ନୂଆଦିଲ୍ଲୀ, (ପିଆଇବି) : ୨୦୨୪ ସେପ୍ଟେମ୍ବରରେ ଏମ୍ଏସ୍ସିଆଇ ଉଦୀୟମାନ ବଜାର ଓ ନିବେଶଯୋଗ୍ୟ ବଜାର ସୂଚକାଙ୍କ (ଏମ୍ଏସ୍ସିଆଇଇଏମ୍ ଆଇଏମ୍ଆଇ)ରେ ଭାରତ ଗୁରୁତ୍ୱ ଦୃଷ୍ଟିରୁ ଚୀନକୁ ପଛରେ ପକାଇ ଦେଇଥିବା ମୋର୍ଗାନ ଷ୍ଟାନଲି ଘୋଷଣା କରିଛି । ଏମ୍ଏସ୍ସିଆଇ ଇଏମ୍ ଆଇଏମ୍ଆଇରେ ଭାରତର ଗୁରୁତ୍ୱ ୨୨.୨୭ ପ୍ରତିଶତ ଥିବା ବେଳେ ଚୀନର ୨୧.୫୮ ପ୍ରତିଶତ ରହିଛି । ଏମ୍ଏସ୍ସିଆଇ ଆଇଏମ୍ଆଇରେ ୩,୩୫୫ ଷ୍ଟକ ରହିଛି ଏବଂ ଏଥିରେ ବଡ଼, ମଧ୍ୟମ ଏବଂ କ୍ଷୁଦ୍ର କ୍ୟାପ୍ କମ୍ପାନୀ ଅନ୍ତର୍ଭୁକ୍ତ । ଏହା ଉଦୀୟମାନ ବଜାର ରୂପେ ବିବେଚିତ ହେଉଥିବା ୨୪ଟି ଦେଶର ଷ୍ଟକକୁ ସାମିଲ କରିବା ସହିତ ପ୍ରତ୍ୟେକ ଦେଶରେ ଫ୍ରି ଫ୍ଲୋଟ ଆଡଜଷ୍ଟେଡ୍ ମାର୍କେଟ କ୍ୟାପିଟାଲାଇଜେସନର ପ୍ରାୟ ୮୫% କଭରେଜକୁ ଲକ୍ଷ୍ୟ ରଖି ଅଧ୍ୟୟନ କରିଥାଏ । ସୂଚନାଯୋଗ୍ୟ, ଫ୍ରି ଫ୍ଲୋଟ ଆଡଜଷ୍ଟେଡ୍ ମାର୍କେଟ କ୍ୟାପିଟାଲାଇଜେସନ୍ର ଅର୍ଥ ହେଉଛି ସାର୍ବଜନୀନ ସ୍ତରରେ କାରବାର ହେଉଥିବା ଶେୟାରଗୁଡ଼ିକର ସଂଖ୍ୟାକୁ ଆଧାର କରି ବଜାର ପୁଞ୍ଜିକରଣର ହିସାବ କରିବାର ଏକ ମୂଲ୍ୟାୟନ ସୂତ୍ର । ମୁଖ୍ୟ ଏମ୍ଏସ୍ସିଆଇ ଇଏମ୍ ଇଣ୍ଡେକ୍ସ (ଷ୍ଟାଣ୍ଡାର୍ଡ ଇଣ୍ଡେକ୍ସ) ବୃହତ ଏବଂ ମଧ୍ୟମ କ୍ୟାପ୍କୁ ଅନ୍ତର୍ଭୁକ୍ତ କରୁଥିବା ବେଳେ ଆଇଏମ୍ଆଇରେ ଏକ ଅଧିକ ବ୍ୟାପକ ପରିସର ଅନ୍ତର୍ଭୁକ୍ତ, ଯେଉଁଥିରେ ବୃହତ, ମଧ୍ୟମ ଏବଂ କ୍ଷୁଦ୍ର କ୍ୟାପ୍ ଷ୍ଟକ ଅନ୍ତର୍ଭୁକ୍ତ । ଭାରତ ପାଖରେ ଥିବା କ୍ଷୁଦ୍ର ବା ସ୍ମଲ୍ କ୍ୟାପ୍ କାରଣରୁ ଏମ୍ଏସ୍ସିଆଇ ଆଇଏମଆଇରେ ଚୀନ ତୁଳନାରେ ଏହା ଆଗରେ ରହିଛି । ପୁନଃସନ୍ତୁଳନ ବ୍ୟାପକ ବଜାର ଧାରାକୁ ପ୍ରତିଫଳିତ କରେ । ଚୀନ୍ରେ ଆର୍ଥିକ ମାନ୍ଦାବସ୍ଥା ଯୋଗୁଁ ସେଠାକାର ବଜାର ସଂଘର୍ଷ କରୁଥିବା ବେଳେ ଅନୁକୂଳ ଆର୍ଥିକ ସ୍ଥିତିରୁ ଭାରତର ବଜାର ଲାଭବାନ ହୋଇଛି । ନିକଟ ଅତୀତରେ, ଭାରତ ଭାରତୀୟ ଅର୍ଥବ୍ୟବସ୍ଥାର