୍ରଦ୍ଧାଳୁ ଭକ୍ତମାନେ ଆସିଥାନ୍ତି । ମାର୍ଗଶିର ମାସ ପୂର୍ଣ୍ଣମୀ ତିଥିରେ ଦେବୀଙ୍କ ପୂଜା ପାଇଁ ଝାଙ୍କର ଘରୁ ମାଁଙ୍କର ପୂଜା ସାମଗ୍ରୀ, ଅଳଙ୍କାର ଝାମ୍ପିରେ ଅଣାଯାଇ ଦୁର୍ଗେଇ ଦେବୀଙ୍କୁ ଅର୍ପଣ କରାଯାଏ । ସକାଳରୁ ମାଁଙ୍କ ପୂଜାର୍ଚ୍ଚନା ଆରମ୍ଭ ହୋଇ ରାତ୍ରି ପ୍ରାୟ ୧୨ଟାରେ ବଳି ଭୋଗ ପ୍ରଦାନ କରାଯାଇଥାଏ । ବହୁ ଶ୍ରଦ୍ଧାଳୁ ଭକ୍ତଙ୍କର ମନସ୍କାମନା ପୂର୍ଣ୍ଣ ହୋଇଥିବାରୁ ଅଞ୍ଚଳର ଲୋକମାନଙ୍କ ସହିତ ବରଗଡ, ସମ୍ବଲପୁର, ନୂଆପଡା, ବଲାଙ୍ଗିର, ପାଟଣାଗଡ, ସୋନପୁର, ପଦ୍ମପୁର, ପାଇକମାଲ, ଝାରବନ୍ଧ ସମେତ ଛତିଶଗଡ ରାଜ୍ୟର ଶ୍ରଦ୍ଧାଳୁ ଭକ୍ତଙ୍କ ସମାଗମ ହୋଇଥାଏ । ଭକ୍ତମାନଙ୍କ ମନୋରଞ୍ଜନ ସକାଶେ କେଶଳୀ କବି ସମ୍ମିଳନୀ ଓ ସମ୍ବଲପୁରୀ ମାଁ କାମନୀ ଦଣ୍ଡ ନୃତ୍ୟ ଅନୁଷ୍ଠିତ ହୋଇଥିଲା । ଏହି ପୂଜାକୁ ସୁପରିଚାଳନା ପାଇଁ ମାଁ ଦୁର୍ଗେଇ ଦେବୀଙ୍କ ପୂଜା ପରିଚାଳନା କମିଟି ସଭାପତି ମଧୁସୂଦନ ପାଣ୍ତେ, ଉପ ସଭାପତି ପୂର୍ଣ୍ଣଚନ୍ଦ୍ର ମଲ୍ଲିକ, ସଂପାଦକ ବେଣୁଧର ମଲ୍ଲିକ, ସହ ସମ୍ପାଦକ ତ୍ରିନାଥ ମଲ୍ଲିକ, କୋଷାଧ୍ୟକ୍ଷ ହିରଣ୍ୟ ମଲ୍ଲିକ, ମୁଖ୍ୟ ପୂଜକ ସୁବାଷ ମଲ୍ଲିକ, ପୂଜକ ସଚ୍ଚିଦାନନ୍ଦ ମଲ୍ଲିକ, ତ୍ରିନାଥ ମଲ୍ଲିକ, ମହେନ୍ଦ୍ର ମଲ୍ଲିକ, ପ୍ରଦୀପ ମଲ୍ଲିକ ମୁଖ୍ୟ ଦେହୁରୀ ରଣଜିତ ମଲ୍ଲିକ ମୁଖ୍ୟ ଭୂମିକା ମନଭଙ୍ଗ ଗୌନ୍ତିଆ ଅନନ୍ତ ରାମ ମଲ୍ଲିକ, ନାରାୟଣ ମଲ୍ଲିକ, ବାବୁଲାଲ ମଲ୍ଲିକ, ପାନାଲାଲ ସେଠ୍ଙ୍କ ସମେତ ସ୍ୱେଚ୍ଛାସେବୀଙ୍କ କଠିନ ପରିଶ୍ରମ ଫଳରେ ମାଁ ଦୁର୍ଗେଇ ଦେବୀଙ୍କ ପୀଠ ଯାତ୍ରା ସୂଚାରୁ ରୂପେ ସମ୍ପାଦନ ହୋଇଥାଏ । ଏଣୁ ଜନସାଧାରଣଙ୍କ ସୁବିଧା ଦୃଷ୍ଟିରୁ ଦୁର୍ଗେଇ ଖୋଲ ଯିବାକୁ ପାହାଚ ଓ ଆଲୋକ କରଣ କରିବାକୁ ଦୁର୍ଗେଇ ଦେବୀଙ୍କ ପୂଜା ପରିଚାଳନା କମିଟି ଆୟୋଜକ ମଧୁସୂଦନ ପାଣ୍ତେ ନିବେଦନ କରିଛନ୍ତି ।
