ଦେଓଗାଁ, (ମନୀଷ କୁମାର ସାହୁ) : ଦେଓଗାଁ ବ୍ଲକ ଧଣ୍ଡାମାଲ ପଞ୍ଚାୟତ ବିଲାଶପୁର ଗାଁର ଉଚ୍ଚ ପ୍ରାଥମିକ ବିଦ୍ୟାଳୟର ପରିଚାଳନା କମିଟିର ବୈଠକ ଅନୁଷ୍ଠିତ ହୋଇଯାଇଛି । ସଭା ଆରମ୍ଭରେ ବିଦାୟୀ ଶିକ୍ଷକ ଆର୍ତ୍ତବନ୍ଧୁ ମିଶ୍ରଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏହି କାର୍ଯ୍ୟକ୍ରମରେ ସ୍କୁଲ ପରିଚାଳନା କମିଟିର ସଭାପତି ଡାକ୍ତର ବାରିକ ସଭା ପରିଚାଳନା କରିଥିବା ବେଳେ ଚୋରମରା ୟୁପିସ୍କୁଲର ଶିକ୍ଷକ ସୁଶାନ୍ତ ସାହୁ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ସେହିପରି ସମ୍ମାନୀତ ଅତିଥି ଭାବେ ଶିକ୍ଷକ ସତ୍ୟବାଦୀ ମହାକୁଡ଼, ବିଧାନ ସେଠ ପ୍ରମୁଖ ଯୋଗ ଦେଇଥିଲେ । ବିଦ୍ୟାଳୟର ସହକାରୀ ଶିକ୍ଷକ ପଞ୍ଚାନନ ଭୋଇ, ଯଶୋବନ୍ତ ଦୀପ, ଶିକ୍ଷୟତ୍ରୀ ସ୍ୱର୍ଣ୍ଣପ୍ରଭା ଷଡଙ୍ଗୀ, ବିଶ୍ୱଲତା ପ୍ରିୟଦର୍ଶନୀ ପ୍ରମୁଖ ଉପସ୍ଥିତ ଥିଲେ । ବିଦାୟୀ ଶିକ୍ଷକ ଶ୍ରୀ ମିଶ୍ର ଅବସର ନେବା ପରେ ଶିକ୍ଷକ ଅଭାବରୁ ଶିକ୍ଷାଦାନରେ ବାଧାପ୍ରାପ୍ତ ହେବ ତେଣୁ ନୂତନ ଭାବେ ଜଣେ ସ୍ଥାୟୀ ଶିକ୍ଷକ ନିୟୁକ୍ତି କରିବାକୁ ଶିକ୍ଷା ବିଭାଗକୁ ଜଣାଇବାକୁ ସିଦ୍ଧାନ୍ତ କରାଯାଇଥିଲା ।