ବଲାଙ୍ଗିର, (ଦେବାଶିଷ ମିଶ୍ର) : ପୁଇଁନ୍ତଲା ବ୍ଲକ ଅନ୍ତର୍ଗତ ପାଙ୍କେଲବାହାଲ ଧନୁଯାତ୍ରା ମହୋତ୍ସବ ୨୦୧୭ ମସିହାରୁ ଆରମ୍ଭ ହୋଇଥିଲା । ପ୍ରତିବର୍ଷ ପରି ଏହି ବର୍ଷ ୨୧.୦୧.୨୦୨୪ରୁ ତା.୨୫.୦୧.୨୦୨୪ ପୌଷ ପୂର୍ଣ୍ଣିମା ପର୍ଯ୍ୟନ୍ତ ଚାଲିବ । କିନ୍ତୁ ଧନୁଯାତ୍ରା ଉତ୍ସବ ନାମରେ ରାହାଜାନୀ, ଡକାୟତି ଏହି ସମୟରେ ବୃଦ୍ଧି ପାଉଥିବାରୁ ଏହି ଅଞ୍ଚଳର କିଛି ସଚେତନ ନାଗରିକ ଏହାକୁ ବିରୋଧ କରି ନିକଟସ୍ଥ ଥାନା ଏବଂ ଜିଲ୍ଲା ପ୍ରଶାସନ ଅଧିକାରୀ ବଲାଙ୍ଗିରକୁ ଏ ବିଷୟରେ ଅବଗତ କରାଇଛନ୍ତି । ୫ ଦଫା ଦାବି ସମ୍ମଳିତ ଦାବିପତ୍ରରେ ଏହି ଅଂଚଳର ଧନୁଯାତ୍ରା ଜନିତ ବିଭିନ୍ନ ଅସୁବିଧା ସମ୍ବନ୍ଧରେ ଜଣାଇଛନ୍ତି । ଅବୈଧ କମିଟି, ଅସମାଜିକତ୍ୱ, ବେଆଇନ ଶବ୍ଦ ପ୍ରଦୂଷଣ, ଚୋରୀ ଡକାୟତି ରାହା ଜାନି, ମଦଭାଟି ତଥା ଗ୍ରାମବାସୀଙ୍କୁ ଜୋର ଜବରଦସ୍ତି ଚାନ୍ଦା ଅସୁଲି ଆଦି ପ୍ରସଙ୍ଗ କରି ଗ୍ରାମବାସୀ ପ୍ରଶାସନକୁ ଜଣାଇଛନ୍ତି । ଏହା ବ୍ୟତୀତ ଗାଁରେ ଗାଁ କମିଟିକୁ କେନ୍ଦ୍ର କରି ଝଗଡା ନିକଟସ୍ତ ଥାନାର ଦ୍ୱାରସ୍ତ ହୋଇଛି । ଏଣୁ ଏ ବିଷୟରେ ଜିଲ୍ଲା ପ୍ରଶାସନ ତୁରନ୍ତ ଧ୍ୟାନ ଦେବାକୁ ଗ୍ରାମବାସୀ ଦାବି ଜଣାଇଛନ୍ତି ।