ବରଗଡ ଆଇଆଇଏଚ୍ଟି ଡିପ୍ଲୋମା ପାଠ୍ୟକ୍ରମକୁ ସ୍ନାତକ କରିବା ସହ ବରଗଡ ବାଲିଜୋରି ବଜାରର ବିକାଶ କଥା ଲୋକସଭାରେ ଉଠାଇଲେ ବରଗଡ ସାଂସଦ
ବରଗଡ, (ନିରୋଜ କୁମାର ପାଣୀ) : ଆଜି ଲୋକସଭାର ଶୀତକାଳୀନ ଅଧିବେଶନ ସମୟରେ ୩୭୭ ଧାରା ଅଧିନିୟମ ଆଧାରରେ ବରଗଡ ଲୋକସଭା ସାଂସଦ ପ୍ରଦୀପ ପୁରୋହିତ ବରଗଡରେ କେନ୍ଦ୍ର ସରକାରଙ୍କ ଦ୍ୱାରା ପ୍ରତିଷ୍ଠିତ ହୋଇଥିବା ଭାରତୀୟ ହସ୍ତତନ୍ତ ବୟନ ଶିଳ୍ପ ଓ ଡିପ୍ଲୋମା ପାଠ୍ୟକ୍ରମରେ ସ୍ନାତକ ପାଠ୍ୟକ୍ରମ ଯୋଡିବା ସହ ବରଗଡ – ବରପାଲି ଜାତୀୟ ରାଜପଥ ନିକଟରେ ଅବସ୍ଥିତ ବାଲିଜୋରି ସମ୍ବଲପୁରୀ କପଡା ବଜାରକୁ ଉନ୍ନତ ମାନର ବଜାର ସ୍ଥାପିତ କରିବା ପାଇଁ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି । ସାଂସଦ ପ୍ରଦୀପ ପୁରୋହିତ ତାଙ୍କ ଦାବୀରେ ଉଲ୍ଲେଖ କରିଛନ୍ତି ଯେ, ସନ୍ତୋଷ ଗଙ୍ଗାୱାରଜୀ ଯେତେ ବେଳେ କେନ୍ଦ୍ର ସରକାରଙ୍କ ବୟନ ଶିଳ୍ପ ବିଭାଗର ମନ୍ତ୍ରୀ ଥିଲେ, ୨୦୧୫ ମସିହାରେ ବରଗଡ ଜିଲ୍ଲା ଗସ୍ତରେ ଆସିଥିବା ସମୟରେ ବରଗଡ ଆଇଆଇଏଚ୍ଟିକୁ ସ୍ନାତକ ଡିଗ୍ରୀରେ ଅପଗ୍ରେଡ କରିବା ପାଇଁ ଘୋଷଣା କରିଥିଲେ । ସମ୍ବଲପୁରୀ ହେଣ୍ତ୍ଲୁମ୍ ପଶ୍ଚିମ ଓଡ଼ିଶାର ୧୧ଟି ଜିଲ୍ଲାରେ ବିସ୍ତାରିତ ଥିବା କାରଣରୁ ଏହାଦ୍ୱାରା ଅନେକ ବୁଣାକାର ଲାଭାନ୍ୱିତ ହେବେ । ସାଂସଦ ଶ୍ରୀ ପୁରୋହିତ ବରଗଡର ବାଲିଜୋରି ବଜାର ଉପରେ କିଭଳି ୧୧ଟି ଜିଲ୍ଲାର ବୁଣାକାର ନିର୍ଭର କରୁଛନ୍ତି ଓ ଓଡିଶା ତଥା ଓଡିଶା ବାହାରର ଗ୍ରାହକ ଓ ବ୍ୟବସାୟୀ ମାନେ ଏହି ବଜାର ଉପରେ ନିର୍ଭର କରୁଥିବା ଦର୍ଶାଇ ଏହି ବଜାରର ସାମଗ୍ରୀକ ବିକାଶ ପାଇଁ ମଧ୍ୟ ସାଂସଦ ଶ୍ରୀ ପୁରୋହିତ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି ।