ବୈପାରିଗୁଡା, (ବିକ୍ରାନ୍ତ କୁମାର ବେବର୍ତ୍ତା) : ବୈପାରିଗୁଡା ବ୍ଲକ କୋଲାର ଗ୍ରାମପଞ୍ଚାୟତର ଟାଙ୍ଗିନିଗୁଡା ଗ୍ରାମର ହରିଜନ ସାହିରେ ଅଗ୍ନିକାଣ୍ଡ ହେବା ଫଳରେ ଘର ଭିତରେ ଥିବା ଜଣେ ବୃଦ୍ଧା ଗୁରୁତର ହୋଇ ଏବେ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିବା ଜଣାପଡିଛି । ଦିନକୁ ଦିନ ଶୀତ କୋରାପୁଟ ଜିଲ୍ଲାରେ ବଢି ଚାଲିଥିବା ବେଳେ ଜଙ୍ଗଲପାହାଡ ଘେରା ବୈପାରିଗୁଡା ବ୍ଲକରେ ମଧ୍ୟ ପ୍ରବଳ ଶୀତ ଲାଗି ରହିଛି । ଏହି ବୃଦ୍ଧା ଜଣକ ଘର ଭିତରେ ଶୀତ ଦାଉରୁ ରକ୍ଷା ପାଇବା ପାଇଁ ଘର ଭିତରେ କୁମ୍ଭି ଲଗାଇ ସେକ ନେଉ ଥିବା ବେଳେ ଅଗ୍ନିକାଣ୍ଡ ଘଟିଥିବା ପରିବାର ବର୍ଗ ଅନୁମାନ କରୁଛନ୍ତି । ନିଆଁ ଲାଗିବା ଫଳରେ ସମାରୀ ସଗରିଆଙ୍କ ଗୋଟିଏ ବଖରା ଘର ଜଳିଯାଇଛି । ଘରେ ଥିବା ସମସ୍ତ ଆସବାବପତ୍ର, ଧାନ, ଚାଉଳ ଜଳି ପୋଡି ପାଉଁଶ ହୋଇଯାଇଛି । ସୂଚନା ମୂତାବକ ରାତି ୧୦ଟାରେ ଘରେ ଶୋଇଥିବା ବେଳେ ଅସାବଧାନତା ବସତଃ ନିଆଁ ଲାଗିଯାଇଥିଲା । ନିଆଁର ପ୍ରକୋପରେ କେବଳ ଜୀବନ ବଞ୍ଚାଇବା ଛଡା ଅନ୍ୟ କିଛି ସାମଗ୍ରୀ ଉଦ୍ଧାର କରିବା ସମ୍ଭବ ହେଲା ନାହିଁ । ଆଖପାଖ ଲୋକ ନିଆଁ ଦେଖି ସଙ୍ଗେ ସଙ୍ଗେ ଘର ପାଖକୁ ଆସି ଘର ଭିତରୁ ବୃଦ୍ଧାଙ୍କୁ ଉଦ୍ଧାର କରିଥିଲେ । ତେବେ ବୃଦ୍ଧାଙ୍କ ଦେହ ନିଆଁରେ ପୋଡି ଯାଇଥିବାର ଜଣାପଡିଛି । ପ୍ରଶାସନ ପକ୍ଷରୁ ତୁରନ୍ତ ସହାୟତା ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି ।