ରାଉରକେଲା, (ସସ୍ମିତା ପ୍ରଧାନ) : ଓଡ଼ିଶାର ବିଜୁ ପଟ୍ଟନାୟକ ବୈଷୟିକ ବିଶ୍ୱବିଦ୍ୟାଳୟର ୟୁଜି ଏବଂ ପିଜି ଅଧ୍ୟୟନ କେନ୍ଦ୍ରରେ ସିଭିଲ୍ ଇଞ୍ଜିନିୟରିଂ ବିଭାଗ ଦ୍ୱାରା ଅଗଷ୍ଟ ୩୦, ୨୦୨୫ ରେ “ନୂତନ ଯୁଗର ନିର୍ମାଣ ସାମଗ୍ରୀ” ଉପରେ ଏକ ଦିନିକିଆ ସଚେତନତା କର୍ମଶାଳା ଆୟୋଜନ କରାଯାଇଥିଲା । ସିଭିଲ୍ ଇଞ୍ଜିନିୟରିଂ ସୋସାଇଟିର ତତ୍ତ୍ୱାବଧାନରେ ଅଲ୍ଟ୍ରାଟେକ୍ ସିମେଣ୍ଟ ଲିମିଟେଡ୍ ସହଯୋଗରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି ଅଧିବେଶନକୁ ୟୁଜି ଏବଂ ପିଜି ଅଧ୍ୟୟନ କେନ୍ଦ୍ରର ନିର୍ଦ୍ଦେଶକ ପ୍ରଫେସର ଶିବକୁମାର ମିଶ୍ର ଉଦଘାଟନ କରି ଆଧୁନିକ ଭିତ୍ତିଭୂମିରେ ସ୍ଥାୟୀତ୍ୱ, ନିରନ୍ତରତା ଏବଂ ଦକ୍ଷତା ବୃଦ୍ଧି କରିବାରେ ଅଭିନବ ନିର୍ମାଣ ସାମଗ୍ରୀର ବର୍ଦ୍ଧିତ ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ । ଅଲ୍ଟ୍ରାଟେକ୍ ସିମେଣ୍ଟ ଲିମିଟେଡର ରଞ୍ଜନ କୁମାର ଜେନା, କ୍ଷେତ୍ରୀୟ ମୁଖ୍ୟ, ବୈଷୟିକ (ପଶ୍ଚିମ ଓଡ଼ିଶା) ପାରମ୍ପରିକ ନିର୍ମାଣ ଜନିତ ବିଭିନ୍ନ ଅସୁବିଧା ଏବଂ ଆଧୁନିକ ନିର୍ମାଣ ସାମଗ୍ରୀ ବ୍ୟବହାର କରି ତାହାର ସମାଧାନ ଉପରେ ଏକ ଅନ୍ତର୍ଦୃଷ୍ଟିପୂର୍ଣ୍ଣ ବକ୍ତୃତା ପ୍ରଦାନ କରିଥିଲେ । ଡକ୍ଟର ଭରଦ୍ୱାଜ ନନ୍ଦ, ପ୍ରଭାରୀ ପ୍ରାଧ୍ୟାପକ (ଏକାଡେ଼ମିକ) ଙ୍କ ଧନ୍ୟବାଦ ପ୍ରସ୍ତାବ ସହିତ କର୍ମଶାଳା ଶେଷ ହୋଇଥିଲା । ସିଭିଲ୍ ଇଞ୍ଜିନିୟରିଂର ମୁଖ୍ୟ ଡକ୍ଟର ବିଭୁତି ଭୂଷଣ ମୁଖାର୍ଜୀଙ୍କ ତତ୍ତ୍ୱାବଧାନରେ ସିଭିଲ୍ ଇଞ୍ଜିନିୟରିଂ ସୋସାଇଟିର ଛାତ୍ର ସଂଯୋଜକ ସମ୍ବିତ କୁମାର ଚୌଧୁରୀ ଏବଂ କୈବଲ୍ୟ ବେହେରାଙ୍କ ସହଯୋଗରେ ଏହି କର୍ଯ୍ୟକ୍ରମର ସଞ୍ଚାଳନ କରାଯାଇଥିଲା ।