ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ମାଁ ତାରାତାରିଣୀଙ୍କ ବହୁ ପ୍ରତିକ୍ଷିତ ଚୈତ୍ରପର୍ବ ଯାତ୍ରା ୨୦୨୫ ତୃତୀୟ ପାଳିର ମଙ୍ଗଳବାର ଇତି ମଧ୍ୟରେ ଶାନ୍ତି ଶୃଙ୍ଖଳାର ସହ ଖୁବ ସୁରୁଖୁରେ ସମ୍ପନ୍ନ ହୋଇଯାଇଛି । ଏ ବର୍ଷ ପ୍ରଥମ କରି ଦୁଇ ଜାଗାରେ ଖୋଲା ଯାଇଥିବା ଅନ୍ନଯଜ୍ଞରେ ସକାଳ ୭ ଘଟିକା ଠାରୁ ସଂଧ୍ୟା ୫ ଘଟିକା ଯାଏଁ ପ୍ରାୟ ୩୦ ହଜାର ଶ୍ରଦ୍ଧାଳୁ ପ୍ରସାଦ ସେବନ କରିଥିଲେ । ସେହିପରି ଚାରି ଜାଗାରେ ଖୋଲା ଯାଇଥିବା ମଣ୍ଡନ ସ୍ଥଳରେ ରାତି ଦୁଇ ଘଣ୍ଟିକାଠାରୁ ସଂଧ୍ୟା ଯାଏଁ ୬୪୦୦ ପିଲାଙ୍କ ମଣ୍ଡନ ହୋଇଥିଲା । ବସ୍ ଯୋଗେ ୧୨ ହଜାର ଯାତ୍ରୀ ଏବଂ ରୋପ୍ ୱେ ଯୋଗେ ୧୩୦୦ ଯାତ୍ରୀ ପୂର୍ଣ୍ଣଗିରି ପାହାଡ ଉପରକୁ ଯାଇ ମାଁ ସରସ୍ୱତୀ ବେଶରେ ସଜ୍ଜିତ ମାଁ ତାରା ତାରିଣୀଙ୍କୁ ଦର୍ଶନ କରିଥିଲେ । ବହୁ ଭକ୍ତ, ଯାତ୍ରୀ ଶହଶହ ସଂଖ୍ୟାରେ ୯୯୯ ପଥର ପାହାଚ ଦେଇ ଯାତାୟତ କରୁଥିବା ଲକ୍ଷ୍ୟ କରାଯାଇଥିଲା । ମନ୍ଦିର ଉତ୍ତର ପାଶ୍ୱର୍ନିରୁପମା ହୋଟେଲ ନିକଟ ଏବଂ ଦକ୍ଷିଣ ପାଶ୍ୱର୍ ଉଡା ଜାହାଜ ପଡିଆରେ ସ୍ଥାନୀୟ ପଞ୍ଚାୟତ ପକ୍ଷରୁ ଖୋଲାଯାଇଥିବା ଅସ୍ଥାୟୀ ଯାନ ବାହନ ରହଣୀ ସ୍ଥଳରେ ହଜାର ହଜାର ବସ୍, କାର୍, ମଟରସାଇକେଲ, ଅଟୋରିକ୍ସା, ପାର୍କିଂ ହୋଇଥିଲା । ପୂର୍ବାଗ୍ନ ଘ.୦୩.୩୦ ମି. ରେ ମନ୍ଦିର ଖୋଲାଯାଇ ରିତିନୀତି ସହ ଆଳତୀ ହେବା ପରେ ସର୍ବ ସାଧାରଣ ଦର୍ଶନ ନିମନ୍ତେ ଦ୍ୱାର ଫିଟାଯାଇଥିଲା । ରାଜ୍ୟ ସରକାରଙ୍କ ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ ପ୍ରତି ବର୍ଷ ଭଳି ଏବର୍ଷ ମଧ୍ୟ ଆଳତୀ ଦର୍ଶ କରିଥିଲେ । କବି ସୂର୍ଯ୍ୟ ନଗର ମାନ୍ୟବର ବିଧାୟକ ପ୍ରତାପ ଚନ୍ଦ୍ର ନାୟକ ଏଠାରେ ଆୟୋଜିତ ବିଶ୍ୱଶାନ୍ତି ସପ୍ତସତୀ ଚଣ୍ଡୀ ମହାଯଜ୍ଞରେ ଅଂଶ ଗ୍ରହଣ କରିଥିଲେ । ବାଣିଜ୍ୟ ଓ ପରିବହନ, ଖଣି ଓ ଇସ୍ପାତ ବିଭାଗୀୟ ମାନ୍ୟବର ମନ୍ତ୍ରୀ ବିଭୂତି ଭୂଷଣ ଜେନା, ଖଲ୍ଲିକୋଟ ମାନ୍ୟବର ବିଧାୟକ ପୂର୍ଣ୍ଣ ଚନ୍ଦ୍ର ସେଠୀ ପ୍ରମୁଖ ମାଆଙ୍କୁ ଦର୍ଶନ କରି ଏଠାରେ ଯାତ୍ରା ପାଇଁ ହୋଇଥିବା ଆୟୋଜନ ବୁଲି ଦେଖିଥିଲେ । ପରେପରେ ଅନ୍ନଯଜ୍ଞ ପ୍ରସ୍ତୁତି ସମୀକ୍ଷା କରିଥିଲେ । ସୋମବାର ରାତିରେ ଜିଲ୍ଲା ସଂସ୍କୃତି ପରିଷଦ ପକ୍ଷରୁ ପାହାଡ ପାଦ ଦେଶରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଗଞ୍ଜାମ ଜିଲ୍ଲା ପ୍ରଶାସନ, ପୀଠମନ୍ଦିର ପ୍ରଶାସନ ଏବଂ ପୋଲିସ ପ୍ରଶାସନ ପକ୍ଷରୁ ବେଶ୍ ସୁପରିଚାଳନା କରାଯାଇଥିବା ନେଇ ମନ୍ତ୍ରୀ ବିଭୂତି ଭୂଷଣ ଜେନା ସନ୍ତୋଷ ପ୍ରକାଶ କରିଛନ୍ତି ।