ଦେଓଗାଁ, (ମନୀଷ କୁମାର ସାହୁ) : ଜଣେ ବୃଦ୍ଧା ଜଙ୍ଗଲକୁ ଶାଳ କାଠି ଭାଙ୍ଗିବାକୁ ଯାଇଥିବା ବେଳେ ତାଙ୍କୁ ହାତୀ ଆକ୍ରମଣ କରିବାରୁ ଘଟଣା ସ୍ଥଳରେ ମୃତ୍ୟୁବରଣ କରିଥିବା ଜଣାପଡ଼ିଛି । ତେବେ ବଲାଙ୍ଗିର ବନାଞ୍ଚଳ ଅନ୍ତର୍ଗତ ଆଠଗାଁ ଫରେଷ୍ଟ ସେକ୍ସନର ଉପରଝର-ଆଠଗାଁ ରାସ୍ତା ଉପରେ ଥିବା ମାଙ୍କରଚୁଆଁ ଗାଁରେ ଏହି ଘଟଣାଟି ଘଟିଥିବା ବେଳେ ହାତୀ ଆକ୍ରମଣରେ ମୃତ୍ୟୁବରଣ କରିଥିବା ମହିଳା ଜଣକ ଆଠଗାଁର ପ୍ରେମଲତା ନନ୍ଦ ବୋଲି ଜଣାପଡିଛି । ମିଳିଥିବା ସୂଚନା ଅନସୁାରେ ପ୍ରେମଲତା ଶନିବାର ସକାଳେ ଘରୁ ବାହାରି ରେଙ୍ଗାଲ ପତ୍ର ଓ ଦାନ୍ତ ଘଷିବା କାଠି ଭାଙ୍ଗିବାକୁ ମାଙ୍କରଚୁଆଁ ଜଙ୍ଗଲକୁ ଯାଇଥିଲେ । କିନ୍ତୁ ସନ୍ଧ୍ୟା ପର୍ଯ୍ୟନ୍ତ ସେ ଆଉ ଘରକୁ ଫେରି ନଥିଲେ । ପରିବାର ଲୋକଙ୍କ ସହ ସ୍ଥାନୀୟ ଲୋକେ ବହୁ ଖୋଜାଖୋଜି କରିବା ପରେ ମଧ୍ୟ ପାଇନଥିଲେ । ଆଜି ସକାଳୁ ଜଙ୍ଗଲ ଭିତରେ ଜଣେ ମହିଳାଙ୍କ ମୃତଦେହ ପଡ଼ିଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ଉକ୍ତ ମୃତଦେହଟି ଆଠଗାଁର ନିଖୋଜ ଥିବା ପ୍ରେମଲତା ନନ୍ଦଙ୍କ ବୋଲି ଜଣାପଡ଼ିଛି । ବୃଦ୍ଧା ଜଣଙ୍କୁ ହାତୀ ଦଳି ଚକଟି ମାରି ଦେଇଛି ବୋଲି ସ୍ଥାନୀୟ ଲୋକେ କହୁଥିବା ବେଳେ ଖବର ପାଇ ବନ ବିଭାଗ ଓ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡ଼ିଛି । ଅନ୍ୟପଟେ ବନବିଭାଗ ତରଫରୁ ମୃତକ ପରିବାରଙ୍କୁ ୬ ଲକ୍ଷ ଟଙ୍କା ଅନୁକମ୍ପା ରାଶି ଘୋଷଣା କରଯାଇଥିବା ବେଳେ ପ୍ରଥମେ ୬୦,୦୦୦ ରାଶି ପ୍ରଦାନ କରାଯିବା ସହ ଅନ୍ତିମ ସତ୍କାର ପାଇଁ ଆଜି ୧୦,୦୦୦ ଟଙ୍କା ଦିଆଯିବ ବୋଲି ସଦର ରେଞ୍ଜର କେଶବ କିଶୋର ନାୟକ ସୂଚନା ଦେଇଛନ୍ତି ।