ନୂଆଦିଲ୍ଲୀ : ବିଜେପି ସାଂସଦ ବରୁଣ ଗାନ୍ଧୀ ଶୁକ୍ରବାର ଦିନ କହିଛନ୍ତି ଯେ, ବେରୋଜଗାରୀ ଆଜି ଦେଶର ସବୁଠାରୁ ବଡ ସମସ୍ୟା । ଅର୍ଥନୀତି ଏବଂ କୃଷି ଭଳି ପ୍ରସଙ୍ଗରେ କେନ୍ଦ୍ର ସରକାରଙ୍କ ଆଭିମୁଖ୍ୟକୁ ସମାଲୋଚନା କରୁଥିବା ବରୁଣ ଗାନ୍ଧୀ ଟ୍ୱିଟରରେ ପାଟନାରେ ରେଳ ନିଯୁକ୍ତିରେ ହୋଇଥିବା ଅନିୟମିତତା ବିରୋଧରେ ଏକ ଯୁବକଙ୍କ ସହ କଥାବାର୍ତ୍ତାର ଏକ ଭିଡିଓ ସେୟାର କରିଛନ୍ତି ।
ଏଠାରେ ଉଲ୍ଲେଖଯୋଗ୍ୟ ଯେ, ପୂର୍ବରୁ ବରୁଣ ଦରବୃଦ୍ଧି ଏବଂ ବେକାରୀ ତଥା ବିନିଯୋଗ ଉପରେ ମାସ ଆରମ୍ଭରେ ସରକାରଙ୍କୁ ଘେରିଥିଲେ । ସେ କହିଥିଲେ, ସବୁକିଛି ବିକ୍ରି ହେଲେ ଦେଶରେ କ’ଣ ହେବ ? ଦେଶ ଏହି ସମୟରେ ଅସୁବିଧାରେ ପଡ଼ିଛି, ଦରବୃଦ୍ଧି ଆକାଶକୁ ଛୁଇଁଛି । ବେକାରୀ ସମସ୍ୟା ଦ୍ରୁତ ଗତିରେ ବୃଦ୍ଧି ପାଉଛି । ଘରୋଇକରଣ ନାମରେ ଦେଶର ଗୁରୁତ୍ୱପୂର୍ଣ୍ଣ ସମ୍ବଳ ବିକ୍ରି ହେଉଛି । ସବୁକିଛି ବିକ୍ରି ହେଲେ, ଦେଶରେ କ’ଣ ହେବ ଭାବନ୍ତୁ ? ଆଜି ରାଜନୀତି ସ୍ୱାର୍ଥପରତା ଏବଂ ଭ୍ରଷ୍ଟାଚାରରେ ପରିପୂର୍ଣ୍ଣ । ଦେଶ ବିଷୟରେ ଚିନ୍ତା କର, ରାଜନୀତିରେ ସଚ୍ଚୋଟ ଲୋକଙ୍କୁ ଆଣ ।