ବଲାଙ୍ଗିର, (ଦେବାଶିଷ ମିଶ୍ର) : ସ୍ଥାନୀୟ ଟାଉନ ବାଳିକା ବିଦ୍ୟାଳୟ ଠାରେ ରେଳ ଉପଭୋକ୍ତା ସଂଘର ସାଧାରଣ ବୈଠକ ପ୍ରଫେସର ତରୁଣ କୁମାର ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ପ୍ରାରମ୍ଭରୁ ଉପ-ସଭାପତି ଅଶୋକ ମିଶ୍ର, ବରିଷ୍ଠ ସଦସ୍ୟ ମନୋରଂଜନ ପୁରୋହିତ ପ୍ରଭୁ ଶ୍ରୀ ଗଣେଷଙ୍କ ଠାରେ ଦୀପ ପ୍ରଜ୍ୱଳନ ସହ ମାଲ୍ୟାର୍ପଣ କଲା ପରେ ସଂପାଦକ ଦିବାକର ହୋତା ୨୦୨୪-୨୫ର ବାର୍ଷିକ ବିବରଣୀ ପାଠ କରିଥିଲେ ଓ କୋଷାଧ୍ୟକ୍ଷ ଅଶୋକ ଚାନ୍ଦ ଆୟବ୍ୟୟର ବିବରଣୀ ଉପସ୍ଥାପନ କରିଥିଲେ । ଯାତ୍ରୀମାନଙ୍କୁ ଛାଡି ଆସୁଥିବା ବ୍ୟକ୍ତିମାନଙ୍କୁ ଷ୍ଟେସନ ସାମନାରେ ଗାଡି ରଖିବା ପାଇଁ ମନା କରିବା, ୨ ଓ ୩ୟ ପ୍ଲାଟଫର୍ମରେ ଭାଙ୍ଗି ଯାଇଥିବା ଫ୍ଲୋରିଙ୍ଗ ଟାଇଲମାନଙ୍କ ମରମତି ହେଉନ ଥିବା, ଦୁର୍ଗ -ପୁରୀ ଟ୍ରେନଟି ପୁରୀରେ ବହୁତ ବିଳମ୍ବରେ ପହଂଚୁଥିବା ତଥା ସ୍ଥାନୀୟ ନେତୃବର୍ଗମାନେ ଟ୍ରେନରେ ଆସିଲେ ଏକ ନମ୍ବର ପ୍ଲାର୍ଟଫର୍ମରେ ଗାଡି ଲାଗିବା ମାତ୍ରା କୌଣସି ଗର୍ଭବତୀ ମହିଳା କିମ୍ବା ବୟସ୍କ ବ୍ୟକ୍ତି, ରୋଗୀମାନେ ଆସୁଥିବା ସମୟରେ ଅନୁରୋଧ କଲେ ମଧ୍ୟ ୨ ବା ୩ ନମ୍ବରରେ ଟ୍ରେନ ଲାଗେ, ଲିଫ୍ଟ ଓ ର୍ୟାମ୍ପର ବ୍ୟବସ୍ଥା ନ ହେବା ପର୍ଯ୍ୟନ୍ତ ଏକ ନମ୍ବର ପ୍ଲାର୍ଟଫର୍ମରେ ଟ୍ରେନ ଲଗାଇବା ପାଇଁ ବାରମ୍ବାର ଅନୁରୋଧ ଓ ଚିଠି ମାଧ୍ୟମରେ ଦେଲେ ମଧ୍ୟ ଅଣଦେଖା କରାଯିବା, ଅମୃତ ଭାରତ ଯୋଜନାରେ ମାର୍ଚ୍ଚ ଶେଷ ସୁଦ୍ଧା ଲିଫ୍ଟ ଓ ଏଫ୍.ଓ.ଭି କାର୍ଯ୍ୟ ସରିଯିବା କଥା ମାତ୍ର କୌଣସି ରେଳବାଇ ଅଫିସର ଦେଖାଶୁଣା କରୁନ ଥିବା ପରି କାର୍ଯ୍ୟଟି ମନ୍ଥରରୁ ମନ୍ଥରଗତିରେ କାମ ଚାଲିଛି । ବିଭିନ୍ନ ଦଫାରେ ଦିଲ୍ଲୀ ଓ ପ୍ରୟାଗରାଜ ପାଇଁ ସିଧାସଳଖ ଟ୍ରେନ, ଭୁବନେଶ୍ୱରକୁ ସକାଳ ଟ୍ରେନ, ବଲାଙ୍ଗିରରେ ପିଆଇଟି ଲାଇନ କରିବା ଆଦି ଦାବିକୁ ରେଳବାଇ ବିଭାଗର ଅଣଦେଖା ଓ ବୈମାତୃକ ମନୋଭାବ ପାଇଁ ଆଗାମୀ ଦିନରେ ଆଉ ଧାରଣା ନୁହେଁ ରେଳ ରୋକ କରିବା ପାଇଁ ସଭ୍ୟମାନଙ୍କ ସହ ସଭାପତି ମତବ୍ୟକ୍ତ କରିଛନ୍ତି । ଉକ୍ତ ଆଲୋଚନାରେ ଗୋପବନ୍ଧୁ ପୁରୋହିତ, ଶିବ ନାରାୟଣ ରଥ, ନରେନ୍ଦ୍ର ଆଚାର୍ଯ୍ୟ, ସିଦ୍ଧେଶ୍ଵର ପାଣିଗ୍ରାହୀ, ମନୋରଂଜନ ପୁରୋହିତ, ଶରତ ହୋତା ପ୍ରମୁଖ ଭାଗ ନେଇଥିଲେ ଓ ବୈଠକରେ ପ୍ରଭାକର ମିଶ୍ର, ହିତେଶ ସାହୁ, ମହେଶ୍ୱର ସାହୁ, ଯୁଧିଷ୍ଠିର ମିଶ୍ର, ପଂଚାନନ ସେଠ, ରାମ କୁମାର ମିଶ୍ର, ସୁରେନ୍ଦ୍ର ନେଗୀ, ତ୍ରିଲୋଚନ ଦାଶ ପ୍ରମୁଖ ଉପସ୍ଥିତ ଥିଲେ । ଶେଷରେ ଅଶୋକ ଚାନ୍ଦ ଧନ୍ୟବାଦ ଅର୍ପଣ କରିଥିଲେ ।