ଡୁଙ୍ଗୁରିପାଲି, (କେପିଏନ୍ଏସ୍) : ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ଅନ୍ତର୍ଗତ ସହଲା ରେଳ ଲାଇନ ପାଖ ଏକ ଘରେ ଗ୍ୟାସ ସିଲିଣ୍ଡର ଫାଟି ଅଗ୍ନିକାଣ୍ଡ ଘଟିଥିବା ଜଣାପଡିଛି । ଏଥିରେ ଦୋକାନଟି ଭଷ୍ମୀଭୂତ ହୋଇଥିବା ବେଳେ ଜଣେ ବୃଦ୍ଧା ଫସି ରହିଥିଲେ । ତେବେ ଦୁଇ ଘଣ୍ଟାର କସରତ ପରେ କାନ୍ଥ ଫଟାଇ ଅଗ୍ନିଶମ କର୍ମଚାରୀ ତାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ । ସୂଚନାନୁସାରେ, ସୁନାପାଲି ଗ୍ରାମର ନିରାକାର ମେହେରଙ୍କ ରେଳ ଲାଇନ ଅନ୍ତର୍ଗତ କେନାଲ ରାସ୍ତାରେ ଘରକରି ଏକ ଭୁଜା ଦୋକାନ କରିଛନ୍ତି । ସେଠାରେ ସପରିବାର ରହୁଛନ୍ତି । ଦୋକାନରେ ଭୁଜା ସାମଗ୍ରୀ ସମେତ ଖଲିଦନା ଓ ଗ୍ୟାସ ଟାଙ୍କି ବିକ୍ରି କରୁଥିଲେ । କୌଣସି କାରଣବସତଃ ଏକ ଗ୍ୟାସ ଟାଙ୍କିରେ ନିଆଁ ଲାଗି ହଠାତ୍ ଦୋକାନ ସାରା ବ୍ୟାପି ଯାଇଥିଲା । ଦୋକାନରେ ଗଚ୍ଛିତ ଥିବା ଅନ୍ୟ ଗ୍ୟାସ ଟାଙ୍କିରେ ମଧ୍ୟ ନିଆଁ ଲାଗି ବିସ୍ଫୋରଣ ହୋଇଥିବା ଜଣାପଡିଛି ।