ବିଶ୍ୱ ଜନସଂଖ୍ୟା ଦିବସ

ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ଜନସଂଖ୍ୟା ନିୟନ୍ତ୍ରଣଙ୍କ ସମେତ ବିଶ୍ୱର ଜନସଂଖ୍ୟା ପ୍ରସଙ୍ଗକୁ ଆଲୋକିତ କରିବା ପାଇଁ ପ୍ରତିବର୍ଷ ଜୁଲାଇ ୧୧ରେ ‘ବିଶ୍ୱ ଜନସଂଖ୍ୟା ଦିବସ’ ପାଳନ କରାଯାଏ । ମିଳିତ ଜାତିସଂଘ ଅନୁଯାୟୀ, ବଢୁଥିବା ଜନସଂଖ୍ୟାରେ ଇକୋଲୋଜିକାଲ୍‌ କାର୍ବନ ଫୁଟ୍‌ ପ୍ରିଣ୍ଟ ବା ପରିସଂସ୍ଥୀୟ ଅଙ୍ଗାର ପଦ ଚିହ୍ନ ରହିଛି । ଏହା କର୍ମ ନିଯୁକ୍ତି, ଅର୍ଥନୈତିକ ବିକାଶ, ଦାରିଦ୍ର୍ୟ, ଆୟ ବଣ୍ଟନ ଏବଂ ସାମାଜିକ ସୁରକ୍ଷା ଉପରେ ପ୍ରଭାବ ପକାଇଥାଏ । ଶିକ୍ଷା, ସ୍ୱାସ୍ଥ୍ୟସେବା, ପରିମଳ, ପରିବେଶ, ପରିସଂସ୍ଥା, ଜୈବ ବିବିଧତା, ଗୃହ, ଜଳ, ଖାଦ୍ୟ ଏବଂ ଶକ୍ତି ଉପରେ ଏହି ଧାରାର ଖରାପ ପ୍ରଭାବ ପଡିଥାଏ । ବିଶ୍ଵର ଜନସଂଖ୍ୟା ବର୍ତ୍ତମାନ ୮୧୨ କୋଟି ଅତିକ୍ରମ କରିଥିବା ବେଳେ ଭାରତର ଜନସଂଖ୍ୟା ୧୪୪ କୋଟି ଅଟେ । ମିଳିତ ଜାତିସଂଘ ୧୯୮୯ରେ ବିଶ୍ୱ ଜନସଂଖ୍ୟା ଦିବସ ଘୋଷଣା କରିଥିଲା । ଏହି ଅନନ୍ୟ ନିଷ୍ପତ୍ତି ନିଆଯାଇଥିଲା ଯେତେବେଳେ ଜୁଲାଇ ୧୧, ୧୯୮୭ରେ ବିଶ୍ଵର ଜନସଂଖ୍ୟା ପାଞ୍ଚଶହ କୋଟି ଅତିକ୍ରମ କରିଥିଲା । ​ବିଶ୍ଵର ଜନସଂଖ୍ୟା ସହ ଜଡିତ ବିଭିନ୍ନ ସମସ୍ୟାର ସମାଧାନ ବିଷୟରେ ଚିନ୍ତା କରିବା ପାଇଁ ଏହି ଦିନ ପ୍ରତିଷ୍ଠା କରାଯାଇଥିଲା, ଯେଉଁଥିରେ ମାତୃ ସ୍ୱାସ୍ଥ୍ୟ, ଦାରିଦ୍ର୍ୟ, ଅର୍ଥନୈତିକ ଅସୁବିଧା ଏବଂ ଅନ୍ୟାନ୍ୟ ସମସ୍ୟା ଅନ୍ତର୍ଭୁକ୍ତ ଅଟେ । ଏକ ସ୍ଥାୟୀ ଏବଂ ଶାନ୍ତିପୂର୍ଣ୍ଣ ଭବିଷ୍ୟତ ପାଇବା ପାଇଁ ୨୦୩୦ରେ ନିରନ୍ତର ବିକାଶର ଲକ୍ଷ୍ୟ ହାସଲ କରିବାକୁ ବିଶ୍ୱ ଜନସଂଖ୍ୟା ଦିବସ ଏକ ସ୍ମାରକ ଅଟେ । ଜନସଂଖ୍ୟା ପ୍ରସଙ୍ଗରେ ଧ୍ୟାନ ଦେବା ଏବଂ ଅଧିକ ଜନସଂଖ୍ୟାର ନକାରାତ୍ମକ ପ୍ରଭାବ ବିଷୟରେ ସଚେତନତା ସୃଷ୍ଟି କରିବା