କଟକ : କଟକ ଜିଲ୍ଲା ଜଗତପୁର ଖଇରା ପୋଲ ନିକଟରେ ଏକ ଟ୍ରକ୍ ଭାରସାମ୍ୟ ହରାଇ ୫ଟି ବାଇକ୍ ଓ ୨ଟି କାର୍ ଉପରେ ଚଢି ଯାଇଥିବା ଜଣାପଡିଛି । ଫଳରେ ଜଣଙ୍କର ମୃତ୍ୟୁ ଘଟିଥିବା ବେଳେ ୬ ଜଣ ଆହତ ହୋଇଛନ୍ତି । ସୂଚନା ଅନୁସାରେ, ମୃତକ ଜଣକ ସେଠିକାର ଫଳ ଦୋକାନୀ ଓ ତାଙ୍କ ନାମ ସୁବାସ ସାହୁ । ସାଲେପୁର-ଖଇରା ରାସ୍ତା ଏକ ଜନଗହଳି ପୂର୍ଣ୍ଣ ସ୍ଥାନ । ସନ୍ଧ୍ୟାରେ ଖଇରା ପୋଲ ନିକଟରେ ଭିଡ ଲାଗି ରହିଥିଲା । ଏହି ସମୟରେ ଗୋଟିଏ ଟ୍ରକ୍ ଦ୍ରୁତଗତିରେ ଆସି ରାସ୍ତା କଡରେ ଥିବା ବାଇକ୍ ଓ କାର୍କୁ ଧକ୍କା ଦେଇଥିଲା । ଧକ୍କା ଏତେ ଜୋର ଥିଲା ଯେ, ଗାଡ଼ିଗୁଡ଼ିକ ସହ ଟ୍ରକ୍ ଫଳ ଦୋକାନ ଭିତରକୁ ପଶି ଯାଇଥିଲା । ତେଣୁ ବାଇକ୍ ଉପରେ ଓ କାର୍ ଭିତରେ ଥିବା ଲୋକଙ୍କ ସହ ପାଖରେ ଛିଡ଼ା ହୋଇଥିବା ଲୋକେ ଓ ଦୋକାନୀମାନେ ଆହତ ହୋଇଥିଲେ । ଖବର ପାଇ ଜଗତପୁର ଥାନା ପୁଲିସ ଘଟଣା ସ୍ଥଳରେ ପହଞ୍ଚି ଆହତମାନଙ୍କୁ କଟକ ବଡ ମେଡିକାଲକୁ ପଠାଯାଇଛି । ଦୁର୍ଘଟଣା ପରେ ଟ୍ରକ୍ ଡ୍ରାଇଭର ଫେରାର ହୋଇଯାଇଥିବା ଜଣାପଡିଛି ।