କୋଚିଂ ପ୍ରତିଷ୍ଠାନ ଗୁଡ଼ିକର ମନମୁଖୀ କାର୍ଯ୍ୟକଳାପକୁ ରୋକିବା ପାଇଁ ସରକାର ଆଣିବେ ଅଂବ୍ରେଲା ଆକ୍ଟ

ଜୟପୁର : ରାଜସ୍ଥାନରେ ଚାଲିଥିବା କୋଚିଂ ପ୍ରତିଷ୍ଠାନଗୁଡ଼ିକର ମନମୁଖୀ କାର୍ଯ୍ୟକଳାପକୁ ବନ୍ଦ କରିବାକୁ ସରକାର ଖୁବ୍ ଶୀଘ୍ର ଏକ ଆଇନ ଆଣିବାକୁ ଯାଉଛନ୍ତି । କୋଚିଂ ପ୍ରତିଷ୍ଠାନଗୁଡ଼ିକ ଉପରେ ଲଗାତାର ଅଭିଯୋଗ ଏବଂ ଫି’ ଆଦାୟ ଉପରେ ଅଭିଯୋଗ ପରେ ସରକାର ଏହି ଆକ୍ଟ ଆଣିବାକୁ କାର୍ଯ୍ୟ କରୁଛନ୍ତି । ରାଜସ୍ଥାନର ଉଚ୍ଚଶିକ୍ଷା ବିଭାଗ ବିଧି ମୁତାବକ ରାଜସ୍ଥାନ ସିଏମ୍ ଅଶୋକ ଗେହେଲଟଙ୍କ ନିର୍ଦ୍ଦେଶରେ କାର୍ଯ୍ୟ କରୁଛି । ବାସ୍ତବରେ ରାଜସ୍ଥାନରେ ବାରମ୍ବାର ଛାତ୍ରଛାତ୍ରୀଙ୍କ ମଧ୍ୟରେ ବଢ଼ୁଥିବା ବିଭିନ୍ନ ପ୍ରକାର ଚାପ ଯୋଗୁଁ ଆତ୍ମହତ୍ୟା ଘଟଣା, ଫି’ ଆଦାୟର ମନମୁଖୀ କାର୍ଯ୍ୟକଳାପ, କୋଚିଂ ପ୍ରତିଷ୍ଠାନରେ ଅସୁବିଧା ଏବଂ ସୁରକ୍ଷା ବ୍ୟବସ୍ଥାରେ ଅଭାବ ତଥା ପିଲାମାନଙ୍କ ମଧ୍ୟରେ ଉତ୍ତେଜନା ବୃଦ୍ଧି ହେତୁ ସରକାର ସମୟ ସମୟରେ ନିର୍ଦ୍ଦେଶାବଳୀ ଜାରି କରୁଛନ୍ତି । ଏ ବାବଦରେ ମାନବ ଅଧିକାର ଆୟୋଗ ଏବଂ ହାଇକୋର୍ଟ ମଧ୍ୟ ନିଷ୍ପତ୍ତି ନେଇଛନ୍ତି । କିନ୍ତୁ, କୋଚିଂ ପ୍ରତିଷ୍ଠାନଗୁଡିକରେ ରାଜ୍ୟ ସରକାରଙ୍କ ନିର୍ଦ୍ଦେଶାବଳୀ ପାଳନ କରାଯାଉ ନାହିଁ ଏବଂ କୋଚିଂ ପ୍ରତିଷ୍ଠାନରେ ପଢ଼ୁଥିବା ପିଲାମାନଙ୍କ ମଧ୍ୟରେ ବଢ଼ୁଥିବା ଆତ୍ମହତ୍ୟା ଘଟଣାକୁ ସରକାର ଗୁରୁତ୍ୱ ଦେଇ ଏକ ଆଇନ ଆଣିବାକୁ ଯାଉଛନ୍ତି ବୋଲି ଜଣାପଡ଼ିଛି ।