ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ପବିତ୍ର ଦୀପାବଳି ଅବସରରେ ସମଗ୍ର ଡେଲାଙ୍ଗ ଅଞ୍ଚଳରେ ଆନନ୍ଦ ଉତ୍ସାହର ସହିତ ଆଲୋକର ପର୍ବ ଦୀପାବଳି ପାଳିତ ହୋଇଯାଇଛି । ଏହି ଦିନ ବଡବଡୁଆ ତଥା ପିତୃ ପୁରୁଷଙ୍କ ଉଦ୍ଦ୍ୟେଶରେ ରାତିରେ ଦୀପଦାନ ଉତ୍ସବ ପାଳନ ହୁଏ । ପିଣ୍ଡଦାନ ସହିତ ଜ୍ୱଳନ୍ତ ବଳିତା, କାଉଁରିଆ କାଠି ଜାଳି ପିତୃପୁରୁଷଙ୍କୁ ଆଲୋକ ପ୍ରଦର୍ଶନ କରିଥାନ୍ତି । ସେହି ସମୟରେ ଲୋକମାନେ ଉଚ୍ଚ ସ୍ଵରରେ କହିଥାନ୍ତି, ‘ବଡ଼ ବଡୁଆ ହୋ, ଅନ୍ଧାରରେ ଆସି ଆଲୁଅରେ ଯାଅ, ଗଙ୍ଗା ଯାଅ, ଗୟା ଯାଅ, କାଶୀ ଯାଅ ! ପୁରୁଷୋତମରେ ମହାପ୍ରସାଦ ଖାଇ ବାଇଶ ପାହାଚରେ ଗଡ ଗଡଉ ଥାଅ’ ! ମହାଳୟା ତିଥିରେ ପିତୃପୁରୁଷଙ୍କୁ ଆବାହନ କରି ଶ୍ରାଦ୍ଧ ଦିଆଯାଇଥିବା ବେଳେ ଦୀପାବଳି ତିଥିରେ ଆଲୋକ ଦେଖାଇ ବିଦାୟ ଦିଆଯାଏ । ଏଥି ସହିତ ଛୋଟରୁ ବଡ଼ ସମସ୍ତେ ବାଣ ଫୁଟେଇବା ସହ ଦୀପଜାଳି ରଙ୍ଗବେରଙ୍ଗର ଆଲୋକରେ ସୁସଜ୍ଜିତ କରି ଉତ୍ସାହ ସହିତ ଆଲୋକର ପର୍ବ ଦୀପାବଳି ପାଳନ କରିଛନ୍ତି ।