ପାଇଁ ବିଶ୍ୱ ଜନସଂଖ୍ୟା ଦିବସ ପାଳନ କରାଯାଏ । ଜନସଂଖ୍ୟା ବୃଦ୍ଧି ଅନେକ ଜନସ୍ୱାସ୍ଥ୍ୟ ଆହ୍ଵାନ ସୃଷ୍ଟି କରେ, ପରିବେଶର ଅବନତି ଘଟାଏ ଏବଂ ପ୍ରାକୃତିକ ଉତ୍ସଗୁଡିକ ଉପରେ ଚାପ ସୃଷ୍ଟି କରେ । ବିଶ୍ଵ ଜନସଂଖ୍ୟା ଦିବସ ୨୦୧୪ ପାଇଁ ଥିମ୍ ହେଉଛି ‘କାହାକୁ ପଛରେ ଛାଡନ୍ତୁ ନାହିଁ, ସମସ୍ତଙ୍କୁ ଗଣନା କରନ୍ତୁ’ । ଜନସଂଖ୍ୟା ଗଣନା ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟ କିନ୍ତୁ ବେଳେବେଳେ କିଛି ଅବହେଳା ପ୍ରଦର୍ଶିତ ହୋଇଥାଏ । ଏହି ଥିମ୍ ନିଶ୍ଚିତ କରେ ଯେ, ପୃଷ୍ଠଭୂମି, ଜାତୀୟତା, ଭୌଗୋଳିକ କିମ୍ବା ସାମାଜିକ ଅର୍ଥନୈତିକ ସ୍ଥିତିକୁ ଖାତିର ନକରି ସମସ୍ତେ ଜନ ସଂଖ୍ୟା ଗଣନାରେ ଯଥାର୍ଥ ଭାବରେ ପ୍ରତିନିଧିତ୍ଵ ଯେଭଳି କରନ୍ତି । ଜନସଂଖ୍ୟା ଏବଂ ବିକାଶ (ଆଇସିପିଡି) କାର୍ଯ୍ୟକ୍ରମର ତିରିଶତମ ବାର୍ଷିକୀ ପାଳନ ଅବସରରେ ଏହି ବର୍ଷ ଆନ୍ତର୍ଜାତୀୟ ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି । ଆଇସିପିଡି ଏହି କାର୍ଯ୍ୟକ୍ରମର କେନ୍ଦ୍ରୀୟ ଫୋକସ୍ ରହିବ ଯେ, ମହିଳାମାନଙ୍କର ଯେଯନ ଏବଂ ପ୍ରଜନନ ସ୍ଵାସ୍ଥ୍ୟ ଏବଂ ପ୍ରଜନନ ଅଧିକାର ନିରନ୍ତର ବିକାଶର ମୂଳଦୁଆ ଅଟେ । ଫୋକସ୍ ରହିବ ଯେ, ପୂର୍ବାପେକ୍ଷା ଅଧିକ ମହିଳା ଆଧୁନିକ ଗର୍ଭନିରୋଧକ ସୁବିଧା ଯେଭଳି ପାଇପାରିବେ । ୨୦୦୦ ମସିହାରୁ ମାତୃ ମୃତ୍ୟୁ ଚବିଶ ପ୍ରତିଶତ ହ୍ରାସ ପାଇଛି । ଜନ୍ମ ହାର ମଧ୍ୟ ପୂର୍ବାପେକ୍ଷା କମିଛି । ପରିବର୍ତ୍ତନ ଆଣିବାରେ ମହିଳାଙ୍କ ଗତିବିଧି ଏବଂ ନାଗରିକ ସମାଜର ଭୂମିକା ଗୁରୁତ୍ଵପୂର୍ଣ ଅଟେ । ଚଳିତ ବର୍ଷର ବିଷୟବସ୍ତୁ ଆମକୁ ମନେ ପକାଇଥାଏ ଯେ, ସମସ୍ୟା ବୁଝିବା, ଏହାର ସମାଧାନ ଏବଂ ପ୍ରଗତି ପାଇଁ ତଥ୍ୟ ସଂଗ୍ରହରେ ବିନିଯୋଗ କରିବା ଗୁରୁତ୍ୱପୂର୍ଣ୍ଣ ଅଟେ ।