ସୁଦୃଢ଼ ଆର୍ଥିକ ଭିତ୍ତିଭୂମି ଏବଂ ଭାରତୀୟ କର୍ପୋରେଟ୍ ଗୁଡ଼ିକର ଦୃଢ଼ ପ୍ରଦର୍ଶନ ଦ୍ୱାରା ପରିଚାଳିତ ଇକ୍ୱିଟି ବଜାର ପ୍ରଦର୍ଶନରେ ବହୁତ ଉନ୍ନତ ପ୍ରଦର୍ଶନ କରିଛି । ଏହାବ୍ୟତୀତ ଭାରତୀୟ ଇକ୍ୱିଟି ବଜାରରେ ଏହି ବୃଦ୍ଧି ବ୍ୟାପକ ରହିଛି, ଯାହା ଲାର୍ଜ କ୍ୟାପ୍ ସହିତ ମିଡ୍ କ୍ୟାପ୍ ଏବଂ ସ୍ମଲ୍ କ୍ୟାପ୍ ସୂଚକାଙ୍କରେ ପ୍ରତିଫଳିତ ହୋଇଛି । ଏହି ସକାରାତ୍ମକ ଧାରାର ପ୍ରମୁଖ କାରଣ ଗୁଡ଼ିକ ହେଲା ୨୦୨୪ର ପ୍ରାରମ୍ଭିକ ଭାଗରେ ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ (ଏଫଡିଆଇ)ରେ ୪୭% ବୃଦ୍ଧି, ବ୍ରେଣ୍ଟ ଅଶୋଧିତ ତୈଳ ଦର ହ୍ରାସ ଏବଂ ଭାରତୀୟ ଋଣ ବଜାରରେ ଯଥେଷ୍ଟ ବିଦେଶୀ ପୋର୍ଟଫୋଲିଓ ନିବେଶ (ଏଫପିଆଇ) । ଏହି କାରଣରୁ ଏମ୍ଏସ୍ସିଆଇ ନିଜର ସୂଚକାଙ୍କରେ ଭାରତୀୟ ଷ୍ଟକଗୁଡ଼ିକର ତୁଳନାତ୍ମକ ଗୁରୁତ୍ୱ ବଢ଼ାଉଛି । ଏମ୍ଏସ୍ସିଆଇ ଇଏମ୍ଆଇଏମ୍ଆଇ ବ୍ୟତୀତ ଭାରତର ଗୁରୁତ୍ୱ ବୃଦ୍ଧି ଏବଂ ଏମ୍ଏସ୍ସିଆଇ ଇଏମ୍ ଇଣ୍ଡେକ୍ସରେ ଚୀନର ଗୁରୁତ୍ୱରେ ତୁଳନାତ୍ମକ ହ୍ରାସରୁ ମଧ୍ୟ ଏହା ସ୍ପଷ୍ଟ ହୋଇଛି । ମାର୍ଚ୍ଚ-୨୪ରୁ ଅଗଷ୍ଟ-୨୪ ମଧ୍ୟରେ ଏମ୍ଏସ୍ସିଆଇ ଇଏମ୍ରେ ଭାରତର ଗୁରୁତ୍ୱ ୧୮%ରୁ ୨୦%କୁ ବୃଦ୍ଧି ପାଇଥିବା ବେଳେ ସମାନ ସମୟ ମଧ୍ୟରେ ଚୀନର ଓଜନ ୨୫.୧%ରୁ ୨୪.୫%କୁ ହ୍ରାସ ପାଇଛି । ବିଶ୍ଳେଷକଙ୍କ ଆକଳନ ଅନୁଯାୟୀ, ଏମ୍ଏସ୍ସିଆଇ ଇଏମ୍ ଆଇଏମ୍ଆଇରେ ଏହି ପରିବର୍ତ୍ତନ ପରେ ଭାରତୀୟ ଇକ୍ୱିଟିରେ ପ୍ରାୟ ୪ରୁ ୪.୫ ବିଲିୟନ ଆମେରିକୀୟ ଡଲାର ପୁଞ୍ଜିପ୍ରବାହ ହୋଇପାରେ । ଆର୍ଥିକ ଅଭିବୃଦ୍ଧି ଓ ବିକାଶ ପାଇଁ ଆଶାନୁରୂପ ପୁଞ୍ଜିନିବେଶର ଗତି ବଜାୟ ରଖିବା ଲାଗି ଭାରତକୁ ଉଭୟ ଦେଶୀ ଓ ବିଦେଶୀ ଉତ୍ସରୁ ପୁଞ୍ଜିର ଆବଶ୍ୟକତା ରହିଛି । ଏହି ପରିପ୍ରେକ୍ଷୀରେ ବୈଶ୍ୱିକ ଇଏମ୍ ସୂଚକାଙ୍କରେ ଭାରତର ଗୁରୁତ୍ୱ ବୃଦ୍ଧି ସକାରାତ୍ମକ ଗୁରୁତ୍ୱ ବହନ କରୁଛି ।