ଘଟଗାଁ : ଆସନ୍ତା ୮ ତାରିଖ ମଙ୍ଗଳବାର କେତୁ ଗ୍ରସ୍ତ ଗ୍ରସ୍ତୋଦୟ ଚନ୍ଦ୍ରଗ୍ରହଣ ସଂଘଠିତ ହେବ । ଏଣୁ ଏହି ସମୟରେ ଦେବାଳୟ ଗୁଡିକରେ ଦେବନୀତି ବନ୍ଦ ରହିବାର ବିଧି ରହିଛି । ଏହାକୁ ଦୃଷ୍ଟିରେ ରଖି ଘଟଗାଁ ସ୍ଥିତ ମା’ ତାରିଣୀ ମନ୍ଦିର ନୀତିକାନ୍ତି ଜନସାଧାରଣଙ୍କ ଅବଗତି ନିମନ୍ତେ ସୂଚିତ କରାଯାଇଛି ।
ସୋମବାର ରାତି ୩ଟାରୁ ୫ଟା ମଧ୍ୟରେ ମା’ଙ୍କ ସମସ୍ତ ପୂଜା ବିଧି ସମ୍ପନ୍ନ କରାଯିବା ପରେ ମନ୍ଦିର ବନ୍ଦ ରହିବ । ୭ ତାରିଖ ମଙ୍ଗଳବାର ଭୋର ୫ ଘଟିକାର ୫୦ ମିନିଟ୍ ଠାରୁ ୮ ତାରିଖ ସନ୍ଧ୍ୟା ୬. ୨୧ ପର୍ଯ୍ୟନ୍ତ ପାକତ୍ୟାଗ, ଦେବନୀତି ଓ ଅନ୍ନଭୋଜନ ନିଷେଧ କରାଯାଇଛି । ୮ ତାରିଖ ମଙ୍ଗଳବାର ଦିନ ବେଳା ମା’ ତାରିଣୀ ମନ୍ଦିର, ଦୁଆରଶୁଣୀ ମନ୍ଦିର ଓ ଶିବ ମନ୍ଦିର ସମ୍ପୂର୍ଣ୍ଣ ବନ୍ଦ ରହିବ । ଏହି ଦିନ ସନ୍ଧ୍ୟା ୬ଟା ୨୧ ମିନିଟ୍ ପରେ ଯଥାରୀତି ଦେବ ନୀତି ଓ ପୂଜା କାର୍ଯ୍ୟ ସଂପାଦନ ହେବ । ଏଣୁ ଭକ୍ତ ବୃନ୍ଦ ଏଥିରେ ସହଯୋଗ କରିବାକୁ ମା’ ତାରିଣୀ ମନ୍ଦିର ତରଫରୁ କାର୍ଯ୍ୟନିର୍ବାହୀ ଅଧିକାରୀ ସଂଜୀବ ମହାପାତ୍ର ଏହି ସୂଚନା କରିଛନ୍ତି ।