ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଉପଖଣ୍ଡ ଜମଲା ପଞ୍ଚାୟତ ସରକାରୀ ଉଚ୍ଚ ବିଦ୍ୟାଳୟରେ ସଂସ୍କୃତ ଶିକ୍ଷକ ବିଶ୍ୱଜିତ ଟପ୍ନୋଙ୍କ ବିୟୋଗର ଦଶମ ଦିନ ତଥା ଦଶାହ କାର୍ଯ୍ୟ ଦିବସରେ, ବିଦ୍ୟାଳୟର ପ୍ରଧାନ ଶିକ୍ଷକ ଜିତେନ୍ଦ୍ର କୁମାର ପଣ୍ଡାଙ୍କ ଅଧକ୍ଷ୍ୟତାରେ ଶୋକ ଦିବସ ପାଳିତ ହୋଇଯାଇଛି । ବିଶ୍ୱଜିତ ଟପ୍ନୋ ସୁନ୍ଦରଗଡ ଜିଲ୍ଲାର ସାଙ୍କୋବାହାଲ ଗ୍ରାମର ଅଧିବାସୀ ଅଟନ୍ତି । ଗତ ତା ୦୨/୦୮/୨୦୨୨ରୁ ଏହି ବିଦ୍ୟାଳୟରେ କାର୍ଯ୍ୟରତ ଥିଲେ । ଗତ ୧୩/୦୩/୨୦୨୫ରେ ନିଜ ଗ୍ରାମକୁ ବାଇକ ଯୋଗେ ଯାଉଥିବା ସମୟରେ ଗୋଟିଏ ଯାତ୍ରୀବାହୀ ବସ ସହ ମୁହାଁମୁହିଁ ଧକ୍କା ହୋଇ ମୃତ୍ୟୁବରଣ କରିଥିଲେ । ସେ ଜଣେ ଛାତ୍ରବତ୍ସଲ, ମିଷ୍ଟଭାଷୀ, ସମୟାନୁବର୍ତ୍ତୀ ଓ କର୍ତ୍ତବ୍ୟପରାୟଣ ଶିକ୍ଷକ ହୋଇଥିବାରୁ ତାଙ୍କର ବିୟୋଗରେ ଶିକ୍ଷକ, ଅଭିଭାବକ, ଛାତ୍ରଛାତ୍ରୀ ତଥା ଗ୍ରାମବାସୀଙ୍କ ମନରେ ଗଭୀର ଶୋକଛାୟା ଖେଲି ଯାଇଥିଲା । ପ୍ରଥମେ ତାଙ୍କର ଫଟୋଚିତ୍ରରେ ମାଲ୍ୟାର୍ପଣ କରାଯାଇଥିଲା । ଶିକ୍ଷକ୍ଷର୍ଥୀମାନେ ବହୁ କଷ୍ଟରେ କୋହ ସମ୍ଭାଳି ତାଙ୍କର ଅଭିଭାଷଣ ରଖିଥିଲେ । ତାଙ୍କର ସ୍ଵର୍ଗାରୋହଣ ବିଦ୍ୟାଳୟ ପାଇଁ ଏକ ଅପୂରଣୀୟ କ୍ଷତି ବୋଲି ପ୍ରଧାନ ଶିକ୍ଷକ ତାଙ୍କ ଅଭିଭାଷଣରେ ମତ ରଖିଥିଲେ । ସେ ଶିଖାଇ ଯାଇଥିବା ଗୁଣକୁ ପିଲାମାନେ ଜୀବନରେ ପ୍ରୟୋଗ କଲେ ତାଙ୍କ ପାଇଁ ଗଭୀର ଶ୍ରଦ୍ଧାଞ୍ଜଳି ହେବ ବୋଲି କହି ସଭା ସାଙ୍ଗ କରାଯାଇଥିଲା ।