- ୪୪ତମ ଥର ରକ୍ତଦାନ କଲେ ଡା. ଅକ୍ଷୟ ମହାନ୍ତି ।
ବାରିପଦା, (ଦେବସ୍ମିତ ଚୌଧୁରୀ) : ରକ୍ତଦାନ ଏକ ମହତ୍ ଓ ପୁଣ୍ୟ କର୍ମ । ରକ୍ତଦାନ ମାଧ୍ୟମରେ ଅନେକ ମୂଲ୍ୟବାନ ଜୀବନ ରକ୍ଷା କରାଯାଇପାରେ । ଏହାକୁ ଆଖି ଆଗରେ ରଖି ସମାଜରେ ରକ୍ତଦାନ ସମ୍ପର୍କରେ ସଚେତନତା ଓ ଜନଜାଗରଣ ସୃଷ୍ଟି ପାଇଁ ବିଭିନ୍ନ ସ୍ତରରେ ପ୍ରୟାସ ଜାରି ରହିଛି । ଏହି ପରିପ୍ରେକ୍ଷୀରେ ଜାତୀୟ ସ୍ୱେଚ୍ଛାକୃତ ରକ୍ତଦାନ ଦିବସ ଅବସରରେ ବାରିପଦାସ୍ଥିତ ଓଡ଼ିଶା ରକ୍ତ କେନ୍ଦ୍ରରେ ଡା. ଅକ୍ଷୟ ମହାନ୍ତି ୪୪ତମ ଥର ପାଇଁ ସ୍ୱେଚ୍ଛାକୃତ ଭାବେ ରକ୍ତଦାନ କରିଛନ୍ତି । ସୂଚନା ଅନୁଯାୟୀ, ଜଣେ ସିକିଲସେଲ ରୋଗୀଙ୍କ ପାଇଁ ରକ୍ତର ଆବଶ୍ୟକତା ଥିବା ଖବର ପାଇବା ପରେ ଡା. ମହାନ୍ତି ତୁରନ୍ତ ରକ୍ତ କେନ୍ଦ୍ରରେ ପହଞ୍ଚିଥିଲେ । ମାନବିକତା ଓ ସାମାଜିକ ଦାୟିତ୍ୱବୋଧର ପରିଚୟ ଦେଇ ସେ ସ୍ୱେଚ୍ଛାକୃତ ଭାବେ ରକ୍ତଦାନ କରିଥିଲେ । ତାଙ୍କର ଏହି ପଦକ୍ଷେପ ଅନ୍ୟମାନଙ୍କୁ ମଧ୍ୟ ରକ୍ତଦାନ ପାଇଁ ପ୍ରେରଣା ଯୋଗାଇବ ବୋଲି ମତ ପ୍ରକାଶ ପାଇଛି । ସମାଜରେ ଏବେବି ରକ୍ତଦାନକୁ ନେଇ କେତେକ ଭ୍ରାନ୍ତ ଧାରଣା ରହିଛି । ରକ୍ତଦାନ କଲେ ଶରୀର ଦୁର୍ବଳ ହୋଇଯାଏ ବୋଲି ଅନେକଙ୍କ ମନରେ ଧାରଣା ରହିଥିଲେ ମଧ୍ୟ ଏହା ଏକ ଭୁଲ ଧାରଣା । ଯୋଗ୍ୟ ଓ ସୁସ୍ଥ ବ୍ୟକ୍ତି ନିୟମ ଅନୁଯାୟୀ ରକ୍ତଦାନ କରିପାରନ୍ତି । ରକ୍ତର କୌଣସି କୃତ୍ରିମ ବିକଳ୍ପ ନଥିବାରୁ ରକ୍ତଦାତାଙ୍କ ଅବଦାନ ରୋଗୀଙ୍କ ପାଇଁ ଅତ୍ୟନ୍ତ ମୂଲ୍ୟବାନ ହୋଇଥାଏ । ଏକ ୟୁନିଟ୍ ରକ୍ତକୁ ବିଭିନ୍ନ ଉପାଦାନରେ ପ୍ରସ୍ତୁତ କରି ଏକାଧିକ ରୋଗୀଙ୍କ ଚିକିତ୍ସାରେ ବ୍ୟବହାର କରାଯାଇପାରେ । ତେଣୁ ରକ୍ତଦାନ ଜଣେ ରକ୍ତଦାତାଙ୍କ ମାଧ୍ୟମରେ ଏକାଧିକ ଜୀବନ ରକ୍ଷା କରିବାରେ ସହାୟକ ହୋଇଥାଏ । ବିଶେଷକରି ସିକିଲସେଲ, ଥାଲାସେମିଆ, ଦୁର୍ଘଟଣାଗ୍ରସ୍ତ ଓ ଗୁରୁତର ରୋଗୀଙ୍କ ପାଇଁ ରକ୍ତର ଆବଶ୍ୟକତା ରହିଥାଏ । ଏହି ଅବସରରେ ୪୪ତମ ଥର ରକ୍ତଦାନ କରିଥିବା ଡା. ଅକ୍ଷୟ ମହାନ୍ତିଙ୍କୁ ରକ୍ତଦାତା ସୋମନାଥ ସିଂ, ଅରବିନ୍ଦ ମୁଖି ଓ ହିମାଂଶୁ ଶେଖର ପ୍ରହରାଜ ଉତ୍ତରୀୟ ପ୍ରଦାନ କରି ସମ୍ମାନିତ କରିଥିଲେ । ଏହି ଅବସରରେ ନିୟମିତ ରକ୍ତଦାନ ସହିତ ଅନ୍ୟମାନଙ୍କୁ ମଧ୍ୟ ରକ୍ତଦାନ ପାଇଁ ପ୍ରୋତ୍ସାହିତ କରିବାକୁ ଆହ୍ୱାନ ଦିଆଯାଇଥିଲା । ରକ୍ତର ଅଭାବ ଯୋଗୁଁ ଯେପରି କୌଣସି ମୂଲ୍ୟବାନ ଜୀବନ ବିପଦରେ ନ ପଡ଼େ, ସେଥିପାଇଁ ସୁସ୍ଥ ଓ ଯୋଗ୍ୟ ବ୍ୟକ୍ତିମାନେ ସ୍ୱେଚ୍ଛାକୃତ ରକ୍ତଦାନ ପାଇଁ ଆଗେଇ ଆସିବା ଆବଶ୍ୟକ ବୋଲି ଏହି ଅବସରରେ ମତ ପ୍ରକାଶ ପାଇଛି ।