ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ଥାନା ଘୁଷୁରାମୁଣ୍ଡା ଗ୍ରାମର ଜଣେ ନାବାଳିକାଙ୍କୁ ପ୍ରେମ ସମ୍ପର୍କରୁ ଅପହରଣ ଅଭିଯୋଗରେ କୁମ୍ଭାରୀ ଗ୍ରାମର ପଙ୍କଜ ବେହେରା (୨୦) ନାମକ ଜଣେ ଅଭିଯୁକ୍ତ ଯୁବକଙ୍କୁ ପୁଲିସ୍ ଗିରଫ କରି କୋର୍ଟ ଚାଲାଣ କରିଛି । ପୁଲିସ୍ ସୂତ୍ରରୁ ପ୍ରକାଶ ଯେ ଘୁଷୁରାମୁଣ୍ଡା ଗ୍ରାମର ଜଣେ ନାବାଳିକା ଗତ ୨୯/୧୨/୨୪ ରାତି ୧୨ ଟାରୁ ଘରୁ ନିଖୋଜ ହୋଇଯାଇଥିବା ନେଇ ତାଙ୍କ ବାପା ଥାନାରେ ଏତଲା ଦେଇଥିଲେ । ତାଙ୍କ ଝିଅଙ୍କୁ କୁମ୍ଭାରୀ ଗ୍ରାମର ଗୋପାଳ ବେହେରାଙ୍କ ପୁଅ ପଙ୍କଜ ବେହେରା ଅପହରଣ କରିନେଇଥିବା ନାବାଳିକାଙ୍କ ବାପା ଥାନାରେ ଅଭିଯୋଗ କରିଥିଲେ । ଅନ୍ୟପକ୍ଷରେ ଅଭିଯୁକ୍ତ ଯୁବକଙ୍କ ବାପା ମଧ୍ୟ ତାଙ୍କ ପୁଅ ସେହି ସମାନ ସମୟରୁ ଘରୁ ନିଖୋଜ ହୋଇଯାଇଥିବା ନେଇ ଥାନାରେ ଏକ ନିଖୋଜ ଏତଲା ଦେଇଥିଲେ । ନାବାଳିକାଙ୍କ ବାପାଙ୍କ ଏତଲା ଆଧାରରେ ପୁଲିସ ଉଭୟ ଯୁବକ ଓ ନାବାଳିକାଙ୍କୁ ଉଦ୍ଧାର କରିଥିଲା । ନାବାଳିକା ଓ ଯୁବକଙ୍କ ଡ଼ାକ୍ତରୀମାଇନା ସହ ବୟାନ ରେକର୍ଡ କରିଥିଲା । ଅଧିକ ତଦନ୍ତ ପରେ ନାବାଳିକା ଯୁବତୀଙ୍କୁ ଅପହରଣ ଅଭିଯୋଗରେ ପୁଲିସ୍ କେସ୍ ନଂ. ୩୯୨/୨୪ ରୁଜ୍ଜୁ କରି ଅଭିଯୁକ୍ତ ଯୁବକ ପଙ୍କଜ ବେହେରାଙ୍କୁ ଗିରଫ କରିଥିଲା । ଅପହୃତା ନାବାଳିକାଙ୍କୁ ତାଙ୍କ ପରିବାର ଲୋକେ ଘରକୁ ନେବା ପାଇଁ ମନା କରିବାରୁ ତାଙ୍କୁ ବଲାଙ୍ଗିର ୱାନଷ୍ଟପ ସେଣ୍ଟରରେ ରଖାଯାଇଛି । ପ୍ରେମ ସମ୍ପର୍କରୁ ଏଭଳି ଘଟଣା ଘଟିଥିବା ବେଳେ ଘଟଣାଟି ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି । ଅଭିଯୁକ୍ତ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ବେଳେ ଜାମିନ ଆବେଦନ ଖାରଜ ହେବାରୁ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଛି ବୋଲି ତଦନ୍ତକାରୀ ସବଇନ୍ସପେକ୍ଟର ପ୍ରମୋଦ କୁମାର ପଧାନ ପ୍ରକାଶ କରିଛନ୍ତି ।
