- “ସମୟାନୁବର୍ତ୍ତିତା ଜୀବନକୁ ସୁଖମୟ କରିଥାଏ”
ବଲାଙ୍ଗିର, (କେପିଏନ୍ଏସ୍) : ପୁଇଁତଲା ବ୍ଲକ ଅନ୍ତର୍ଗତ ବିଲେଇସର୍ଡା ଜବାହାରଲାଲ ସରକାରୀ ହାଇସ୍କୁଲର ବାର୍ଷିକୋତ୍ସବ ଉଦ୍ଯାପିତ ହୋଇଯାଇଛି । ବିଦ୍ୟାଳୟର ପ୍ରଧାନ ଶିକ୍ଷକ ସ୍ୱାଧିନ ସାହୁଙ୍କ ସଭାପତିତ୍ୱରେ ଅନୁଷ୍ଠିତ ଉଦ୍ଘାଟନୀ ସଭାରେ ପୁଇଁତା ବ୍ଲକ ଚେୟାରମ୍ୟାନ ସରୋଜ ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ଛାତ୍ର ଜୀବନରେ ସମୟାନୁବର୍ତ୍ତିତାର ଯଥେଷ୍ଟ ମୂଲ୍ୟ ରହିଛି, ସମୟାନୁବର୍ତ୍ତିତା ଜୀବନକୁ ସୁଖମୟ କରିଥାଏ, ସମୟର ସଦୁପଯୋଗ ନ କଲେ ବିକାଶର ଧାରା ବହୁ ପଛରେ ପଡିଯିବ ବୋଲି କହିବା ସହ ବିଦ୍ୟାଳୟର ଭିତ୍ତିଭୂମି ପାଇଁ ଆବଶ୍ୟକୀୟ ଅଭାବ ଗୁଡିକ ପୂରଣ କରିବାକୁ ପ୍ରତିଶୃତି ଦେଇଥିଲେ । ମୁଖ୍ୟବକ୍ତା ଭାବେ ଶିକ୍ଷାବିତ ଜଳେନ୍ଦ୍ର ସାହୁ ଯୋଗଦେଇ ଶୃଙ୍ଖଳିତ ସମାଜ ଜୀବନ ସୁସ୍ଥ ପରଂପରା ସୃଷ୍ଟି କରେ, ବିଦ୍ୟା ଅଭ୍ୟାସରେ ଶୃଙ୍ଖଳା ରକ୍ଷା ହେଲେ ଛାତ୍ରଛାତ୍ରୀମାନେ କୃତିତ୍ୱର ସହିତ ଉତ୍ତୀର୍ଣ୍ଣ ହୋଇଥାନ୍ତି ବୋଲି ନିଜ ବକ୍ତବ୍ୟରେ କହିଥିଲେ । ସରପଞ୍ଚ ସୁଶାନ୍ତ ଛତ୍ରିଆ, ଏସ୍ଏମ୍ସି ସଭାପତି ଚୈତନ୍ୟ ପଣ୍ଡା, ଆଲୁମିନୀ ସଭାପତି ଅନନ୍ତ ବିଶ୍ୱାଳ, ସିଆର୍ସିସି ସତ୍ୟ ସାହୁ ପ୍ରମୁଖ ଯୋଗଦେଇ ଛାତ୍ରଛାତ୍ରୀମାନଙ୍କୁ ଶ୍ରେଣୀ ପାଠ୍ୟ ସହ ବାହ୍ୟ ଜ୍ଞାନ ଶିକ୍ଷା ଗ୍ରହଣ କରିବା ଉଚିତ ବୋଲି କହିଥିଲେ । ସ୍ଵାଗତ ନୃତ୍ୟ ପରେ ଶିକ୍ଷକ ପଙ୍କଜ ମେହେର ବାର୍ଷିକ ବିବରଣୀ ପଠନ କରିଥିଲେ । ଛାତ୍ର ସାର୍ଥକ, ପ୍ରଜ୍ଞା, ପ୍ରିତି, ସୁନେନା, ଶିକ୍ଷକ ସୁଧାଂଶୁ ପଧାନ, ଶିକ୍ଷୟିତ୍ରୀ ପ୍ରତୀଶା ମିଶ୍ର କାର୍ଯ୍ୟକ୍ରମର ପରିଚାଳନା କରିଥିବା ବେଳେ ଧନ୍ୟବାଦ ଅର୍ପଣ କରିଥିଲେ ଶିକ୍ଷକ କାହ୍ନୁଚରଣ ଧରୁଆ । ଏହି ଅବସରରେ ଅତିଥିମାନଙ୍କ ଦ୍ୱାରା ବିଦ୍ୟାଳୟ ତରଫରୁ “ଆମ ଲେଖା ଆମ ଚିତ୍ର” ପତ୍ରିକାକୁ ଉନ୍ମୋଚିତ କରାଯାଇଥିଲା । ଚଳିତବର୍ଷ ଶ୍ରେଷ୍ଠ ଛାତ୍ର ଭାବେ ଦଶମ ଶ୍ରେଣୀ ଛାତ୍ରୀ ପ୍ରତିଭା ପ୍ରଧାନଙ୍କୁ ଅନୁଷ୍ଠାନ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା । ସଂଜୀବ କୁମାର ମିଶ୍ରଙ୍କ ରଚନା ଓ ନିର୍ଦ୍ଦେଶନାରେ ପୌରାଣିକ ନାଟକ “ଅଲାଜୁଗିଆ ଭସ୍ମାସୁର” ଓ “କନ୍ୟାରତ୍ନ” ଏବଂ ନିରୋତ୍ତମା ବିଶ୍ୱାଳଙ୍କ ନିର୍ଦ୍ଦେଶିତ ନାଟକ “ଅନାଥ” ଛାତ୍ରଛାତ୍ରୀମାନଙ୍କ ଦ୍ୱାରା ପରିବେଷଣ ହୋଇଥିଲା । ପୁରସ୍କାର ବିତରଣୀ କାର୍ଯ୍ୟକ୍ରମକୁ ପ୍ରଦୀପ ଦଣ୍ଡସେନା, ରଞ୍ଜିତ ମିଶ୍ର, ସୁଦାମ କୁମ୍ଭାର, ପ୍ରମୋଦ ପ୍ରଧାନ, ସୁଜିତ ଦେହୁରୀ, ସୁବାସିନୀ ସେଠୀ, ଅଶ୍ୱିନୀ ମହାଲିଙ୍ଗ, ନିହାରିକା ପଧାନ, ସୁଷମା ମେହେର, ମୁରାରୀ ପର୍ଡିଆ, ରଶ୍ମିତା ନନ୍ଦ ପ୍ରମୁଖ ପରିଚାଳନା କରିଥିଲେ । ଦ୍ୱିତୀୟ ଅଧିବେଶନରେ ବିଦ୍ୟାଳୟର ଛାତ୍ରଛାତ୍ରୀମାନଙ୍କ ଦ୍ୱାରା ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା ।