ଆଗଲପୁର, (କେପିଏନ୍ଏସ୍) : ଆଗଲପୁର ବ୍ଲକ ବୈଷ୍ଣବ ସମାଜର ନୂତନ କମିଟି ଗଠନ ହୋଇଯାଇଛି । ରୁଗୁଡିଖାଲ ମାନସ ବିହାରସ୍ଥିତ ଶ୍ରୀରାମ ମନ୍ଦିର ପ୍ରାଙ୍ଗଣରେ ଆଗଲପୁର ବ୍ଲକ ବୈଷ୍ଣବ ସମାଜର ଏକ ବୈଠକ ଅନୁଷ୍ଠିତ ହୋଇଥିଲା । ଏଥିରେ ସଭାପତିତ୍ୱ କରିଥିଲେ ଆଦର୍ଶ ଶିକ୍ଷକ ତଥା ସମାଜସେବୀ ଯୋଗୀନ୍ଦ୍ର ଦାଶ । ସମସ୍ତଙ୍କୁ ସ୍ଵାଗତ ଅଭିନନ୍ଦନ ଜ୍ଞାପନ ପରେ ସମାଜର ଇଷ୍ଟଦେବ ଶ୍ରୀ ଶ୍ରୀ ଗୋପାଲଜୀ ମହାପ୍ରଭୁ ଓ ହନୁମାନଜୀଙ୍କ ଠାରେ ଦୀପ ପ୍ରଜ୍ୱଳନ କରାଯାଇଥିଲା । ବୈଷ୍ଣବ ସମାଜର ସୁବିଧା ଅସୁବିଧା ସଂପର୍କରେ ଆଲୋଚନା କରାଯାଇଥିଲା । ତତ୍ପରେ ନୂତନ କମିଟି ଗଠନ ପାଇଁ ପ୍ରକ୍ରିୟା ଆରମ୍ଭ ହୋଇଥିଲା । ସତ୍ୟ କୁମାର ଦାଶଙ୍କୁ ସର୍ବସମ୍ମତି କ୍ରମେ ମନୋନୟନ କାର୍ଯ୍ୟକ୍ରମ ପରିଚାଳନାର ମୁଖ୍ୟ ଦାୟିତ୍ଵ ଅର୍ପଣ କରାଯାଇଥିଲା । ତାପରେ ସଭାପତି ହରିହର ଦାଶ, ଉପସଭାପତି ନନ୍ଦଲାଲ ଦାଶ, ସଂପାଦକ ଯାଦବ ଦାଶ, ସହ ସଂପାଦକ କ୍ଷୀରୋଦ୍ର ଦାଶ, କୋଷାଧ୍ୟକ୍ଷ ଅଶ୍ଵିନୀ ଦାଶ ଓ ଉପଦେଷ୍ଟା ଭାବେ ସତ୍ୟ କୁମାର ଦାଶ, ନିମାଇଁ ଚରଣ ଦାଶ ଓ ବଳରାମ ଦାଶ ମନୋନୀତ ହୋଇଥିଲେ । ଆସନ୍ତା ଡ଼ିସେମ୍ବର ୧୫ ତାରିଖରେ ଭୁତିଆରବାହାଲ ଠାରେ ହେବାକୁ ଥିବା ଜିଲ୍ଲାସ୍ତରୀୟ ସମ୍ମିଳନୀରେ ମନୋନୀତ ସମସ୍ତ ନୂତନ କାର୍ଯ୍ୟକର୍ତ୍ତା ଯୋଗଦେବାକୁ ସମ୍ମତି ପ୍ରଦାନ କରିଥିଲେ । ଶେଷରେ ସୁଧିର ଦାଶ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।