ତୁରେକେଲା, (ପିତାମ୍ବର ଦୀପ) : ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ବ୍ଲକ ବେଲପଡ଼ା ଗ୍ରାମ ପଞ୍ଚାୟତ ଅନ୍ତର୍ଗତ ଧାନ ସଂଗ୍ରହ ମଣ୍ଡିରେ ଦଲାଲଙ୍କ ରାଜ ଚାଲିଥିବା ଅଭିଯୋଗ ଆସିଛି । ଯାହା ସ୍ଥାନୀୟ ଚାଷୀଙ୍କୁ ଘୋର ଅସୁବିଧାର ସମ୍ମୁଖୀନ କରୁଛି । ଅଭିଯୋଗ ଅନୁଯାୟୀ, ଚାଷୀମାନେ ଡିସେମ୍ବର ମାସରୁ ମଣ୍ଡିରେ ସେମାନଙ୍କର ଅମଳ ହୋଇଥିବା ଧାନ ସହିତ ଅପେକ୍ଷା କରିଛନ୍ତି, କିନ୍ତୁ କେବଳ ଦଲାଲଙ୍କ ଦ୍ୱାରା ଯୋଗାଣ କରାଯାଇଥିବା ଧାନ କ୍ରୟ କରାଯାଉଛି ବୋଲି ଅଭିଯୋଗ ହୋଇଛି । ପ୍ରକୃତ ଚାଷୀମାନେ ଦାବି କରିଛନ୍ତି ଯେ, ଦୀର୍ଘ ସମୟ ଅପେକ୍ଷା ସତ୍ତ୍ୱେ, ସେମାନଙ୍କର ଉତ୍ପାଦିତ ଧାନ କିଣାଯାଉନାହିଁ, କିନ୍ତୁ
ଦଲାଲ ମାନେ ସୁରୁଖୁରୁରେ ଧାନ ବିକ୍ରି କରୁଛନ୍ତି । ଚାଷୀମାନେ ଆହୁରି ଅଭିଯୋଗ କରିଛନ୍ତି ଯେ, ଏବେ ମଧ୍ୟ ମଣ୍ଡିରେ ୭,୦୦୦ କ୍ୱିଣ୍ଟାଲରୁ ଅଧିକ ଧାନ ବିକ୍ରୟ ନ ହୋଇ ପଡ଼ି ରହିଛି । ଏହି ବିଷୟ ନେଇ ବିଜେଡ଼ି ନେତା ଅଜିତ ଯୋଶୀ ଚାଷୀ ମାନଙ୍କ ସହ ମିଶି ବେଲପଡ଼ା ସ୍ଥିତ ମଣ୍ଡିରେ କ୍ଷତିଗ୍ରସ୍ତ ଚାଷୀମାନେ ସ୍ୱଚ୍ଛ କ୍ରୟ ସୁନିଶ୍ଚିତ କରିବା, ମଧ୍ୟସ୍ଥିଙ୍କ ହସ୍ତକ୍ଷେପ ରୋକିବା ଏବଂ ପ୍ରକୃତ ଚାଷୀଙ୍କ ସ୍ୱାର୍ଥ ରକ୍ଷା କରିବା ପାଇଁ ଜିଲ୍ଲା ପ୍ରଶାସନର ତୁରନ୍ତ ହସ୍ତକ୍ଷେପ ଦାବି କରିଛନ୍ତି ।