ବଲାଙ୍ଗିର, (ଦେବାଶିଷ ମିଶ୍ର) : ଆଜି ଭୀମ ଭୋଇ ମେଡିକାଲ କଲେଜର ବାର୍ଷିକୋତ୍ସୋବରେ ସମ୍ମାନିତ ଅତିଥି ରୂପେ ଯୋଗ ଦେଇଥିଲେ ବଲାଙ୍ଗିର ବିଧାୟକ ନରସିଂହ ମିଶ୍ର । ଏହି ଅବସରରେ ସେ ଭୀମ ଭୋଇ ମେଡିକାଲରେ ପିଜି ପାଠ୍ୟକ୍ରମ ଆରମ୍ଭ କରିବା ସହିତ ଡାକ୍ତରଖାନାରେ ସୁପର ସ୍ପେସିଆଲିଟି ଡାକ୍ତର ପଦ ପୁରଣ କରିବା ପାଇଁ ନିଜ ବକ୍ତବ୍ୟରେ ଦାବୀ ଉପସ୍ଥାପନ କରିଥିଲେ । ପ୍ରକାଶ ଯେ, ବଲାଙ୍ଗିର ମେଡିକାଲରେ ସୁପର ସ୍ପେସିଆଲିଟି ପଦ ପାଇଁ ବହୁ ଦିନ ହେଲା ଦାବୀ ହୋଇ ଆସୁଥିଲା । କିନ୍ତୁ ସୁପର ସ୍ପେସିଆଲିଟି ପଦବୀ ପାଇଁ ଉକ୍ତ କଲେଜରେ ପିଜି ପାଠ୍ୟକ୍ରମର ବ୍ୟବସ୍ଥା ନିହାତି ରହିଥିବା ନେଇ ସରକାରୀ ନିୟମ ରହିଛି । ଯଦ୍ୱାରା ବାରମ୍ବାର ଦାବୀ ସତ୍ୱେ ବଲାଙ୍ଗିରରେ ସୁପର ସ୍ପେସିଆଲିଟି ପଦ ପୁରଣ ହୋଇପାରୁ ନଥିଲା । ଏବେ ବଲାଙ୍ଗିର ଭୀମ ଭୋଇ ମେଡିକାଲ ନିଜର ପାଞ୍ଚ ବର୍ଷ ପୂର୍ତ୍ତି କରିବା ସହ ଏଠାରେ ପିଜି ଡିପ୍ଲୋମା କୋର୍ସ ଆରମ୍ଭ ହୋଇଛି । ଏଠାରେ ବିଧିବଦ୍ଧ ପିଜି କୋର୍ସ ଆରମ୍ଭ ହେଲେ ସରକାରୀ ନିୟମ ମୁତାବକ ମେଡିକାଲରେ ସୁପର ସ୍ପେସିଆଲିଟି ପଦ ପୁରଣ ହୋଇ ପାରିବ ବୋଲି ଶ୍ରୀ ମିଶ୍ର ପ୍ରକାଶ କରିଛନ୍ତି ।