- ମନମୁଖୀ ନିଷ୍ପତ୍ତି ଯୋଗୁଁ ସରପଞ୍ଚମାନଙ୍କ ମଧ୍ୟରେ ଅସନ୍ତୋଷ, ସଂଘ ଭାଙ୍ଗିବା ନେଇ ଚର୍ଚ୍ଚା
- ସଂଘ ଭାଙ୍ଗି ନାହିଁ ଅଧିକ ସକ୍ରିୟ ହେବ : ସଭାପତି
ଦେଓଗାଁ, (ମନୀଷ କୁମାର ସାହୁ) : ଶୁକ୍ରବାର ଦିନ ଥିଲା ଦେଓଗାଁ ବ୍ଲକ ଅନ୍ତର୍ଗତ ଡୁମ୍ବେରପିଟା ପଞ୍ଚାୟତରେ ଦେଓଗାଁ ବ୍ଲକ ସରପଞ୍ଚ ସଂଘର ସ୍ୱତନ୍ତ୍ର ବୈଠକ । ବୈଠକ ଆରମ୍ଭରୁ କିଛି ସରପଞ୍ଚ ସଂଘର ଭୁଲ ନିଷ୍ପତ୍ତିକୁ ନେଇ ହୋ ହାଲ୍ଲା କରିଥିଲେ । ବିଭିନ୍ନ ସମୟରେ ସଂଘକୁ ନେଇ ରାଜନୀତି କରାଯାଉଛି । ସଂଘ ମାଧ୍ୟମରେ ଲୋକଙ୍କ ବିକାଶ କରିବା ପରିବର୍ତ୍ତେ ରାଜନୀତି କରାଯାଉଛି ବୋଲି ବିକ୍ଷୋଭ ପ୍ରଦର୍ଶନ କରିଥିଲେ ପ୍ରାୟ ୧୫ଜଣ ସରପଞ୍ଚ ।
ସୂଚନାଯୋଗ୍ୟ ଯେ, ଗତ ୨ ତାରିଖ ଦିନ ଦେଓଗାଁ ବ୍ଲକ ସମିତି ବୈଠକ ଅନୁଷ୍ଠିତ ହୋଇଥିଲା । ବୈଠକ ଆରମ୍ଭରେ ବନ୍ଧପଡ଼ା ସରପଞ୍ଚ ତଥା ସଂଘର ସଭାପତି ବ୍ଲକ ପ୍ରଶାସନ ବାରମ୍ବାର ସରପଞ୍ଚମାନଙ୍କୁ ଅଣଦେଖା କରୁଛନ୍ତି । ବୈଠକର ପୂର୍ବ ଦିନ ଅର୍ଥାତ ୧ ତାରିଖ ଦିନ ଜରାସିଂହା ପଞ୍ଚାୟତରେ ହୋଇଥିବା ୨୫ ଲକ୍ଷ ଓ ୧୫ ଲକ୍ଷ ଟଙ୍କା ଅନୁଦାନରେ ଦୁଇଟି ବନ୍ଧର ପଙ୍କୋଦ୍ଧାର ପାଇଁ ବିଧାୟକ ନରସିଂହ ମିଶ୍ର ଶୁଭାରମ୍ଭ କରିଥିଲେ । ହେଲେ ସ୍ଥାନୀୟ ସରପଞ୍ଚ କୁଶ ମେହେରଙ୍କୁ ଡକାଯାଇନଥିଲା । ତେଣୁ ସମସ୍ତ ସରପଞ୍ଚ ବୈଠକରେ ଭାଗ ନ ନେଇ ବାହାରକୁ ଚାଲି ଆସିବାକୁ ନିର୍ଦେଶ ଦେଇଥିଲେ ସଂଘର ସଭାପତି ଶ୍ରୀ ମିଶ୍ର । ସଭାରେ ଉପସ୍ଥିତ ଥିବା ବଲାଙ୍ଗିର ବିଧାୟକ ନରସିଂହ ମିଶ୍ର ପୂର୍ବ ଦିନର କାମକୁ ନେଇ ଦୁଃଖ ପ୍ରକାଶ କରିବା ସହ ଆଉ ଯେପରି ନ ହୁଏ ସେଥିପ୍ରତି ସମସ୍ତେ ସଜାଗ ହେବା