ମୁନିଗୁଡ଼ା, (ରମାକାନ୍ତ ପଡାଲ) : ପ୍ରତିବର୍ଷ ଭଳି ଲୁକ୍କାୟିତ ପ୍ରତିଭା ଲୋକଲୋଚନକୁ ଆଣିବାକୁ ହେଉଥିବା ଚଇତି ଉତ୍ସବ ଏହି ବର୍ଷ ମଧ୍ୟ ଅତି ଧୁମ୍ଧାମ୍ରେ ପାଳନ କରାଯାଉଛି । ଜିଲ୍ଲା ସ୍ତରୀୟ ଲୋକ ମହୋତ୍ସବ ଚଇତି-୨୦୨୪ ପୂର୍ବରୁ ଚନ୍ଦ୍ରପୁର ବ୍ଲକ ସ୍ତରୀୟ ଚଇତି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଚନ୍ଦ୍ରପୁର ଗ୍ରାମଦେବୀଙ୍କ ମନ୍ଦିରରୁ ପବିତ୍ର କଳସ ପୂଜନ ପରେ ମାଆଙ୍କ ଅଖଣ୍ଡ ଜ୍ୟୋତି ମଶାଲରେ ଅଣାଯାଇ ଚଇତି ମଣ୍ଡପରେ ରଖାଯାଇ ଶୁଭାରମ୍ଭ କରାଯାଇଥିଲା । ପରେ ପରେ ଗୁଣୁପୁର ବିଧାୟକ ସତ୍ୟଜିତ ଗମାଙ୍ଗ ପ୍ରଦୀପ ପ୍ରଜ୍ୱଳନ କରି ଚଇତି ଉତ୍ସବକୁ ଆନୁଷ୍ଠାନିକ ଭାବେ ଶୁଭାରମ୍ଭ କରିଛନ୍ତି । ଶେଷରେ କଳାକାର, କ୍ରୀଡାବିତ ଓ ବିଶିଷ୍ଟ ବ୍ୟକ୍ତି ବିଶେଷଙ୍କୁ ସମ୍ମାନିତ କରାଯାଇଥିଲା । ଏହି କାର୍ଯ୍ୟକ୍ରମରେ ବେସରକାରୀ ସଂସ୍ଥା ତରଫରୁ ଷ୍ଟଲ୍ ମାଧ୍ୟମରେ ମାଣ୍ଡିଆରେ ପ୍ରସ୍ତୁତ ଫୁଡ ଫେଷ୍ଟିଭାଲ ଦ୍ୱାରା ଲୋକଙ୍କୁ ସଚେତନ କରାଯାଇଥିଲା ।