ନକଲି ଋଣ ଆପରୁ ଚୀନ୍ ଲକ୍ଷ ଲକ୍ଷ ଭାରତୀୟଙ୍କ ତଥ୍ୟ ଚୋରି କରିଛି, ହଂକଂର ଏକ ସର୍ଭରରେ ଲୁଚେଇ ରଖିଛି : ମୁମ୍ବାଇ ପୋଲିସ୍ର ବଡ଼ ଖୁଲାସା
ମୁମ୍ବାଇ : ନକଲି ଋଣ ଆପ୍ ମାମଲାର ତଦନ୍ତରେ ଅନେକ ଆଶ୍ଚର୍ୟ୍ୟଜନକ ତଥ୍ୟ ପ୍ରକାଶ ପାଇଛି । ଚାଇନାର ସାଇବର ଠକମାନେ ନକଲି ଋଣ ଆବେଦନ ଆପ୍ ମାଧ୍ୟମରେ କୋଟି କୋଟି ଟଙ୍କା ଚୋରି କରିବା ସହ ଲକ୍ଷ ଲକ୍ଷ ଭାରତୀୟଙ୍କ ତଥ୍ୟ ଚୋରି କରିଛନ୍ତି । ଭବିଷ୍ୟତରେ ଏହି ଚୋରି ହୋଇଥିବା ତଥ୍ୟକୁ କୌଣସି ପ୍ରକାରର ଜାତୀୟ ବିରୋଧୀ କାର୍ଯ୍ୟକଳାପ ପାଇଁ ବ୍ୟବହାର କରାଯାଇପାରେ ବୋଲି ଅନୁସନ୍ଧାନକାରୀ ସଂସ୍ଥା ସନ୍ଦେହ କରୁଛନ୍ତି ।
ନକଲି ଋଣ ଆପ୍ ମାମଲାରେ ଗିରଫ ହୋଇଥିବା ଅଭିଯୁକ୍ତଙ୍କୁ ପଚରାଉଚରା ଏବଂ ଅନୁସନ୍ଧାନରେ ଅନୁସନ୍ଧାନକାରୀ ସଂସ୍ଥା ଜାଣିବାକୁ ପାଇଛି ଯେ, ଅଢେ଼ଇ ଲକ୍ଷରୁ ଅଧିକ ଭାରତୀୟଙ୍କ ମୋବାଇଲ୍ ନମ୍ବର, ଆଧାର, ପାନ୍, ବ୍ୟାଙ୍କିଙ୍ଗ୍ କାରବାର, କୋଡ୍ ଆଦି ହ୍ୟାକ୍ କରି ଚାଇନା ଏବଂ ହଂକଂର ଏକ ସର୍ଭର ବ୍ୟାଙ୍କରେ ଲୁଚେଇ ରଖିଛି ।
ଅଢେ଼ଇ ଲକ୍ଷରୁ ଅଧିକ ଲୋକଙ୍କ ବ୍ୟକ୍ତିଗତ ତଥ୍ୟ ଚୋରି ଘଟଣାର ପ୍ରାଥମିକ ଅନୁସନ୍ଧାନ ବେଳେ ଏହା ସାମ୍ନାକୁ ଆସିଛି, ଏହା ଫାଇଲ ଆକାରରେ ବିଭିନ୍ନ ତଥ୍ୟ ଗଚ୍ଛିତ କରି ଚାଇନାର ଠକମାନଙ୍କୁ ପଠାଯାଇଥିଲା ଏବଂ ପରେ ଏହା ସର୍ଭର ବ୍ୟାଙ୍କରେ ଗଚ୍ଛିତ ହୋଇଥିଲା । ଯଦି ଦୁଇ ଦେଶ ମଧ୍ୟରେ ସମ୍ପର୍କ ଖରାପ ହୁଏ, ତେବେ ଏହି ତଥ୍ୟ ପ୍ରକ୍ସି ଯୁଦ୍ଧ ପାଇଁ ମଧ୍ୟ ବ୍ୟବହାର କରାଯାଇପାରିବ । ଏଥି ସହିତ ଏହି ତଥ୍ୟ ଅର୍ଥନୀତିକୁ ଭାଙ୍ଗିବା ପାଇଁ ଆର୍ଥିକ ଆକ୍ରମଣ ପାଇଁ ମଧ୍ୟ ବ୍ୟବହାର କରାଯାଇପାରିବ ବୋଲି କୁହାଯାଇଛି ।