ଏବଂ ଏହି ବିଷୟକୁ ଅଧିକ ଆଲୋଚନା ନ କରି ଅଞ୍ଚଳର ବିକାଶ ପାଇଁ ଆଲୋଚନାରେ ସରପଞ୍ଚମାନଙ୍କୁ ଭାଗ ନେବାକୁ ଅନୁରୋଧ କରିଥିଲେ । ହେଲେ ସଂଘର ସଭାପତି ଗୋପାଳ ମିଶ୍ର ବିଧାୟକଙ୍କ ଅନୁରୋଧକୁ ରକ୍ଷା ନ କରି ସଭା ବର୍ଜନ କରିଥିବାରୁ ତାଙ୍କ ନିଷ୍ପତ୍ତି ପଛରେ ଦଳୀୟ ବିଚାର ଧାରା ଥିବା ନେଇ ବଡବନ୍ଧ ସରପଞ୍ଚ ଜଗବନ୍ଧୁ ମେହେର, ସାରସମାଲ ସରପଞ୍ଚ ଗୋପାଳ ବାଗ, ଗୌଡ଼ଗୋଠ ସରପଞ୍ଚ ରଞ୍ଜିତା ସାହୁ, ସିକୁଆଁ ସରପଞ୍ଚ ରାଜକୁମାର ଭୋଇ, କୁତୁର୍ଲା ସରପଞ୍ଚ ତେଜ ହରପାଲ, ଘୁଡ଼ଖାପଲା ସରପଞ୍ଚ ଜୀବନୀ ଦାଶ, ରାମଚନ୍ଦ୍ରପୁର ସରପଞ୍ଚ ପଦ୍ମିନୀ ମିଶ୍ର, କୁଳୁତାପଡ଼ା ସରପଞ୍ଚ ଦୁଷ୍ମନ୍ତ ସାହୁଙ୍କ ସହ ଆହୁରି ସରପଞ୍ଚମାନେ ସଂଘର ସଭାପତି ଗୋପାଳ ମିଶ୍ର ପକ୍ଷପାତିତା କରୁଥିବା ନେଇ କହିଥିଲେ । ସଂଘର ଆଲୋଚନା ପରେ ସଂଘକୁ ଭାଙ୍ଗି ଦେଇଥିବା ନେଇ ଘୋଷଣା କରାଯାଇଥିଲା । ଅନ୍ୟପକ୍ଷରେ ସଂଘର ବୈଠକରେ ବ୍ଲକ ଅଧ୍ୟକ୍ଷ ଦୟାନିଧୀ ଖମାରୀ ଉପସ୍ଥିତ ରହିଥିବାରୁ ତାକୁ ମଧ୍ୟ କିଛି ସରପଞ୍ଚ ବିରୋଧ କରିଥିଲେ । ହେଲେ ସଭାପତିଙ୍କୁ ଏହି ବିରୋଧ ବିଷୟରେ ପଚାରିବାରୁ ସଂଘର ଅଧ୍ୟକ୍ଷ ସଭାରେ ରହିପାରିବେ । ପୂର୍ବରୁ ହୋଇଥିବା ସଭାଗୁଡ଼ିକରେ ଉପସ୍ଥିତ ରହି ଆସିଛନ୍ତି ବୋଲି କହିଛନ୍ତି ।
ସଂଘ ଭାଙ୍ଗିବା ନେଇ ସରପଞ୍ଚ ସଂଘର ସଭାପତି ଗୋପାଲ ମିଶ୍ରଙ୍କୁ ପଚାରିବାରୁ ସରପଞ୍ଚ ସଂଘ ଭାଙ୍ଗିବା ନେଇ କୌଣସି ଘୋଷଣା କରାଯାଇନାହିଁ । ଆହୁରି କିପରି ଅଧିକ ସକ୍ରିୟ ହେବ ସେଥିପାଇଁ ଉଦ୍ୟମ କରାଯିବ ବୋଲି କହିବା ସହ କିଛି ସରପଞ୍ଚ ମିଶି ସଂଘକୁ ଭାଙ୍ଗିବା ପାଇଁ ଉଦ୍ୟମ କରୁଛନ୍ତି ବୋଲି କହିଛନ୍ତି ।