ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଅଞ୍ଚଳବାସୀ ଦୀର୍ଘ ଦିନ ଧରି ଆନ୍ଦୋଳନ କରି ଚାଲିଥିବା ବେଳେ ଗତ ଉପନିର୍ବାଚନ ସମୟରେ ମୁଖ୍ୟମନ୍ତ୍ରୀ ପଦ୍ମପୁରବାସୀଙ୍କ ଇଚ୍ଛା ସାକାର ହେବ ବୋଲି ନିର୍ବାଚନ ସଭାରେ ଘୋଷଣା କରିଥିଲେ । ଗତ ଉପନିର୍ବାଚନ ସମୟରେ ୨୦୨୩ ଡିସେମ୍ବର ୩୧ସୁଦ୍ଧା ପଦ୍ମପୁରକୁ ଜିଲ୍ଲା ଘୋଷଣା କରିବା ପାଇଁ ଦୃଢ଼ ପ୍ରତିଶ୍ରୁତି ଦେଇଥିଲେ ଅଥଚ ୨୦୨୪ ଜାନୁୟାରୀ ପର୍ଯ୍ୟନ୍ତ ଜିଲ୍ଲା ଘୋଷଣା ହୋଇ ନ ଥିବାରୁ ପୁଣି ଥରେ ଆନ୍ଦୋଳନ ମୁଣ୍ଡ ଟେକିଛି । ଗତ ଫେବୃୟାରୀ ୧ ତାରିଖରୁ ପଦ୍ମପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଆରମ୍ଭ ହୋଇଛି । ଗତ ୫ ତାରିଖ ଶେଷ ବିଧାନସଭାକୁ ଆଖି ଆଗରେ ରଖି ୫ ତାରିଖ ଦିନ ପଦ୍ମପୁରର ସମସ୍ତ ସରକାରୀ ଅଫିସ୍ ଗୁଡିକକୁ ବନ୍ଦ କରି ପ୍ରତିବାଦ କରିଥିଲେ । ଗତ ୧ ତାରିଖ ଦିନଠାରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ବିଭିନ୍ନ ସଂଗଠନ, କ୍ଲବ ଓ ବିଭିନ୍ନ ସମାଜ ତରଫରୁ ଗଣଧାରଣାକୁ ସମର୍ଥନ ଜଣାଇ ଗଣ ଧାରଣାରେ ଅଂଶଗ୍ରହଣ କରୁଛନ୍ତି । ଆଜି ଗଣଧାରଣାକୁ ୨୩ ଦିନ ପୁରଣ ହେଲା । ଆଜି ପଦ୍ମପୁର ଜିଲ୍ଲା ଦାବି ମିଳିତ କ୍ରିୟାନୁଷ୍ଠାନ କମିଟି ତରଫରୁ ଗୋରୁବଜାର ଠାରେ ଏକ ସମାବେଶ ଆୟୋଜିତ ହୋଇଯାଇଛି । କ୍ରିୟାନୁଷ୍ଠାନ କମିଟିର ଆବାହକ ତଥା ଆଇନଜୀବୀ ସନ୍ତୋଷ କୁମାର ଶତପଥିଙ୍କ ସଭାପତିତ୍ୱରେ ଅନୁଷ୍ଠିତ ସମାବେଶରେ ପଦ୍ମପୁର ନିର୍ବାଚନ ମଣ୍ଡଳୀର ପୂର୍ବତନ କଂଗ୍ରେସ ବିଧାୟକ ସତ୍ୟଭୂଷଣ ସାହୁ, ବିଜେପିର ପୂର୍ବତନ ବିଧାୟକ ପ୍ରଦୀପ ପୁରୋହିତ, ବରିଷ୍ଠ ଆଇନଜୀବି ଗୌନ୍ତିଆ କୁମାର ସାହୁ, ସଂଯୋଜକ ଅଜିତ କୁମାର ଶତପଥି ଓକିଲ ସଙ୍ଘର ସଦସ୍ୟ, ବଣିକ ସଂଘର ସଭାପତି ପ୍ରତାପ ମିଶ୍ର, ଟାଉନ୍ କ୍ଲବ ସଭାପତି ତଥା ବିଜେପିର ଯୁବନେତା ପ୍ରିତେଶ ବହିଦାର ପ୍ରମୁଖଙ୍କ ସମେତ ପଦ୍ମପୁର, ପାଇକମାଲ, ଝାରବନ୍ଧ ଓ ଗାଇସିଲେଟ ଅଂଚଳର ଜନସାଧାରଣ ଯୋଗଦାନ ଚରିଥିଲେ । ଅନିର୍ଦ୍ଧିଷ୍ଟ କାଳ ପାଇଁ ଚାଲୁଥିବା ଏହି ଗଣଧାରଣାରେ ପ୍ରତ୍ୟେକ ଦିନ ଗୋଟିଏ ଲେଖାଏଁ ସଂଗଠନ ଧାରଣା ଦେବେ ବୋଲି ପଦ୍ମପୁର ଜିଲ୍ଲା ଦାବି ମିଳିତ କ୍ରିୟାନୁଷ୍ଠାନ କମିଟିର ଆବାହକ ତଥା ଓକିଲ ସଙ୍ଘ ସଭାପତି ସନ୍ତୋଷ ଶତପଥି ସୂଚନା ଦେଇଥିବା ବେଳେ ଦାବି ପୁରଣ ପର୍ଯ୍ୟନ୍ତ ଗଣଧାରଣା ବଳବର୍ତ୍ତର ରହିଥିବ ବୋଲି ମଧ୍ୟ ସୂଚନା ଦେଇଛନ୍ତି ।