ଖପ୍ରାଖୋଲ, (ଅଶୋକ କୁମାର ବାଗ) : ସ୍କାଏ ଲାଇଟ୍ ଦେଇ ଭିତରେ ପଶିଲା ଚୋର । ଆରାମର ସହ ସାମଗ୍ରୀ ଧରି ଫେରାର୍ ମାରିଲା ଚୋର । ଅଭିନବ ଉପାୟରେ ଏପରି ଚୋରି ଗତରାତିରେ ଖପ୍ରାଖୋଲ ବଜାର ମଧ୍ୟରେ ହୋଇଥିବା ବେଳେ ଏହା ଏବେ ପୋଲିସ ପାଇଁ ନୂଆ ଚ୍ୟାଲେଞ୍ଜ ଛିଡ଼ା କରିଛି । ସୂଚନା ଅନୁଯାୟୀ ସୋମବାର ରାତି ୨ଟା ସମୟରେ ଖପ୍ରାଖୋଲ ଭାରତ ପେଟ୍ରୋଲିୟମ ନିକଟରେ ଥିବା ଇ-କାର୍ଟ ଗୋଡାଉନ କାର୍ଯ୍ୟାଳୟରୁ ହଜାର ହଜାର ଟଙ୍କାର ସାମଗ୍ରୀ ଚୋରି ହୋଇଥିବା ଖପ୍ରାଖୋଲ ଥାନାରେ ଲିଖିତ ଅଭିଯୋଗ ହୋଇଛି । ସ୍କାଏ ଲାଇଟ୍ ଦେଇ ଭିତରକୁ ପଶି ଗୋଡାଉନ୍ ଭିତରେ ଥିବା ହଜାର ହଜାର ଟଙ୍କାର ସାମଗ୍ରୀ ଦୁର୍ବୃତ୍ତ ଚୋରି କରି ନେଇଥିବା ସିସିଟିଭିରେ ନଜର ଗୋଚର ହୋଇଛି । ଯେଉଁ ସ୍କାଏ ଲାଇଟ୍ ଦେଇ ଚୋର ଭିତରକୁ ପଶିଥିଲା, ସେହି ସ୍କାଏ ଲାଇଟ୍ ଦେଇ ବାହାରି ଯାଇଥିଲା । ଘଟଣାସ୍ଥଳରେ ଖପ୍ରାଖୋଲ ପୋଲିସ ପହଞ୍ଚି ତଦନ୍ତ ପ୍ରକ୍ରିୟା ଆରମ୍ଭ କରିଛନ୍ତି । ଏନେଇ ବଲାଙ୍ଗିରରୁ ସାଇଣ୍ଟିଫିକ୍ ଟିମ୍ ଏବଂ କେ-୯ ସ୍କ୍ୱାଡ଼ ସ୍ୱାନ ପେନି ଘଟଣାର ଟିକିନିଖି ଯାଞ୍ଚ କରିଥିବା ଜଣାପଡିଛି । ଏନେଇ ଖପ୍ରାଖୋଲ ଥାନାରେ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ କରୁଥିବା ଖପ୍ରାଖୋଲ ଥାନାଧିକାରୀ ନରେନ୍ଦ୍ର ଛତ୍ର ପ୍ରକାଶ କରିଛନ୍ତି ।