ଦେଓଗାଁ, (ମନୀଷ କୁମାର ସାହୁ) : ଦେଓଗାଁ ବ୍ଲକ ରାମଚନ୍ଦ୍ରପୁର ପଲ୍ଲିଶ୍ରୀ ହାଇସ୍କୁଲ ପଡ଼ିଆରେ ରାମଚନ୍ଦ୍ରପୁରର ସତ୍ୟସାଇ କ୍ରିକେଟ କ୍ଲବ ଆନୁକୂଲ୍ୟରେ ପ୍ରଥମ କୃପା ଷାଣ୍ଢ ମେମୋରିଆଲ କ୍ରିକେଟ ପ୍ରତିଯୋଗିତା ଉଦ୍ଯାପିତ ହୋଇଯାଇଛି । ଫାଇନାଲ ମ୍ୟାଚ ବାଲିପଟା ଓ ମାଟୁପାଲି ମଧ୍ୟରେ ଅନୁଷ୍ଠିତ ହୋଇଥିଲା । ଏହି ମ୍ୟାଚରେ ବାଲିପଟା ଦଳ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୭ ଓଭରରେ ୯୨ ରନ ସଂଗ୍ରହ କରିଥିବା ବେଳେ ମାଟୁପାଲି ଦଳକୁ ୮୯ରନ୍ ସଂଗ୍ରହରେ ରୋକିବା ପରେ ବାଲିପଟା ଦଳ ଚାମ୍ପିଅନ ହୋଇଥିଲା । ମାଟୁପାଲି ଦଳର ଫକିର ବୁଡେକ ଫାଇନାଲ ମ୍ୟାଚର ଶ୍ରେଷ୍ଠ ଖେଳାଳି ବିବେଚିତ ହୋଇଥିବା ବେଳେ ବାଲିପଟା ଦଳର ଆକାଶ ଚନ୍ଦନ ପ୍ରତିଯୋଗିତାର ଶ୍ରେଷ୍ଠ ଖେଳାଳୀ ବିବେଚିତ ହୋଇଥିଲେ । ଫାଇନାଲ୍ ମ୍ୟାଚରେ ମୁଖ୍ୟ ଅତିଥି ଭାବରେ ଦେଓଗାଁ ବ୍ଲକର ପୂର୍ବତନ ବିଇଓ ସଂକୀର୍ତ୍ତନ ବାଗ ଓ ପୂର୍ବତନ ଆର୍ପିଏସ୍ଏଫ୍ ସ୍ୱର୍ଗତ କୃପା ଷାଣ୍ଢଙ୍କ ବାପା ଭୀମ ଷାଣ୍ଢ, ସମ୍ମାନିତ ଅତିଥି ଭାବରେ ରାମଚନ୍ଦ୍ରପୁରର ଶ୍ରୀ ସତ୍ୟସାଇ କ୍ରିକେଟ କ୍ଲବର ସମ୍ପାଦକ ରାଜେନ୍ଦ୍ର ଷାଣ୍ଢ ଯୋଗଦେଇ ପୁରସ୍କାର ବିତରଣ କରିଥିଲେ । ଖେଳ ପରିଚାଳନାରେ ଚନ୍ଦ୍ର ଶେଖର ବାଗ, ଶିବାଶଙ୍କର ବାଗ, ସୁରେନ୍ଦ୍ର ଚନ୍ଦନ, ପଦ୍ମଲୋଚନ ନନ୍ଦ, ମୁନୁ ମହାକୁର, ବରୁଣ ବାଗ, ସୁଦର୍ଶନ ଜାଲ, ଗୋପାଳ ଭୁଏ, ପିଣ୍ଟୁ ବକୁଳ, ମଧୁସୂଦନ ପାତ୍ର, କାଂହା ବାଗ, ଶିବାଶଙ୍କର ବାଗ, ନୃପା ଷାଣ୍ଢ, ଲାଲୁପ୍ରସାଦ ଷାଣ୍ଢ, ତ୍ରିଲୋଚନ ପାତ୍ର, ସୁରେନ୍ଦ୍ର ଷାଣ୍ଢ, ରାଜେନ୍ଦ୍ର ଷାଣ୍ଢ, ରଞ୍ଜନ ବାଗ, ନନ୍ଦରାଜ ନନ୍ଦ, ସୁଶାନ୍ତ ବାଗ, ନୃପା ବାଗ ପ୍ରମୁଖ ସହଯୋଗ କରିଥିଲେ ।