ଆନ୍ତର୍ଜାତୀୟ ଉଦ୍ଭିଦ ସ୍ୱାସ୍ଥ୍ୟ ଦିବସ

ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : କ୍ଷୁଧାକୁ ରୋକିବା, ଦାରିଦ୍ର୍ୟ ହ୍ରାସ କରିବା, ଜୈବ ବିବିଧତାକୁ ସୁରକ୍ଷିତ ରଖିବା, ଜଳବାୟୁ ପରିବର୍ତ୍ତନ ପ୍ରଭାବକୁ ହ୍ରାସ କରିବା ଏବଂ ଅର୍ଥନୈତିକ ବିକାଶକୁ ପ୍ରୋତ୍ସାହିତ କରିବା ପାଇଁ ଉଦ୍ଭିଦ ସ୍ୱାସ୍ଥ୍ୟର ଆବଶ୍ୟକତା ବିଷୟରେ ସଚେତନତା ସୃଷ୍ଟି କରିବାକୁ ୧୨ ମେରେ ‘ଆନ୍ତର୍ଜାତୀୟ ଉଦ୍ଭିଦ ସ୍ୱାସ୍ଥ୍ୟ ଦିବସ’ ପାଳନ କରାଯାଏ । ଉଦ୍ଭିଦଗୁଡିକ ଆମେ ଖାଉଥିବା ଖାଦ୍ୟର ୮୦ ପ୍ରତିଶତ ଏବଂ ଆମେ ନିଶ୍ୱାସ ନେଉଥିବା ଅମ୍ଳଜାନର ୯୮ ପ୍ରତିଶତ ଉତ୍ସ ଅଟେ, ତଥାପି ସେମାନେ ବିବିଧ ପ୍ରକାରର କୀଟ ଏବଂ ରୋଗ ଦ୍ୱାରା ଗୁରୁତର ଭାବରେ ପ୍ରଭାବିତ ହୁଅନ୍ତି । ଆକ୍ରମଣକାରୀ କୀଟ, ଯାହା ରୋଗ ବିସ୍ତାର କରିପାରେ, ଉଦ୍ଭିଦ ସ୍ୱାସ୍ଥ୍ୟ ଏବଂ ଜୈବ ବିବିଧତା ପାଇଁ ଅତିରିକ୍ତ ବିପଦ ସୃଷ୍ଟି କରେ । ଖାଦ୍ୟ ଓ କୃଷି ସଂଗଠନ (ଏଫ୍‌ଏଓ) ଅନୁଯାୟୀ, ପ୍ରତିବର୍ଷ ୪୦ % ପର୍ଯ୍ୟନ୍ତ ଖାଦ୍ୟ ଶସ୍ୟ କୀଟ ଏବଂ ରୋଗ ଦ୍ୱାରା ନଷ୍ଟ ହୋଇଯାଏ, ଯାହା କେବଳ କୃଷି ଉପରେ କ୍ଷତିକାରକ ପ୍ରଭାବ ପକାଇବାରେ ସିମୀତ ନଥାଏ ବରଂ ବିଶ୍ଵର କ୍ଷୁଧାକୁ ବଢାଇଥାଏ । ଗ୍ରାମାଞ୍ଚଳର ଜୀବୀକା ପ୍ରତି ବିପଦ ସୃଷ୍ଟି କରିଥାଏ ଏବଂ ବିଶ୍ୱ ଅର୍ଥନୀତିକୁ ବାର୍ଷିକ ୨୨୦ ବିଲିୟନ୍‌ ଡଲାର ପର୍ଯ୍ୟନ୍ତ କ୍ଷତି ପହଞ୍ଚାଇଥାଏ । ଏହି ଦିବସ ପାଳନ ମାନବ ସ୍ୱାସ୍ଥ୍ୟ ଏବଂ ପରିବେଶରେ ଉଦ୍ଭିଦ ସ୍ୱାସ୍ଥ୍ୟର ଗୁରୁତ୍ୱପୂର୍ଣ୍ଣ ଭୂମିକା ବିଷୟରେ ସଚେତନତା ସୃଷ୍ଟି କରିବାର ସୁଯୋଗ ପ୍ରଦାନ କରିଥାଏ । ଜଳବାୟୁ ପରିବର୍ତ୍ତନ ଏବଂ ମାନବୀୟ କାର୍ଯ୍ୟକଳାପ ପ୍ରାକୃତିକ ପରିସଂସ୍ଥାକୁ ପ୍ରଭାବିତ କରୁଥିବା ଏବଂ ଜୈବ ବିବିଧତା ପ୍ରତି ବିପଦ ସୃଷ୍ଟି କରୁଥିବାବେଳେ ଏହା ବିଭିନ୍ନ କୀଟଙ୍କ ବୃଦ୍ଧି ପାଇଁ ନୂତନ ପରିସ୍ଥିତି ସୃଷ୍ଟି କରିଥାଏ । କ୍ଷୁଧାକୁ ରୋକିବା, ଦାରିଦ୍ର୍ୟ ହ୍ରାସ କରିବା, ଜୈବ ବିବିଧତା ରକ୍ଷା କରିବା ଏବଂ ଅର୍ଥନୈତିକ ବିକାଶକୁ ପ୍ରୋତ୍ସାହିତ କରିବା ପାଇଁ ଉଦ୍ଭିଦ ସ୍ୱାସ୍ଥ୍ୟର ଆବଶ୍ୟକତା ଉପରେ ଜନସାଧାରଣଙ୍କ ଦୃଷ୍ଟି ଆକର୍ଷଣ କରିବା ପାଇଁ ମିଳିତ ଜାତିସଂଘ ଆନ୍ତର୍ଜାତୀୟ ଉଦ୍ଭିଦ ସ୍ୱାସ୍ଥ୍ୟ ଦିବସ (ଆଇଡିପିଏଚ୍‌) ପ୍ରତିଷ୍ଠା କରିଥିଲା । ମାର୍ଚ୍ଚ ୨୦୨୨ରେ ଜାତିସଂଘ ସାଧାରଣ ସଭା ଦ୍ଵାରା ଆଇଡିପିଏଚ୍‌ ରିଜୋଲ୍ୟୁସନ୍ ସର୍ବସମ୍ମତି କ୍ରମେ ଗ୍ରହଣ କରାଯାଇଥିଲା । ୨୦୨୪ ପାଇଁ ଥିମ୍ ହେଉଛି ‘ଉଦ୍ଭିଦ ସ୍ୱାସ୍ଥ୍ୟ, ନିରାପଦ ବାଣିଜ୍ୟ, ଡିଜିଟାଲ୍ ଟେକ୍ନୋଲୋଜି । ଥିମ୍ ଉଦ୍ଭିଦ ସ୍ୱାସ୍ଥ୍ୟକୁ ପ୍ରୋତ୍ସାହିତ କରିବାରେ ଆନ୍ତର୍ଜାତୀୟ ସହଯୋଗ ଏବଂ ମାନାଙ୍କ ଆବଶ୍ୟକତା ଉପରେ ଗୁରୁତ୍ୱାରୋପ କରେ । ମିଳିତ ଜାତିସଂଘର ଖାଦ୍ୟ ଏବଂ କୃଷି କାର୍ଯ୍ୟାଳୟ (ଏଫ୍‌ଏଓ) ୧୩ ମେ ୨୦୨୪ରେ ଇଟାଲୀର ରୋମରେ ଏକ କାର୍ଯ୍ୟକ୍ରମ ଆୟୋଜନ କରି ଆନ୍ତର୍ଜାତୀୟ ଉଦ୍ଭିଦ ସ୍ୱାସ୍ଥ୍ୟ ଦିବସ ପାଳନ କରୁଛି । ଏହି କାର୍ଯ୍ୟକ୍ରମରେ ନିରନ୍ତର କୃଷି ଜ୍ଞାନ କୌଶଳ ଏବଂ ଉଦ୍ଭିଦ ସ୍ୱାସ୍ଥ୍ୟକୁ ପ୍ରୋତ୍ସାହିତ କରାଯିବ । ନିଜର ସୌନ୍ଦର୍ଯ୍ୟ ପାଇଁ ଜଙ୍ଗଲ ମଣିଷ ମାନଙ୍କ ହୃଦୟ ଯେ ଜୟ କରେ ତାହା ନୁହେଁ, ଯେପରି ସେହି ସୂକ୍ଷ୍ମ ସୁଦ୍ଧ ପବିତ୍ର ବାୟୁ ଯାହା କି ପୁରୁଣା ବୃକ୍ଷରୁ ନିର୍ଗତ ହୁଏ, ତାହା ହିଁ ଚମତ୍କାର ଭାବରେ ଆନନ୍ଦ ଭରିଦିଏ ଏବଂ କ୍ଳାନ୍ତ ଆତ୍ମାକୁ ଶାନ୍ତି କରେ ।