ସାନଖେମୁଣ୍ଡି : ମେକ୍ସ ପିକଅପ୍ ଭ୍ୟାନ୍ରେ ଚୋରା କାଠ ଚାଲାଣ ବେଳେ ବନବିଭାଗର ଚଢ଼ାଉ । ଗଂଜାମ ଜିଲ୍ଲା ଭଂଜନଗର ଦକ୍ଷିଣ ଘୁମୁସର ବନଖଣ୍ଡର ମୋବାଇଲ୍ ଟିମ୍, ଆସିକା ବନାଞ୍ଚଳ ଅନ୍ତର୍ଗତ କଇଁଫୁଲିଆ ଛକ ଠାରେ ଏହି ଚଢ଼ାଉ କରିଥିଲା । ଘଟଣା ସ୍ଥଳରୁ ପିକଅପ୍ ଭ୍ୟାନ୍ ସହ ପ୍ରାୟ ୬୦ ହଜାର ଟଙ୍କାରୁ ଅଧିକ ମୂଲ୍ୟର ଶାଳ କାଠ ଜବତ କରି ୩ ଚାଲାଣକାରୀଙ୍କୁ ଗିରଫ କରିଥିଲା ବନବିଭାଗ ଟିମ୍ । ବଡଗଡ ଥାନା ଅନ୍ତର୍ଗତ ଗାଙ୍ଗପୁର ଅଞ୍ଚଳରୁ ବାହାରି କବିସୂର୍ଯ୍ୟନଗର ଅଭିମୁଖେ ଚୋରାକାଠ ଚାଲାଣ ହେଉଥିବା ସୂଚନା ପାଇ ଆସିକା କଇଁଫୁଲିଆ ଛକ ଠାରେ ଜଗି ରହିଥିଲେ ମୋବାଇଲ୍ ଟିମ୍ । ବିଭିନ୍ନ ସମୟରେ କାଠ ମାଫିଆ ମାନେ ବନବିଭାଗ ଆଖିରେ ଧୂଳି ଦେଇ ଚୋରା କାଠ ଚାଲାଣ କରୁଥିବା ବେଳେ ବିଭାଗ ପକ୍ଷରୁ ତାହାକୁ ଗୁରୁତ୍ୱ ଦେଇ ଚଢ଼ାଉ ଆରମ୍ଭ ହୋଇଛି ।