ସୁନ୍ଦରଗଡ଼, (ସସ୍ମିତା ପ୍ରଧାନ) : ଆଜି ବିକାଶ ଭବନ ଠାରେ “ଆଦି କର୍ମଯୋଗୀ ଅଭିଯାନ” ଉପରେ ଏକ ଜିଲ୍ଲାସ୍ତରୀୟ ଅଭିମୁଖୀକରଣ ବୈଠକ ଜିଲ୍ଲାପାଳ ଡ଼ା. ଶୁଭଙ୍କର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏହି ଅବସରରେ ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା (ଆଇଟିଡ଼ିଏ), ସୁନ୍ଦରଗଡ଼ର ପ୍ରକଳ୍ପ ପ୍ରଶାସକ ଧୀରେନ୍ଦ୍ର କୁମାର ସେଠୀ ସମସ୍ତଙ୍କୁ “ଆଦି କର୍ମଯୋଗୀ ଅଭିଯାନ”ର ଉଦ୍ଦେଶ୍ୟ ବିଷୟରେ ସୂଚନା ଦେଇଥିଲେ । ଏହି ଅଭିଯାନ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରମୁଖ କାର୍ଯ୍ୟକ୍ରମ ମଧ୍ୟରୁ ଅନ୍ୟତମ । ଏହି ଅଭିଯାନର ଲକ୍ଷ୍ୟ ହେଉଛି- ଆଦିବାସୀ ସମ୍ପ୍ରଦାୟର ସାମାଜିକ-ଆର୍ଥିକ ସ୍ଥିତିରେ ଉନ୍ନତି ଆଣିବା ଏବଂ ଶିକ୍ଷା, ଜୀବିକା, ସ୍ୱାସ୍ଥ୍ୟସେବା, ଜଳ, ବିଦ୍ୟୁତ୍, ଗୃହ, ଡିଜିଟାଲ୍ ସଂଯୋଗ ଭଳି ମୌଳିକ ସୁବିଧା ଯୋଗାଇବା ଏବଂ ଆଦିବାସୀ ପରିଚୟକୁ ସଂରକ୍ଷଣ କରିବା ଏବଂ ସ୍ଥାନୀୟ ନେତୃତ୍ୱକୁ ସଶକ୍ତ କରିବା ନିଶ୍ଚିତ କରିବା । ସେହିଭଳି ଏହି ଅଭିଯାନ ଲୋକକେନ୍ଦ୍ରିକ ପ୍ରତିକ୍ରିୟାଶୀଳ ଶାସନ, ଜନଭାଗିଦାରିତା, ଅଭିଯୋଗ ସମାଧାନ – ସମସ୍ୟା ଚିହ୍ନଟ ଏବଂ ସମାଧାନ, ସହଯୋଗୀ କାର୍ଯ୍ୟାନ୍ୱୟନ ଇତ୍ୟାଦି ଉପରେ ଗୁରୁତ୍ଵାରୋପ କରିଥାଏ । ଏହି ଅଭିଯାନ ଦ୍ଵାରା ଗ୍ରାମ ସ୍ତରରେ ବିଭିନ୍ନ ପରିଣାମ ବାହାରି ପାରିବ । ଯେପରିକି, ଗୁରୁତ୍ୱପୂର୍ଣ୍ଣ ସେବା ଗୁଡ଼ିକର ପରିପୂର୍ଣ୍ଣତା (ଆବାସ, ରାସ୍ତା, ପୁଷ୍ଟିସାଧନ, ଶିକ୍ଷା, ସ୍ୱାସ୍ଥ୍ୟ, ଜୀବିକା ଆଦି), ଆଦି ସହଯୋଗୀ ଏବଂ ଆଦି ସାଥୀ ସହିତ ଗ୍ରାମର ଦୃଷ୍ଟିକୋଣ ଗଠନ, ଅଭିଯୋଗ ସମାଧାନ ଏବଂ ସେବା ପ୍ରଦାନ ପାଇଁ ଏକକ ୱିଣ୍ଡୋ କେନ୍ଦ୍ର ଆଦି । ଏହି କାର୍ଯ୍ୟକ୍ରମର ସଫଳ ରୂପାୟନ ପାଇଁ ଏକ ତ୍ରିସ୍ତରୀୟ ଦଳ ଗଠନ କରାଯାଇଛି, ଯେଉଁଥିରେ ଆଦି କର୍ମୀ, ଆଦି ସହାୟକ ଏବଂ ଆଦି ସାଥୀମାନେ ସାମିଲ ଅଛନ୍ତି, ଯେଉଁମାନେ ତୃଣମୂଳ ସ୍ତରରେ କାମ କରିବେ । ସୁନ୍ଦରଗଡ଼ ଜିଲ୍ଲାରେ, ଏହି କାର୍ଯ୍ୟକ୍ରମ ୧୭ଟି ବ୍ଲକ, ୨୭୯ଟି ଗ୍ରାମ ପଞ୍ଚାୟତ ଏବଂ ୮୧୨ଟି ଗ୍ରାମରେ କାର୍ଯ୍ୟକାରୀ ହେବ । ଏହି ଗ୍ରାମଗୁଡ଼ିକର ବିକାଶ ଲକ୍ଷ୍ୟ ହାସଲ କରିବା ପାଇଁ, ଜିଲ୍ଲା ପ୍ରଶାସନକୁ କାର୍ଯ୍ୟ ଯୋଜନା ପ୍ରସ୍ତୁତ କରିବାରେ ଏବଂ କାର୍ଯ୍ୟକ୍ରମର ପ୍ରଭାବଶାଳୀ କାର୍ଯ୍ୟାନ୍ୱୟନକୁ ସହଜ କରିବାରେ ସ୍ୱେଚ୍ଛାସେବୀ ସଂଗଠନଗୁଡ଼ିକ ଦ୍ୱାରା ସମର୍ଥନ କରାଯିବ । ଏହି ସହଯୋଗ ପ୍ରୟାସ ଜିଲ୍ଲାର ସାମଗ୍ରିକ ବିକାଶକୁ ତ୍ୱରାନ୍ୱିତ କରିବ ବୋଲି ଆଶା କରାଯାଉଛି । ବୈଠକରେ ଅତିରିକ୍ତ ଜିଲ୍ଲାପାଳ ସୁରଜ ପଟ୍ଟନାୟକ, ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ସୁରଞ୍ଜନ ସାହୁ, ପାନପୋଷ ଉପ ଜିଲ୍ଲାପାଳ ବିଜୟ କୁମାର ନାୟକ, ସମସ୍ତ ଗୋଷ୍ଠି ଉନ୍ନୟନ ଅଧିକାରୀ, ସମସ୍ତ ବିଭାଗୀୟ ଅଧିକାରୀ, ସ୍ୱେଚ୍ଛାସେବୀ ଅନୁଷ୍ଠାନର କମର୍କର୍ତ୍ତମାନେ ଉପସ୍ଥିତ ରହିଥିଲେ ।