ତୁରେକେଲା, (ପିତାମ୍ବର ଦୀପ) : କଣ୍ଟାବାଞ୍ଜି ମାଟିର୍ ମହୋତ୍ସବ କମିଟିର ଏକ ବୈଠକ ସ୍ଥାନୀୟ ହରି ଭବନ ଠାରେ ସନ୍ଧ୍ୟା ୭ଟାରେ ଆୟୋଜିତ ହୋଇଯାଇଛି । କମିଟିର ଆବାହକ ପୁଷ୍ପକେତୁ ବେହେରାଙ୍କ ଆବାହକତ୍ୱରେ ଅନୁଷ୍ଠିତ ହୋଇଥିବା ବୈଠକରେ କଣ୍ଟାବାଞ୍ଜି ବିଧାୟକ ତଥା କଣ୍ଟାବାଞ୍ଜି ମାଟିର୍ ମହୋତ୍ସବ କମିଟିର ଅଧ୍ୟକ୍ଷ ଲକ୍ଷ୍ମଣ ବାଗ ସଭାପତିତ୍ୱ କରିଥିଲେ । ଆଗାମୀ ମାର୍ଚ୍ଚ ମାସ ୧୧ ତାରିଖରୁ ଆରମ୍ଭ ହେବାକୁ ଥିବା ୩ ଦିନିଆ ଏହି ମହୋତ୍ସବ ପାଇଁ କଣ ସବୁ କାର୍ଯ୍ୟପନ୍ଥା ହାତକୁ ନିଆଯିବ ସେନେଇ ଆଜିର ବୈଠକରେ ଆଲୋଚନା ହୋଇଥିଲା । କାର୍ଯ୍ୟକ୍ରମକୁ କମିଟିର ସହ ସଂଯୋଜକ ଦିନେଶ ମହାନନ୍ଦ ପରିଚାଳନା କରିଥିବା ବେଳେ ସମ୍ପାଦକ ମନୋଜ ଦାସ କଣ ସବୁ କାର୍ଯ୍ୟ ଆଜି ପର୍ଯ୍ୟନ୍ତ କରାଯାଇଛି ସେ ଉପରେ ଆଲୋକପାତ କରିଥିଲେ । ସଭାପତି ବ୍ରଜଶ୍ୟାମ ଗୁରୁ ମାଟିର୍ ମହୋତ୍ସବକୁ କିଭଳି ଭାବେ ସଫଳ କରାଯିବ ସେନେଇ ସ୍ୱତନ୍ତ୍ର ଟିମ ଗଠନ କରି ଅଂଚଳରେ ଥିବା କଳାକାର ମାନଙ୍କୁ ଚଳିତ ବର୍ଷ ସ୍ଥାନ ଓ ଗୁରୁତ୍ୱ ଅଧିକ ଦିଆଯିବ ବୋଲି କହିବା ସହ ରାଜ୍ୟ ତଥା ରାଜ୍ୟ ବାହାରୁ ଆସିବାକୁ ଥିବା ସେଂସ୍କୃତିକ ଦଳକୁ ଯଥେଷ୍ଟ ସଂମାନ ଦିଆଯିବ ବୋଲି କହିଥିଲେ । ସେହିପରି ଅଧକ୍ଷ ଶ୍ରୀ ବାଗ କହିଛନ୍ତି ଯେ ଚଳିତ ବର୍ଷର କଣ୍ଟାବାଞ୍ଜି ମାଟିର୍ ମହୋତ୍ସବ ଧୁମଧାମରେ ଓ ଜୋରଦାର ଭାବେ ଆୟୋଜନ ହେବ । ମୋର ପକ୍ଷରୁ ଯାହା ସହଯୋଗ ହେବ ମୁଁ କରିବି ବୋଲି ପ୍ରତିଶ୍ରୁତି ଦେଇଥିଲେ । ସେହିପରି କମିଟିର ଅନେକ ସଦସ୍ୟ ଏହି ବୈଠକରେ ନିଜ ନିଜର ମତ ରଖି ମହୋତ୍ସବକୁ ସଫଳ କରିବାକୁ ଆହ୍ୱାନ ଦେଇଛନ୍ତି । ପରେ କମିଟିର ସହ ସମ୍ପାଦକ ତୁଳସୀରାମ ଜଗତ ଧନ୍ୟବାଦ ଦେଇଥିଲେ । ଆଜିର କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଉପ ସଭାପତି କୈଳାଶ ଦୀପ, ସଂଜୟ ଗାନ୍ଧୀ, ସନ୍ତୋଷ ଅଗ୍ରୱାଲ ପ୍ରମୁଖ ମଞ୍ଚାସୀନ ଥିବା ବେଳେ କମିଟିର ସମସ୍ତେ ଉପସ୍ଥିତ ଥିଲେ ।