ଟ୍ରାଙ୍କୁଲାଇଜ୍‌ ହୋଇ ବୌଦ୍ଧରୁ ଆସିଥିବା ଦନ୍ତା ହାତୀ ଆଖି ବୁଜିଲା

ଢେଙ୍କାନାଳ : ବୌଦ୍ଧରୁ ଉଦ୍ଧାର ହୋଇ କପିଳାସ ହାତୀ ସଂରକ୍ଷଣ କେନ୍ଦ୍ରକୁ ଆସିଥିବା ଦନ୍ତା ହାତୀର ମୃତ୍ୟୁ ହୋଇଥିବା ଖବର ମିଳିଛି । ଆଜି ଭୋର ସମୟରେ ଆଖି ବୁଜିଲା ବୌଦ୍ଧରେ ଆତଙ୍କ ଖେଳାଇଥିବା ଦନ୍ତା । ବନ ବିଭାଗ ଘଟଣାସ୍ଥଳରେ ପହଞ୍ଚ ତଦନ୍ତ କରୁଛି । ଖବର ଅନୁଯାୟୀ, ଶନିବାର ବୌଦ୍ଧରୁ ସ୍ୱତନ୍ତ୍ର ଗାଡ଼ିରେ ଏହି ଦନ୍ତାକୁ କପିଳାସ ଅଣାଯାଇଥିଲା । ସେଠାରେ ପହଞ୍ଚିବା ପରେ ତାର ପ୍ରାଥମିକ ଚିକିତ୍ସା କରାଯାଇଥିଲା । କିଛି ଦିନ ହେଲା ବୌଦ୍ଧରେ ଆତଙ୍କ ସୃଷ୍ଟି କରିବା ପରେ ଟ୍ରାଙ୍କୁଲାଇଜ୍‌ କରି ହାତୀକୁ କାବୁ କରାଯାଇଥିଲା । ଏହା ପରେ ଢେଙ୍କାନାଳ କପିଳାସ ସ୍ଥିତ ହାତୀ ଉଦ୍ଧାର କେନ୍ଦ୍ରକୁ ନିଆଯାଇଥିଲା । ହାତୀ ମୃତ୍ୟୁର ସଠିକ କାରଣ କ’ଣ ଜଣାପଡିନାହିଁ । ତେବେ ମୃତ ହାତୀର ଶବ ବ୍ୟବଚ୍ଛେଦ କରାଯିବା ସହ ସ୍ୱତନ୍ତ୍ର ଏକ ଟିମ ମାଧ୍ୟମରେ ଯାଞ୍ଚ କରାଯିବ ବୋଲି ଢେଙ୍କାନାଳ ଡିଏଫ୍‌ଓ ସୂଚନା ଦେଇଛନ୍ତି ।