ବର୍ଷ ବର୍ଷ ଧରି ରାସ୍ତା ପାଇଁ ହଇରାଣ ହେଉଛନ୍ତି ଗ୍ରାମବାସୀ ପ୍ରଶାସନ ସାଜିଛି ନିରବଦ୍ରଷ୍ଟା : ସାଧାରଣରେ ଅସନ୍ତୋଷ

ଖପ୍ରାଖୋଲ, (ଅଶୋକ କୁମାର ବାଗ) : ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ଦମେଇପାଲି ପଞ୍ଚାୟତ ଅନ୍ତର୍ଗତ ବଡ଼ଉଡେନ ଡୁଙ୍ଗୁରିପାଲି ଗ୍ରାମରୁ ସିଲେଟପାଲି ଏବଂ ବଡ଼ଉଡେନ ଡୁଙ୍ଗୁରିପାଲି ଗ୍ରାମରୁ ମହାସିମନା ପର୍ଯ୍ୟନ୍ତ ପାଞ୍ଚ କିଲୋମିଟର ରାସ୍ତା ମରଣଯନ୍ତା ପାଲିଟିଛି । ଏହି ଖାଲ, ଢିପ ରାସ୍ତାରେ ଲୋକେ ଯିବା ଆସିବା କରିବାରେ ହଇରାଣ ହେଉଥିବା ଅଭିଯୋଗ ହୋଇଛି । ଅଞ୍ଚଳବାସୀ ପ୍ରଶାସନଠାରୁ ଆରମ୍ଭ କରି ବିଧାୟକ ଓ ମନ୍ତ୍ରୀଙ୍କ ପର୍ଯ୍ୟନ୍ତ ସମସ୍ତଙ୍କ ପାଖରେ ରାସ୍ତା ମରାମତି କରିବା ପାଇଁ ଦାବୀ କରିଥିଲେ । ହେଲେ କିଛି ସୁଫଳ ମିଳି ନଥିଲା । ଅନେକ ଥର ପଞ୍ଚାୟତରୁ ଆରମ୍ଭ କରି ବ୍ଲକ ପ୍ରଶାସନକୁ ଗୁହାରି କଲେ ମଧ୍ୟ କେହି ଶୁଣିନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଆଶ୍ଚର୍ଯ୍ୟର କଥା ସରକାରଙ୍କ ଜନଶୁଣାଣିରେ ବାରମ୍ବାର ଅଭିଯୋଗ କଲେ ସୁଦ୍ଧା କେହି ଶୁଣିବାକୁ ରାଜି ନାହାନ୍ତି ଏପରିକି ଭି.କେ. ପାଣ୍ଡିଆନଙ୍କୁ ମଧ୍ୟ ଲିଖିତ ଭାବେ ଗ୍ରାମବାସୀ ଜଣାଇଥିଲେ ଏବଂ ପାଣ୍ଡିଆନ ମଧ୍ୟ ପ୍ରତିଶୃତି ଦେଇଥିଲେ କିନ୍ତୁ ତାହା ପ୍ରତିଶୃତିରେ ରହିଗଲା । ନିର୍ବାଚନ ସମୟରେ ବିଦ୍ୟୁତ, ପାନୀୟଜଳ, ଗମନାଗମନ, ଶିକ୍ଷା, ସ୍ୱାସ୍ଥ୍ୟ ଭଳି ମୌଳିକ ସୁବିଧା ଯୋଗାଇ ଦେବାର ପ୍ରତିଶୃତି ଫେଲ ମାରିଥିବା କହୁଛନ୍ତି ସ୍ଥାନୀୟ ଲୋକେ । ଯଦି ନିର୍ବାଚନ ଆଗରୁ ରାସ୍ତା ନିର୍ମାଣ ନହୁଏ ତାହେଲେ ସମସ୍ତ ଗ୍ରାମବାସୀ ଭୋଟ ବର୍ଜନ କରିବୁ ବୋଲି ଚେତାବନୀ ଦେଇଥିବା ଜଣାପଡିଛି । ଅନ୍ୟପଟେ ଏ ସମ୍ପର୍କରେ ଖପ୍ରାଖୋଲ ବିଡ଼ିଓଙ୍କୁ ଯୋଗାଯୋଗ କରିଥିଲେ ସୁଦ୍ଧା ପ୍ରତିକ୍ରିୟା ହସ୍ତଗତ ହୋଇନାହିଁ । ଏବେ ଦେଖିବାକୁ ବାକି ରହିଲା ପ୍ରଶାସନ ଏଦିଗରେ କେବେ ଦୃଷ୍ଟି ଦେଇ ସମସ୍ୟାର ସମାଧାନ କରୁଛନ୍ତି ବୋଲି ଆଲୋଚନା ହେଉଛି ।