ମସ୍କୋ : ନିଷିଦ୍ଧ ବିଷୟବସ୍ତୁ ହଟାଇବାରେ ବିଫଳ ହୋଇଥିବା ଅଭିଯୋଗରେ ରୁଷ କର୍ତ୍ତୃପକ୍ଷ ଫେସବୁକ୍ ଏବଂ ଟେଲିଗ୍ରାମ ଆପ୍କୁ ଜରିମାନା କରିଛନ୍ତି । ଏହି ପଦକ୍ଷେପ ଦେଶରେ ରାଜନୈତିକ ଅସ୍ଥିରତା ମଧ୍ୟରେ ସୋସିଆଲ ମିଡିଆ ପ୍ଲାଟଫର୍ମକୁ ନିୟନ୍ତ୍ରଣ କରିବା ପାଇଁ ସରକାରଙ୍କ ବଢ଼ୁଥିବା ପ୍ରୟାସର ଏକ ଅଂଶ ଭାବରେ ଦେଖାଯାଇପାରେ । ଗୁରୁବାର ଦିନ ମସ୍କୋର ଏକ କୋର୍ଟ ଫେସବୁକକୁ ୧.୭ କୋଟି ରୁବେଲ ଏବଂ ଟେଲିଗ୍ରାମକୁ ୧ କୋଟି ରୁବେଲ ଜରିମାନା କରିଛନ୍ତି । ଦୁଇଟି ପ୍ଲାଟଫର୍ମରୁ ଅପସାରଣ କରିବାରେ ଅସମର୍ଥ ବିଷୟବସ୍ତୁ ସଂପର୍କରେ ଏପର୍ୟ୍ୟନ୍ତ ଜଣା ପଡିନାହିଁ । ଗତ ସପ୍ତାହରେ ଉଭୟ ଫୋରମ୍ ଉପରେ ଏହା ଦ୍ୱିତୀୟ ଥର ଜରିମାନା ଆଦାୟ କରାଯାଇଛି । ଏହାପୂର୍ବରୁ ମେ ୨୫ ରେ, ଫେସବୁକକୁ ରୁଷ କର୍ତ୍ତୃପକ୍ଷ ବେଆଇନ ବୋଲି ବିବେଚନା କରାଯାଉଥିବା ବିଷୟବସ୍ତୁ ହଟାଇ ନ ଥିବାରୁ ୨.୬ କୋଟି ରୁବେଲ ଜରିମାନା କରିଥିଲେ । ଏଥି ସହିତ, ଏକ ମାସ ପୂର୍ବରୁ, ନିଷିଦ୍ଧ ବିଷୟବସ୍ତୁ ହଟାଇ ନ ଥିବାରୁ ଟେଲିଗ୍ରାମକୁ ୫୦ ଲକ୍ଷ ରୁବେଲ ଜରିମାନା କରାଯାଇଥିଲା ।
ଏହି ବର୍ଷର ଆରମ୍ଭରେ, ରୁଷର ସରକାରୀ ସଂଚାର ନିରୀକ୍ଷକ ସଂସ୍ଥା ବେଆଇନ ବିଷୟବସ୍ତୁ ହଟାଇବାରେ ବିଫଳ ହୋଇଥିବା ଅଭିଯୋଗ କରି ଟ୍ୱିଟରକୁ ବାରଣ କରିବାକୁ ଧମକ ଦେଇଥିଲେ । ଅଧିକାରୀମାନେ କହିଥିଲେ ଯେ, ଶିଶୁ ଅଶ୍ଳୀଳତା, ନିଶା ଔଷଧ ଏବଂ ସାମଗ୍ରୀ, ଆତ୍ମହତ୍ୟା ଭଳି ଆପତ୍ତିଜନକ ବିଷୟବସ୍ତୁ ହଟାଇବାରେ ପ୍ଲାଟଫର୍ମ ବିଫଳ ହୋଇଛି ।